ថៃ៖ ឈៀងម៉ៃរកឃើញអ្នកឆ្លងជំងឺអ៊ុតស្វាថ្មី២ករណីលើបុរសស្រឡាញ់ភេទដូចគ្នា ខណៈផ្ទុះជំងឺគ្រុនឈាម
ថៃ៖ ការិយាល័យសុខភាពសាធារណៈខេត្តឈៀងម៉ៃនៃប្រទេសថៃបានឱ្យដឹងថា ទីក្រុងឈៀងម៉ៃបានរកឃើញអ្នកឆ្លងជំងឺអ៊ុតស្វាថ្មីចំនួន២ករណី ខណៈព្រមានពីការផ្ទុះបែកនៃជំងឺគ្រុនឈាម ដោយមានប្រជាជនជាង ៥ ០០០នាក់បានឆ្លងជំងឺនេះក្នុងឆ្នាំនេះ។នេះបើតាមការចុះផ្សាយរបស់កាសែតបាងកកប៉ុស្តិ៍។
ប្រធានអង្គភាពគ្រប់គ្រងជំងឺឆ្លងនៅការិយាល័យសុខភាពសាធារណៈខេត្តឈៀងម៉ៃ លោក Songyot Khamchaiបាននិយាយកាលពីថ្ងៃពុធថា ករណីជំងឺអ៊ុតស្វាទាំងពីរត្រូវបានរកឃើញលើបុរសអ្នកស្រឡាញ់ភេទដូចគ្នាទាំងពីរអ្នក។
ចំពោះករណីទី ១ បុរសវ័យ ៣១ ឆ្នាំម្នាក់ ដែលកំពុងជាប់ក្នុងចត្តាឡីស័កនាពេលនេះ បាននិយាយថា លោកបានរួមភេទជាមួយដៃគូនៅតៃវ៉ាន់ ហើយបានឆ្លងជំងឺអ៊ុតស្វា។ លោក Songyot អះអាងថា ស្ថានភាពជំងឺរបស់បុរសដដែល បានផុតដំណាក់កាលបង្ករោគ ដូច្នេះលោកមិនអាចចម្លងជំងឺនេះទៅអ្នកដទៃបានទេ។
ករណីទី ២ បានកើតឡើងលើបុរសវ័យ ៤០ ឆ្នាំម្នាក់ ដែលឆ្លងជំងឺអ៊ុតស្វាពីខេត្តផ្សេងទៀត ប៉ុន្តែទើបចាប់ផ្ដើមចេញរោគសញ្ញា ពេលលោកធ្វើដំណើរនៅឈៀងម៉ៃ។ លោក Songyot បានបន្ថែមថា បុរសរូបនោះត្រូវបានបញ្ជូនទៅស្រុកកំណើតដើម្បីឱ្យធ្វើចត្តាឡីស័ក។
គួរគូសបញ្ជាក់ថា រហូតមកទល់ពេលនេះ ថៃរកឃើញអ្នកឆ្លងជំងឺអ៊ុតស្វាចំនួន ២១៧ ករណី ទូទាំងប្រទេស ដែលស្ទើរតែទាំងអស់គឺជាបុរស។ បើតាមបាងកកប៉ុស្តិ៍ដដែល គិតត្រឹមថ្ងៃទី១៥ ខែសីហា មានជនជាតិថៃ ១៨៧ នាក់ បានឆ្លងជំងឺនេះ។
យោងតាមនាយកដ្ឋានគ្រប់គ្រងជំងឺឆ្លងរបស់ថៃ អ្នកស្លាប់ដោយសារជំងឺអ៊ុតស្វាមាន១ករណី លើបុរសម្នាក់ ដែលមានផ្ទុកមេរោគអេដស៍ និងមានរោគស្វាយ ប៉ុន្តែមិនទទួលការព្យាបាល។ លោកបានចេញរោគសញ្ញាជំងឺស្វាយនៅថ្ងៃទី ៣ ខែកក្កដា ហើយបានស្លាប់នៅថ្ងៃទី១១ ខែសីហា កន្លងទៅ។
ទន្ទឹមនឹងបញ្ហានេះ លោក Songyot បានឱ្យដឹងថា ចំនួនករណីនៃជំងឺគ្រុនឈាមកំពុងកើនឡើង ដោយទីក្រុងឈៀងម៉ៃបានរាយការណ៍ពីករណីឆ្លងជំងឺនេះរហូតដល់ ៥ ០០០ ករណី ក្នុងឆ្នាំ ២០២៣ ខណៈឆ្នាំ ២០២២ ទាំងមូលមានត្រឹមតែ ១ ០០០ ករណីប៉ុណ្ណោះ។ លោកបាននិយាយថា ប្រសិនបើករណីជំងឺគ្រុនឈាមនៅខណ្ឌ Muang នៃទីក្រុងមិនធ្លាក់ចុះនៅចុងខែនេះទេ រដ្ឋបាលខេត្តឈៀងម៉ៃ នឹងដាក់ស្លាកវាថាជាតំបន់ផ្ទុះជំងឺគ្រុនឈាម ដែលទាមទារឱ្យមានការអនុវត្តច្បាប់ស្តីពីជំងឺឆ្លង៕
ប្រែសម្រូលដោយ៖ ហួន ឌីណា
ប្រភព៖ Chiang Mai finds 2 mpox cases, dengue ‘outbreak’
