វិមានក្រឹមឡាំងថាជំនួបរវាងលោកពូទីននិងលោកគីមនឹងក្លាយជាដំណើរទស្សនកិច្ចគ្រប់ជ្រុងជ្រោយ
មូស្គូ៖ កាលពីពេលថ្មីៗនេះ អ្នកនាំពាក្យវិមានក្រឹមឡាំង លោក ឌីមៀរ ប៉េស្កូវ(Dmitry Peskov) បាននិយាយថា ដំណើរទស្សនកិច្ចរបស់មេដឹកនាំកូរ៉េខាងជើងលោក គីម ជុងអ៊ុន ទៅកាន់ប្រទេសរុស្ស៊ី និងជំនួបជាមួយប្រធានាធិបតី វ្ល៉ាឌីមៀ ពូទីន នឹងក្លាយជាដំណើរទស្សនកិច្ចគ្រប់ជ្រុងជ្រោយ ឬពេញលេញមួយ។
បើយោងតាមប្រភពព័ត៌មានមួយរបស់កូរ៉េខាងត្បូង អះអាងថា លោក គីម បានចេញដំណើរទៅកាន់ប្រទេសរុស្ស៊ីតាមរថភ្លើងពិសេសមួយ ខណៈទីក្រុងព្យុងយ៉ាង និងទីក្រុងមូស្គូកាលពីថ្ងៃចន្ទក៏បានបញ្ជាក់ពីជំនួបកំពូលជាមួយលោកប្រធានាធិបតី វ្ល៉ាឌីមៀ ពូទីន ផងដែរ ចំពេលរុស្ស៊ីកាន់តែមានភាពឯកោកាន់តែខ្លាំងឡើងចំពោះសកម្មភាពរបស់ខ្លួននៅអ៊ុយក្រែន។
លោក Peskov បានបញ្ជាក់ឱ្យដឹងថា ប្រទេសទាំងពីរ នឹងមានកិច្ចពិភាក្សាផ្លូវការរវាងគណៈប្រតិភូទាំងពីរហើយបន្ទាប់ពីនោះ ប្រសិនបើចាំបាច់ មេដឹកនាំទាំងពីរអាចនឹងបន្តទំនាក់ទំនងរបស់ពួកគេក្នុងទម្រង់មួយទល់មួយ។
លោក Peskov បន្តថាប្រធានបទសំខាន់នៃកិច្ចពិភាក្សា គឺពង្រឹងទំនាក់ទំនងទ្វេភាគីរវាងប្រទេសទាំងពីរ។
ដោយឡែក សហរដ្ឋអាមេរិកកាលពីថ្ងៃចន្ទ ក៏បានពណ៌នាពីប្រធានាធិបតីរុស្ស៊ីលោក វ្ល៉ាឌីមៀ ពូទីន ផងដែរថា ការជួបជាមួយមេដឹកនាំកូរ៉េខាងជើងលោក គីម ជុងអ៊ុន គឺដោយសារអស់សង្ឃឹមក្នុងជម្លោះជាមួយនឹងអ៊ុយក្រែន និងបានព្រមានជាថ្មីថា ប្រសិនបើមានកិច្ចព្រមព្រៀងសព្វាវុធណាមួយកើតឡើងនោះ ទណ្ឌកម្មរបស់សហរដ្ឋអាមេរិកបន្ថែមក៏កើតឡើងដែរ។
អ្នកនាំពាក្យក្រសួងការបរទេសអាមេរិកលោក Matthew Miller បានប្រាប់អ្នកសារព័ត៌មានថា ប្រធានាធិបតីរុស្ស៊ី លោក ពូទីន បានចាប់ផ្តើមសង្រ្គាមប្រឆាំងនឹងអ៊ុយក្រែនដោយការឈ្លានពានពេញទីរបស់ខ្លួនជាមួយនឹងក្តីសុបិននៃការស្ដារឡើងវិញនូវភាពរុងរឿងនៃចក្រភពរុស្ស៊ី ក៏ប៉ុន្តែក្តីសង្ឃឹម ឬការរំពឹងទុកនោះកំពុងតែរងបរាជ័យ៕
ដោយ៖ស្រ៊ុន សិរីវឌ្ឍនៈ
ប្រភព៖ Putin and Kim’s meeting will be full-scale visit, Kremlin says
