អាមេរិក៖ លោកប្រធានាធិបតីអាមេរិក លោក ចូ បៃឌិន នឹង​ធ្វើទស្សនកិច្ចនៅប្រទេស​អ៊ីស្រាអែលនៅថ្ងៃពុធខាង​មុខនេះ ដើម្បីជជែក ពិភាក្សាជាមួយលោកនាយករដ្ឋមន្ត្រី បេនចាមីន ណេតាយ៉ាហ៊ូ(Benjamin Netanyahu)។ ទស្សនកិច្ចនេះដែរ ក៏ដើ​ម្បីបញ្ជាក់ឱ្យកាន់តែច្បាស់ថា អ៊ីស្រាអែ​លមានសិទ្ធិគ្រប់គ្រាន់ក្នុងការ​ប្រឆាំងតបត ដើម្បីការពារបូរ​ណភា​ពទឹកដីរបស់ខ្លួន។​

បើតាមលោក អាតូនី ប្លីនកេន(Antony Blinken) ដែលជារដ្ឋមន្ត្រីក្រសួងការបរទេអាមេរិកបានឱ្យដឹងថា មេដឹកនាំសហរដ្ឋ​អាមេរិក​នឹងបញ្ជាក់ឡើងវិញនូវសាមគ្គីភាពជាមួយអ៊ីស្រាអែល ខណៈពេលដែលខ្លួនកំពុងត្រៀម​សម្រាប់ការវាយលុ​កប្រឆាំងនឹងពួកសកម្មប្រយុទ្ធហាម៉ាស់នៅក្នុងតំបន់កាហ្សា។​

លោក Blinken បន្តគូសបញ្ជាក់ថា ៖ «លោក ចូ បៃឌិន នឹងទៅបញ្ជាក់ថាអ៊ីស្រាអែលមានកាតព្វកិច្ច​ដើម្បីកា​រពារប្រជាជនរបស់ខ្លួនពីក្រុមហាម៉ាស់ និងភេរវករផ្សេងទៀត ជាពិសេសដើម្បីការពារការ​វាយប្រហារណា​មួយនាពេលអនាគត»​។

លោកបន្តថា អ៊ីស្រាអែ​លក៏នឹងពន្យល់ដោយសង្ខេប​ពីគោលបំណង យុទ្ធសាស្ត្រសង្គ្រាម​របស់ខ្លួន ក៏ដូចជារបៀបដែលខ្លួននឹងធ្វើប្រតិបត្តិការ​ក្នុងការ​កាត់បន្ថយការស្លាប់ និងរបួស​របស់ជនស៊ីវិល ព្រមទាំងអាចឱ្យជំ​នួ​យមនុស្សធម៌ហូរទៅកាន់ជនស៊ីវិលនៅតំបន់កាហ្សាផងដែរ ​ពោលគឺធ្វើយ៉ាងណា​មិនផ្តល់ផលប្រយោ​ជន៍​ដល់ក្រុមហាម៉ាស់នោះទេ។​

បន្ថែមពីនេះ សហរដ្ឋអាមេរិក និងអ៊ីស្រាអែ​លបានព្រមព្រៀងគ្នាក្នុងការបង្កើតផែនការមួយ ដែលអនុញ្ញាតឱ្យ​ជំនួយសប្បុរសធម៌អាចចូលទៅដល់តំបន់កាហ្សាផងដែរ។​

ទាក់ទិននឹងការនាំយកជំនួយមនុស្សធម៌នេះទៀតសោត លោក Blinken បានបន្តថា ៖ «ប្រសិនបើ ក្រុមហាម៉ាស់ប្រើប្រាស់មធ្យោបាយណាមួយដើម្បីរារាំងជំនួយមនុស្សធម៌មិនឱ្យទៅដល់ដៃជនស៊ីវិល ឬក៏រឹបអូ​ស​យកជំនួយនោះ យើងនឹងថ្កោលទោសក្រុមហាម៉ាស់មុនគេ ហើយ​យើង​នឹង​ធ្វើ​យ៉ាងណា​ការពារ​កុំ​ឱ្យ​មា​នករណីនេះកើតឡើង»។

យ៉ាងណាមិញ អ្នកនាំពាក្យសន្តិសុខជាតិសេតវិមាន លោក John Kirby បាននិយាយថា បន្ទាប់ពីបំពេញទ​ស្សនកិច្ចនៅអ៊ីស្រាអែលរួច លោក បៃឌិន នឹងធ្វើដំណើរទៅកាន់ប្រទេស Jordan ដើម្បីជួបជាមួយស្តេច Abdullah, ប្រធានាធិបតីអេហ្ស៊ីប លោក Abdel Fattah El-Sisi និងនាយករដ្ឋមន្ត្រី រដ្ឋប៉ាឡេស្ទីន លោក Mahmoud Abbas។​

សេតវិមានក៏បាននិយាយផងដែរថា លោក បៃឌិន បានពិភាក្សាអំពីស្ថានការណ៍នានា​ជាមួយប្រធានា​ធិបតី El-Sisi និងនាយករដ្ឋមន្ត្រីអ៊ីរ៉ាក់ Shia’ Al Sudani នៅក្នុងជំនួបតាមទូរសព្ទកាលពីថ្ងៃចន្ទ។​

ក្នុងនោះ លោក ចូ បៃឌិន ក៏​បានពិភាក្សាអំពីតម្រូវការក្នុងការរក្សាស្ថិរភាពនៅមជ្ឈិមបូព៌ាជាមួយលោក El-Sisi ខណៈពេលដែលការពិភាក្សារបស់លោកជាមួយលោក Al Sudani បានផ្តោតលើកិច្ច​ខិតខំ​ប្រឹងប្រែ​ង ដើ​ម្បីការពារការពង្រីកជម្លោះនៅក្នុងតំបន់ហ្គាហ្សា។​

ដោយឡែក សហរដ្ឋអាមេរិកបានប្រាប់កងទ័ពស្នូលចំនួនពីរពាន់នាក់ ឱ្យត្រៀមខ្លួនក្នុងការចុះ​ធ្វើបេ​សកក​ម្ម​ក្នុងរយៈពេល ២៤ ម៉ោង ប្រសិនបើមានការជូនដំណឹង៕​

ប្រែសម្រួល៖កែវ បុស្បា

ប្រភព៖​​ Biden to visit Israel on Wednesday, Secretary of State Blinken says