អាមេរិកប្រកាសជំនួយ មួយ ប៊ីលានដុល្លារថ្មី ដើម្បីគាំទ្រប្រតិបត្តិការវាយបករបស់អ៊ុយក្រែន
អាមេរិក៖ រដ្ឋមន្ត្រីការបរទេសអាមេរិក លោក អ៊ែនថូនី ប្ល៊ីងកែន បានប្រកាសជំនួយថ្មី មួយប៊ីលានដុល្លារក្នុងដំណើរទស្សនកិច្ចទៅទីក្រុងកៀវកាលពីថ្ងៃពុធ ដើម្បីគាំទ្រដល់ប្រតិបត្តិការវាយបកប្រឆាំងនឹងកងទ័ពឈ្លានពានរុស្ស៊ី។ នេះបើតាមការចុះផ្សាយរបស់បណ្ដាញព័ត៌មាន Al Jazeera។
លោក ប្ល៊ីងកែន បានថ្លែងប្រាប់អ្នកយកព័ត៌មាននៅក្នុងសន្និសីទសារព័ត៌មានជាមួយរដ្ឋមន្ត្រីការបរទេសអ៊ុយក្រែនលោក ឌ្មីដ្រូ គូឡេបា ថា៖ «ប្រតិបត្តិការវាយបកដែលកំពុងបន្ត មានការរុលទៅមុខយ៉ាងលឿនក្នុងរយៈពេលប៉ុន្មានសប្តាហ៍កន្លងមកនេះ។ជំនួយថ្មីនេះ នឹងជួយទ្រទ្រង់ប្រតិបត្តិការនេះនិងកសាងសម្ទុះបន្ថែមទៀត»។
បើតាមការឱ្យដឹងរបស់លេខាធិការសារព័ត៌មានសេតវិមាន លោកស្រី Karine Jean-Pierre កាលពីថ្ងៃពុធ ជំនួយថ្មីរបស់សហរដ្ឋអាមេរិក រួមមានទាំងកញ្ចប់ជំនួយសព្វាវុធដូចជាប្រព័ន្ធបាញ់កាំជ្រួច HIMARS អាវុធប្រឆាំងរថក្រោះ Javelin រថក្រោះ Abrams និងប្រព័ន្ធសព្វាវុធផ្សេងទៀត។ ជាមួយគ្នានោះ មន្ទីរបញ្ចកោណបាននិយាយថា ខ្លួនក៏នឹងបញ្ជូនគ្រាប់រំសេវអ៊ុយរ៉ាញ៉ូម ដែលមានប្រសិទ្ធភាពខ្ពស់ក្នុងការទម្លុះបន្ទះពាសដែក ទោះបីជាអាវុធប្រភេទនេះមានភាពចម្រូងចម្រាស់ក្នុងការប្រើប្រាស់។
ក្នុងដំណើរទស្សនកិច្ចកាលពីថ្ងៃពុធ លោក ប្ល៊ីងកែន ក៏បានជួបជាមួយប្រធានាធិបតីអ៊ុយក្រែន លោក វ្ល៉ូឌីមៀរ ហ្សេលេនស្គី ផងដែរ ខណៈមេដឹកនាំអ៊ុយក្រែនរូបនេះបានថ្លែងអំណរគុណដល់សហរដ្ឋអាមេរិកសម្រាប់ការគាំទ្រ ប៉ុន្តែព្រមានថា អ៊ុយក្រែននឹងមានការលំបាកក្នុងការប្រយុទ្ធនៅខែខាងមុខៗពេលរដូវរងាបានខិតចូលមកដល់។
គួរបញ្ជាក់ថា រុស្ស៊ីតែងតែប្រឆាំងនឹងការផ្ដល់ជំនួយសព្វាវុធដល់អ៊ុយក្រែន ពីសំណាក់ប្រទេសលោកខាងលិច រួមមានទាំងសហរដ្ឋអាមេរិក ដែលជាម្ចាស់ជំនួយអ៊ុយក្រែនដ៏ធំបំផុតជាងគេ។
ជាថ្មីម្ដងទៀត អ្នកនាំពាក្យវិមានក្រឹមឡាំង លោក ឌ្មីទ្រី ប៉េស្កូវ បាននិយាយថា ទីក្រុងមូស្គូជឿថា ទីក្រុងវ៉ាស៊ីនតោន គ្រោងនឹងបន្តផ្តល់មូលនិធិដល់យោធាអ៊ុយក្រែន «ដើម្បីធ្វើឱ្យសង្គ្រាមនេះបន្តអូសបន្លាយរហូតដល់ថ្ងៃចុងក្រោយរបស់អ៊ុយក្រែន»។
ចំណែក លោក ប៉េស្កូវ បានបន្តថា ជំនួយរបស់សហរដ្ឋអាមេរិកដល់អ៊ុយក្រែន នឹងមិនប៉ះពាល់ដល់ដំណើរការឈ្លានពាន ដែលរុស្ស៊ីហៅថា «ប្រតិបត្តិការយោធាពិសេស» នោះឡើយ៕
ប្រែសម្រួល៖ ហួន ឌីណា
ប្រភព៖ Blinken hails Ukraine counteroffensive as US announces $1bn in new aid
