ប៉េកាំង៖ ប្រធានាធិបតីចិន លោក ស៊ី ជិនពីង បានអំពាវនាវឱ្យមានការពង្រីកក្រុមប្រទេសប្រីកស៍ (BRICS) ដើម្បីកសាងសណ្តាប់ធ្នាប់អន្តរជាតិឱ្យកាន់តែ «ត្រឹមត្រូវ និងប្រកបដោយសមធម៌» ហើយទទូចថា «អនុត្តរភាពគ្មាននៅក្នុង ឌីអិនអេ(DNA) របស់ចិននោះទេ»។ នេះបើតាមការចុះផ្សាយរបស់បណ្ដាញព័ត៌មាន Al Jazeera។

ការថ្លែងបែបនេះ ធ្វើឡើងក្នុងសុន្ទរកថាមួយ ដែលអានជំនួសដោយរដ្ឋមន្ត្រីក្រសួងពាណិជ្ជកម្មចិន លោក វ៉ាង វេនតៅ(Wang Wentao) ក្នុងវេទិកាធុរកិច្ចប្រ៊ីកស៍នៃកិច្ចប្រជុំកំពូលប្រ៊ីកស៍ ដែលចាប់ផ្ដើមកាលពីថ្ងៃអង្គារ នាទីក្រុងចូហានណែសប៊ឺគ នៃប្រទេសអាហ្វ្រិកខាងត្បូង។ លោក ស៊ី បានអវត្តមានក្នុងវេទិកានោះ។

ក្នុងសុន្ទរកថាដែលអានដោយលោក វ៉ាង (Wang) លោក ស៊ី បានថ្លែងថា ប្រទេសចិនគ្មានបំណងចង់ចូលរួមក្នុងការប្រកួតប្រជែងអំណាចដ៏អស្ចារ្យ ឬបង្កើតប្លុកដើម្បីប្រឈមមុខដាក់គ្នានោះទេ។

លោកបានបន្ត៖ «ប្រទេសចិនឈរយ៉ាងរឹងមាំលើផ្នែកត្រូវនៃប្រវត្តិសាស្រ្ត ហើយជឿថា ហេតុផលត្រឹមត្រូវមួយគួរតែមានដើម្បីផលប្រយោជន៍រួម»។

មេដឹកនាំចិនដដែល និយាយថា ប្រ៊ីកស៍នឹងបន្តរីកចម្រើន ទោះបីមានឧបសគ្គយ៉ាងណាក៏ដោយ។ លោកបន្ថែមថា៖ «ពេលនេះ ការផ្លាស់ប្តូរនៅលើពិភពលោក ក្នុងសម័យរបស់យើង និងក្នុងប្រវត្តិសាស្ត្រកំពុងកើតមានឡើង ក្នុងរបៀបដែលមិនធ្លាប់មានពីមុនមក ដោយនាំសង្គមមនុស្សទៅរកចំណុចសំខាន់មួយ»។

គេមិនដឹងច្បាស់ទេ ពីមូលហេតុដែលលោក ស៊ី បានអវត្តមានក្នុងវេទិកាធុរកិច្ចនៃកិច្ចប្រជុំកំពូលប្រ៊ីកស៍នោះទេ ទោះបីជាលោក បានធ្វើដំណើរទៅអាហ្រ្វិកខាងត្បូងកាលពីថ្ងៃចន្ទ ដើម្បីចូលរួមកិច្ចប្រជុំដែលមានរយៈពេល៣ថ្ងៃនេះក៏ដោយ។

មេដឹកនាំផ្សេងទៀតរបស់ប្លុកបានចូលរួមថ្លែងលើវេទិកានោះ ដែលរួមមានប្រធានាធិបតីអាហ្វ្រិកខាងត្បូង លោក Cyril Ramaphosa ប្រធានាធិបតីប្រេស៊ីល លោក Luiz Inacio Lula da Silva និងនាយករដ្ឋមន្ត្រីឥណ្ឌា Narendra Modi ។ មេដឹកនាំរុស្ស៊ី លោក វ្ល៉ាឌីមៀរ ពូទីន ដែលរងដីកាចាប់ខ្លួនពីតុលាការអន្តរជាតិជុំវិញឧក្រិដ្ឋកម្មសង្រ្គាមនៅអ៊ុយក្រែន ក៏មិនបានចូលរួមដោយផ្ទាល់ ក្នុងកិច្ចប្រជុំកំពូលនាពេលនេះផងដែរ។

យ៉ាងណាមិញ លោក ស៊ី បានជួបជាមួយម្ចាស់ផ្ទះកិច្ចប្រជុំ លោក Ramaphosa ដោយនិយាយថា ទាំងចិន និងអាហ្វ្រិកខាងត្បូង ស្ថិតនៅចំណុចចាប់ផ្តើមប្រវត្តិសាស្ត្រថ្មី។

ចិន និងរុស្ស៊ី ដែលរងការដាក់ទណ្ឌកម្មយ៉ាងធ្ងន់ធ្ងរពីសហរដ្ឋអាមេរិក បានមានបំណងចង់ពង្រីកប្រ៊ីកស៍ ដើម្បីប្រឆាំងទៅនឹងឥទ្ធិពលត្រួតត្រារបស់លោកខាងលិចលើស្ថាប័ន និងកិច្ចការអន្តរជាតិ។

អារ៉ាប៊ីសាអូឌីត ឥណ្ឌូណេស៊ី អ៊ីរ៉ង់ អាហ្សង់ទីន និងអេហ្ស៊ីប ស្ថិតក្នុងចំណោមប្រទេសដែលបង្ហាញចំណាប់អារម្មណ៍ក្នុងការចូលរួមក្នុងប្លុកនេះ។ បច្ចុប្បន្នប្រ៊ីកស៍មានសមាជិកចំនួន៥ ដែលរួមមានប្រទេសប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង ដែលរួមចំណែកប្រមាណ ៤០ ភាគរយនៃចំនួនប្រជាជនសរុបសកល និងច្រើងជាង១/៤នៃសេដ្ឋកិច្ចពិភពលោក។

យ៉ាងណាមិញ ប្រេស៊ីលជំទាស់នឹងការពង្រីកខ្លួនរបស់ប្លុក ខណៈឥណ្ឌាហាក់មានភាពស្រពិចស្រពិលលើការណ៍នេះ ហើយប្រទេសទាំង២ចង់ផ្ដោតទៅលើការរីកចម្រើនរបស់ប្លុកជាជាងការពង្រីកខ្លួន។

គួរគូសសម្គាល់ថា ក្រៅពីការពង្រីកសមាជិកភាព កិច្ចប្រជុំកំពូលប្រ៊ីកស៍នាពេលនេះ ក៏មានការពិភាក្សាអំពីវិធីជំរុញការប្រើប្រាស់រូបិយប័ណ្ណក្នុងស្រុកក្នុងប្រតិបត្តិការពាណិជ្ជកម្ម និងហិរញ្ញវត្ថុផងដែរ ដែលវាស្ថិតនៅក្នុងគោលដៅកាត់បន្ថយការពឹងផ្អែកលើប្រាក់ដុល្លារអាមេរិក៕ ប្រែសម្រួល៖ ហួន ឌីណា