កាលពីរសៀលថ្ងៃទី២៤ ខែកក្កដា ឆ្នាំ២០១៩ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្រ្ដីក្រសួងសាធារណការ និងដឹកជញ្ចូន បានសម្រេចដកតំណែងមន្រ្ដី ចំនួន ៦រូប ដើម្បីពង្រឹងការងារគម្រោងឲ្យមានប្រសិទ្ធភាព និងប្រសិទ្ធផលខ្ពស់ និងគ្រប់គ្រងការងារស្ថាបនា ធ្វើឲ្យប្រសើរឡើង កំណាត់ផ្លូវជាតិលេខ៧។

ទន្ទឹមនឹងនេះផងដែរ ឯកឧត្ដម ប្រាប់ឱ្យដឹងថា៖ “ផ្លូវជាតិលេខ៧ បង្គោលគីឡូម៉ែត្រ PK136 – PK300 សម្រេច ប្តូរសមាសភាពមន្ត្រីគម្រោង ៦រូប៖ ប្រធានក្រុមទីប្រឹក្សាបច្ចេកទេស ១រូប។ អនុប្រធានក្រុមទីប្រឹក្សាបច្ចេកទេស ១រូប។ សមាជិកក្រុមទីប្រឹក្សាបច្ចេកទេស ៤រូប។ ដើម្បីពង្រឹងការងារគម្រោងឲ្យមានប្រសិទ្ធភាព និងប្រសិទ្ធផលខ្ពស់ ក្រសួងសាធារណការ  និងដឹកជញ្ជូ ន  បានសម្រេចប្តូរសមាសភាពមន្ត្រីគម្រោង RAMP II ដែលកំពុងត្រួតពិនិត្យ និងគ្រប់គ្រងការងារស្ថាបនា ធ្វើឲ្យប្រសើរឡើង កំណាត់ផ្លូវជាតិលេខ៧ ចាប់ពី បង្គោលគីឡូម៉ែត្រ PK136 – PK300 ដោយប្តូរពីកៅស៊ូពីរស្រទាប់ DBST ទៅជាបេតុងកៅស៊ូ AC ពង្រីកតួផ្លូវពី ៧ម ទៅ ១១ម (កៅស៊ូ AC ១០ម) មហិរញ្ញប្បទានពីធនាគារពិភពលោកក្នុងទឹកប្រាក់ប្រមាណ ៣៦,៤៥លានដុល្លារអាមេរិក។

គិតត្រឹមថ្ងៃទី១៨ ខែកក្កដា ឆ្នាំ២០១៩ គម្រោង ផ្លូវជាតិលេខ៧ បង្គោលគីឡូម៉ែត្រ PK136 – PK300 នេះសម្រេចបានលទ្ធផល ដូចខាងក្រោម៖ PK136 – PK186 អ៊ុកៅស៊ូ AC បាន ១០០%។ PK186 – PK243 អ៊ុកៅស៊ូ AC បាន ១០០%។ PK243 – PK300 អ៊ុកៅស៊ូ AC បាន ៧២%។ ក្រសួងបានរកឃើញថា មានចំណុចមួយចំនួន នៅមានការខ្វះខាត ដែលតម្រូវឲ្យក្រុមហ៊ុន ដោះស្រាយជាបន្ទាន់ ទើបក្រសួង អាចទទួលយកបាន។

សូមជម្រាបជូនថា ផ្លូវជាតិលេខ៧នេះមានប្រវែងសរុបចំនួន ៤៦០,៨៣០គីឡូម៉ែត្រ ជាប្រភេទបេតុងកៅស៊ូ (AC) ចាប់ពីស្គន់ ផ្លូវជាតិលេខ៦ (PK ៧៥+០០០) ដល់ត្រពាំងគ្រៀល (ព្រំដែនកម្ពុជា-ឡាវ) ក្នុងនោះប្រវែងចំនួន ២៧៥,៥៦០គីឡូម៉ែត្រត្រូវបានជួសជុលធ្វើឱ្យប្រសើរឡើងវិញចាប់ពីបង្គោលគីឡូម៉ែត្រលេខ១៣៦ ដោយប្រើប្រាស់ថវិកាអន្តរ ជាតិសរុបចំនួន៦៩,៨២លានដុល្លារអាមេរិក ពោលគឺ៖ចាប់ពីបង្គោលគីឡូម៉ែត្រលេខ PK136 – PK300ជាគម្រោងRAMP II ក្រោមហិរញ្ញប្បទានពីធនាគារពិភពលោកក្នុងទឹកប្រាក់ចំនួន៣៦,៤៥លានដុល្លារអាមេរិក និងចាប់ពីបង្គោលគីឡូម៉ែត្រលេខ PK332.125 – PK424.690 ជាជំនួយឥតសំណងរបស់រដ្ឋាភិបាលចិនក្នុងទឹកប្រាក់ចំនួន៣៣,៣៧ លានដុល្លារអាមេរិក ៕