គៀវ៖ ប្រធានាធិបតីអ៊ុយក្រែនលោក Volodymyr Zelensky បានបើកវេទិកា «ឧស្សាហកម្មការពារជាតិអន្តរជាតិ» លើកដំបូងរបស់ប្រទេសអ៊ុយក្រែន ក្នុងគោលបំណងទាក់ទាញក្រុមហ៊ុនផលិតអាវុធបន្ថែមទៀត ក្នុងប្រទេសនេះ ហើយបានជួបជាមួយតំណាងក្រុមហ៊ុនផលិតសព្វាវុធមកពីសហរដ្ឋអាមេរិក ចក្រភពអង់គ្លេស អាល្លឺម៉ង់ បារាំង ទួកគី ស៊ុយអែត និងឆែក។

រដ្ឋាភិបាលអ៊ុយក្រែនបានពឹងផ្អែកយ៉ាងខ្លាំងលើជំនួយរបស់លោកខាងលិច ចាប់តាំងពីប្រទេសរុស្ស៊ីបានឈ្លានពាន កាលពីឆ្នាំមុន ប៉ុន្តែក៏កំពុងប្រឹងប្រែងកាន់តែខ្លាំងឡើង ដើម្បីជំរុញឧស្សាហកម្មអាវុធក្នុងស្រុករបស់ខ្លួន ចំពេលមានការភ័យខ្លាចថា ការគាំទ្រពីសម្ព័ន្ធមិត្តអាចនឹងបាត់បង់នោះ។

លោក Zelensky បាននិយាយនៅក្នុងសុន្ទរកថា នៅពេលប្រកាសបើកវេទិកា «ឧស្សាហកម្មការពារជាតិអន្តរជាតិ» កាលពីថ្ងៃសុក្រ សប្តាហ៍នេះថា «ភារកិច្ចដំបូងរបស់យើងគឺឈ្នះសង្រ្គាមនេះ ហើយប្រគល់មកវិញ នូវសន្តិភាពយូរអង្វែង ហើយសំខាន់បំផុត គឺសន្តិភាពដែលអាចទុកចិត្តបានដល់ប្រជាជនរបស់យើង»។

លោកប្រធាធិបតីអ៊ុយក្រែនរូបនេះបានបន្តថា «យើងនឹងសម្រេចកិច្ចការនេះ តាមរយៈកិច្ចសហប្រតិបត្តិការរបស់យើងជាមួយអ្នកទាំងអស់គ្នា»

លោក Zelensky បាននិយាយទៀតថា «យើងចាប់អារម្មណ៍ក្នុងការធ្វើ «មូលដ្ឋានីយកម្មការផលិតអាវុធ» ដែលចាំបាច់សម្រាប់ការពារជាតិរបស់យើង… និងប្រព័ន្ធការពារកម្រិតខ្ពស់ដែលប្រើប្រាស់ដោយទាហានរបស់យើង ដែលផ្តល់ឱ្យអ៊ុយក្រែននូវលទ្ធផលល្អបំផុត នាពេលបច្ចុប្បន្ននេះ»។

គួរបញ្ជាក់ថា មន្ត្រីមកពីជាង ៣០ ប្រទេស និងក្រុមហ៊ុនផលិតអាវុធចំនួន ២៥០ ត្រូវបានប្រមូលផ្តុំគ្នា សម្រាប់វេទិកា «ឧស្សាហកម្មការពារជាតិអន្តរជាតិ» នេះ ហើយវេទិកានេះត្រូវបានរៀបចំឡើង ស្របពេលដែលលោក Zelensky បញ្ចុះបញ្ចូលប្រទេសលោកខាងលិច ផ្គត់ផ្គង់អាវុធបន្ថែមទៀត ដើម្បីធ្វើការវាយលុកប្រឆាំងនឹងរុស្ស៊ី៕ ប្រភពពី AFP ប្រែសម្រួល៖ សារ៉ាត