ប៉ូលិសហូឡង់ចាប់ខ្លួនសកម្មជនអាកាសធាតុជាង ២ ៤០០ នាក់ ជុំវិញការធ្វើបាតុកម្មបិទផ្លូវសំខាន់
ឡាអេ៖ប៉ូលិសហូឡង់បានចាប់ខ្លួនសកម្មជនអាកាសធាតុជាង ២ ៤០០ នាក់ ជុំវិញការធ្វើបាតុកម្មបិទផ្លូវហាយវ៉េដ៏សំខាន់មួយកាលពីថ្ងៃសៅរ៍ ដើម្បីទាមទារឱ្យបញ្ចប់ការឧបត្ថម្ភធនរបស់រដ្ឋាភិបាលលើឧស្សាហកម្មឥន្ធនៈហ្វូស៊ីល។
បើតាមការរាយការណ៍របស់ទីភ្នាក់ងារសារព័ត៌មានរ៉យទ័រនិយាយថា ប៉ូលិសបានដាក់កាណុងបាញ់ទឹក ដើម្បីបំបែកក្រុមបាតុករ។
ប្រជាជនជាង ១០ ០០០ នាក់ បានដើរដង្ហែតាមផ្លូវហាយវ៉េ A12 ទៅកាន់ទីក្រុងឡាអេ ដោយមិនស្ដាប់ការព្រមានពីអាជ្ញាធរហូឡង់ថាកុំឱ្យមានការបិទផ្លូវដែលសំខាន់ៗ។ ប៉ូលិសហូឡង់បាននិយាយក្នុងសេចក្តីថ្លែងការណ៍ថា ពួកគេបានឃុំខ្លួនបាតុករចំនួន ២ ៤០០ នាក់ រួមទាំងអនីតិជនផងដែរ ខណៈមិនមានរបាយការណ៍ដែលថា វិធានការរបស់ប៉ូលិសបង្កការរងរបួស ឬយ៉ាងណានោះទេ។
ទោះជាយ៉ាងណាក៏ដោយ ក្រុមអ្នករៀបចំបាតុកម្ម Extinction Rebellion បានព្រមានថា ខ្លួននឹងបន្តធ្វើបាតុកម្មរហូតដល់រដ្ឋាភិបាលនៃប្រទេសហូឡង់ ឈប់ប្រើប្រាស់មូលនិធិសាធារណៈដើម្បីឧបត្ថម្ភធនដល់ឧស្សាហកម្មប្រេង និងឧស្ម័ន។
គួរបញ្ជាក់ថា មុនបាតុកម្មបានផ្ទុះឡើង មានសេចក្ដីរាយការណ៍កាលពីដើមសប្ដាហ៍ថា រដ្ឋាភិបាលហូឡង់ផ្ដល់ទឹកប្រាក់ចំនួន ៤០,៥ ប៊ីលានដុល្លារ នៅក្នុងការឧបត្ថម្ភធនដែលរងការប្រឆាំងនាពេលនេះ ស្របពេលដែលហូឡង់ ត្រូវបានគេមើលឃើញជារឿយៗថាជាប្រទេសនាំមុខគេខាងថាមពលកកើតឡើងវិញ និងគោលនយោបាយដែលមានសារៈសំខាន់ខាងប្រយុទ្ធប្រឆាំងនឹងការប្រែប្រួលអាកាសធាតុ។
រដ្ឋមន្ត្រីក្រសួងអាកាសធាតុ និងថាមពលលោក Rob Jetten បានទទួលស្គាល់ថា ប្រទេសនេះត្រូវតែបញ្ចប់ការឧបត្ថម្ភធនលើវិស័យឥន្ធនៈហ្វូស៊ីល ប៉ុន្តែមិនបានផ្តល់ពេលវេលាកំណត់នោះទេ។
សកម្មជនអាកាសធាតុម្នាក់ ឈ្មោះ Yolanda de Jager បានប្រាប់ទីភ្នាក់ងារសារព័ត៌មាន AP ថា៖ «បញ្ហានេះសំខាន់ជាងយើងទៅទៀត។ នេះជាការព្រួយបារម្ភរបស់ពិភពលោកទាំងមូល»៕
ប្រែសម្រួល៖ហួន ឌីណា ប្រភព៖ Netherlands police use water cannon, detain 2,400 climate activists
