វ៉ាស៊ីងតោន ឌីស៊ី៖ សេតវិមានបានប្រកាស កាលពីថ្ងៃចន្ទ សប្តាហ៍នេះថា ប្រធានាធិបតីអាមេរិក លោក Joe Biden នឹងធ្វើទស្សនកិច្ចនៅវៀតណាម នាថ្ងៃទី ១០ ខែកញ្ញា ដើម្បីជួបជាមួយមេដឹកនាំបក្សកុម្មុយនិស្តវៀតណាម លោក Nguyen Phu Trong ។

ទស្សនកិច្ចនៅប្រទេសវៀតណាមគ្រោងនឹងធ្វើឡើង បន្ទាប់ពីលោកប្រធានាធិបតីអាមេរិក Jo Biden ចូលរួមកិច្ចប្រជុំកំពូល G20 នៅប្រទេសឥណ្ឌា នេះបើតាមមន្ត្រីសេតវិមាន។

លេខាធិការសារព័ត៌មាន របស់សេតវិមាន លោកស្រី Karine Jean-Pierre បាននិយាយថា Biden និងមេដឹកនាំនៅវៀតណាមគ្រោងនឹងជំរុញកំណើនសេដ្ឋកិច្ចវៀតណាម ដែលផ្តោតលើបច្ចេកវិទ្យា និងការច្នៃប្រឌិត ក៏ដូចជា ការពង្រីកការផ្លាស់ប្តូរលើវិស័យអប់រំផងដែរ។ កិច្ចពិភាក្សាក៏នឹងដោះស្រាយមធ្យោបាយដើម្បី ប្រយុទ្ធប្រឆាំងនឹងការប្រែប្រួលអាកាសធាតុ និងបង្កើនសន្តិភាព វិបុលភាព និងស្ថិរភាពក្នុងតំបន់។

លោក Biden ធ្លាប់បានប្រកាសកាលពីដើមខែសីហាថា លោកនឹងធ្វើដំណើរទៅប្រទេសវៀតណាមក្នុងពេលឆាប់ៗនេះ ដោយនិយាយថា ទីក្រុងហាណូយ «ចង់ផ្លាស់ប្តូរទំនាក់ទំនងរបស់យើង និងក្លាយជាដៃគូ»៕ ប្រភពពី AFP ប្រែសម្រួល៖ សារ៉ាត