ប៉េកាំង៖ ប្រព័ន្ធផ្សព្វផ្សាយរដ្ឋបានរាយការណ៍ថា ប្រធានាធិបតីចិន លោក ស៊ី ជីនពីង នៅថ្ងៃទី២១ ខែសីហានេះ បានធ្វើដំណើរទៅកាន់ប្រទេសអាហ្វ្រិកខាងត្បូង ជាទីដែលលោកនឹងចូលរួមកិច្ចប្រជុំកំពូល BRICS នៅទីក្រុងចូហាន់នីសស្បឺគ។

ទីភ្នាក់ងារសារព័ត៌មានស៊ីនហួរបានរាយការណ៍ថា ប្រធានាធិបតីចិន លោក ស៊ី ជីនពីង បានចាកចេញពីរដ្ឋធានីប៉េកាំង នៅថ្ងៃទី២១ ខែសីហានេះ ដើម្បីទៅចូលរួមកិច្ចប្រជុំកំពូល BRICS លើកទី១៥ ដែលនឹងត្រូវធ្វើឡើងនៅទីក្រុងចូហាន់នីសស្បឺគ និងការបំពេញទស្សនកិច្ចផ្លូវរដ្ឋនៅប្រទេសអាហ្វ្រិកខាងត្បូង។

ទន្ទឹមគ្នា ប្រមុខការទូតមកពីប្រទេសប្រេស៊ីល ចិន ឥណ្ឌា អាហ្វ្រិកខាងត្បូង និងរុស្ស៊ី ក៏នឹងជួបជុំគ្នាចាប់ពីថ្ងៃអង្គារ ដល់ថ្ងៃព្រហស្បតិ៍សប្តាហ៍នេះផងដែរ ដើម្បីពិភាក្សាពីប្រធានបទ “BRICS និងអាហ្វ្រិក” នេះបើតាមការបញ្ជាក់របស់រដ្ឋមន្ត្រីការបរទេសអាហ្រ្វិកខាងត្បូង លោកស្រី ណាឡេឌី ផែនឌើ នៅក្នុងខែនេះ។

សូមបញ្ជាក់ថា ប្រទេសសរុបចំនួន ៦៩ ត្រូវបានអញ្ជើញឱ្យចូលរួមក្នុងកិច្ចប្រជុំកំពូល BRICS រួមទាំងរដ្ឋអាហ្វ្រិកទាំងអស់។ ក្រុមប្រទេស BRICS តំណាងឱ្យ ២៣ភាគរយនៃផលិតផលក្នុងស្រុកសរុប (GDP) របស់ពិភពលោក និង ៤២ភាគរយនៃចំនួនប្រជាជនលើពិភពលោក៕ ប្រភព៖ AFP ប្រែសម្រួលដោយ៖ ឈឹម ទីណា