កូរ៉េខាងជើងធ្វើសមយុទ្ធក្លែងវាយប្រហារនុយក្លេអ៊ែរជាយុទ្ធសាស្ត្រ ដើម្បីប្រឆាំងនឹងសមយុទ្ធរវាងអាមេរិក និងសម្ព័ន្ធមិត្តក្នុងតំបន់
ព្យុងយ៉ាង៖ ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍នៅថ្ងៃព្រហស្បតិ៍នេះ ថា កូរ៉េខាងជើងបានធ្វើសមយុទ្ធក្លែងវាយប្រហារនុយក្លេអ៊ែរ ដោយកំណត់គោលដៅនានាទូទាំងប្រទេសកូរ៉េខាងត្បូង ដើម្បីជាប្រតិកម្មតបទៅនឹងសមយុទ្ធរវាងសហរដ្ឋអាមេរិក និងសម្ព័ន្ធមិត្តក្នុងតំបន់។
អគ្គសេនាធិការនៃកងទ័ពប្រជាជនកូរ៉េខាងជើង (KPA) បាននិយាយក្នុងសេចក្តីថ្លែងការណ៍ ដែល KCNA រាយការណ៍ថា អង្គភាពមីស៊ីលកូរ៉េខាងជើងបានបាញ់មីស៊ីលផ្លោងចំនួន២គ្រាប់ និងបានអនុវត្តយ៉ាងត្រឹមត្រូវនូវ «បេសកកម្មវាយប្រហារនុយក្លេអ៊ែរ» របស់ខ្លួន។
KPA និយាយយ៉ាងដូច្នេះថា៖ «KPA បានធ្វើសមយុទ្ធក្លែងវាយប្រហារនុយក្លេអ៊ែរយុទ្ធសាស្ត្រ «បំបោសដែនដី» នៅមជ្ឈមណ្ឌលបញ្ជាការសំខាន់ៗ និងវាលរត់យន្តហោះសម្រាប់ប្រតិបត្តិការរបស់ក្រុមយោធាសាធារណរដ្ឋកូរ៉េ(កូរ៉េខាងត្បូង) កាលពីយប់ថ្ងៃពុធ»។ ដោយប្រើប្រាស់ឈ្មោះដំបូងរបស់កូរ៉េខាងត្បូងថា សាធារណរដ្ឋកូរ៉េ។
បើតាមយោធាកូរ៉េខាងត្បូង កូរ៉េខាងជើងបានបាញ់មីស៊ីលផ្លោងរយៈចម្ងាយខ្លីចំនួន២គ្រាប់ ចូលទៅក្នុងសមុទ្រកាលពីថ្ងៃពុធ ប៉ុន្មានម៉ោងបន្ទាប់ពីសហរដ្ឋអាមេរិក បានដាក់ពង្រាយយន្តហោះទម្លាក់គ្រាប់បែក B-1B សម្រាប់សមយុទ្ធដែនអាកាសជាមួយកូរ៉េខាងត្បូង និងជប៉ុន ដាច់ដោយឡែកផ្សេងគ្នា។
សមយុទ្ធរបស់កូរ៉េខាងជើងចុងក្រោយ ធ្វើឡើងមួយថ្ងៃមុនពេលកូរ៉េខាងត្បូង និងសហរដ្ឋអាមេរិក បិទបញ្ចប់សមយុទ្ធយោធារួមគ្នារយៈពេល ១១ ថ្ងៃ ដែលទីក្រុងព្យុងយ៉ាងបានទទូចម្ដងហើយម្ដងទៀតពីពេលកន្លងមកថា ជាសកម្មភាពហាត់សមធ្វើសង្គ្រាម។
ជាមួយគ្នានោះផងដែរ KCNA បានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន កាលពីថ្ងៃអង្គារ បានសង្កេតមើលផ្នែកខ្លះនៃសមយុទ្ធមួយ ដែលចូលរួមដោយមន្ត្រីបញ្ជាការ និងកងកម្លាំងនៃកងទ័ពទាំងមូល ក្នុងគោលបំណងរៀបចំខ្លួនសម្រាប់សង្រ្គាមជាមួយកូរ៉េខាងត្បូង។ សមយុទ្ធនោះ បានក្លែងធ្វើទប់ទល់នឹងការឈ្លានពានភ្លាមៗ បន្ទាប់មកចាប់ផ្តើមការវាយប្រហារតបត ដើម្បីកាន់កាប់ទឹកដីកូរ៉េខាងត្បូង៕
ប្រែសម្រួលដោយ៖ ហួន ឌីណា
ប្រភព៖ North Korea stages tactical nuclear strike drill to protest allied exercises
