មហាសេដ្ឋីអេឡុន ម៉ាស ពិចារណាដកបណ្តាញសង្គម X ចេញពីអឺរ៉ុបដោយសារបញ្ហាច្បាប់ថ្មី
អាមេរិក៖មហាសេដ្ឋីបច្ចេកវិទ្យា លោក អេឡុន ម៉ាស (Elon Musk) និងជាម្ចាស់បណ្តាញសង្គមយក្ស អ៊ិច ( X )ដែលបានប្តូរឈ្មោះមកពី ធ្វីតធឺរ(Twitter) កំពុងពិចារណាគ្រោងដកកម្មវិធីដែលខ្លួនទើបនឹងទិញបានចេញពីអឺរ៉ុប ជាការឆ្លើយតបទៅនឹងបទប្បញ្ញត្តិអ៊ីនធឺណិតថ្មីដែលទ្វីបអឺរ៉ុបបានកំណត់។ នេះបើយោងទៅតាមគេហទំព័រព័ត៌មាន Insider រាយការណ៍កាលពីថ្ងៃពុធ។
បើតាមមនុស្សម្នាក់ដែលមានទំនាក់ទំនងជិតស្និទ្ធជាមួយក្រុមហ៊ុន X បានប្រាប់ប្រព័ន្ធផ្សព្វផ្សាយថា លោក Elon Musk បានពិភាក្សារួចហើយអំពីការដកកម្មវិធីនេះចេញពីក្នុងតំបន់ ឬរារាំងអ្នកប្រើប្រាស់ដែលមានទីតាំងនៅក្នុងសហភាពអឺរ៉ុបមិនឱ្យចូលប្រើប្រាស់វាបាន។
សហភាពអឺរ៉ុប កាលពីខែសីហា បានអនុម័តច្បាប់សេវាកម្មឌីជីថល (DSA) ដែលកំណត់ច្បាប់សម្រាប់ការទប់ស្កាត់ការរីករាលដាលនៃមាតិកាដែលអាចបង្កគ្រោះថ្នាក់ មាតិកាដែលត្រូវបានហាមឃាត់ ឬ អាចកំណត់គោលដៅអ្នកប្រើប្រាស់ជាក់លាក់ បូករួមជាមួយនឹងច្បាប់អំពីការចែករំលែកទិន្នន័យផ្ទៃក្នុងមួយចំនួនជាមួយនិយតករ និងអ្នកស្រាវជ្រាវដែលពាក់ព័ន្ធផ្សេងៗទៀត។
មកទល់ពេលនេះ អ្នកតំណាង ឬភាគីក្រុមហ៊ុន X មិនបានឆ្លើយតបភ្លាមៗចំពោះសំណើសម្រាប់ការអត្ថាធិប្បាយពីសំណាក់សារព័ត៌មានណាមួយនោះទេ។
គួរជម្រាបថា កាលពីសប្តាហ៍មុនសហភាពអឺរ៉ុប ក៏បានប្រកាសដែរថាខ្លួនកំពុងស៊ើបអង្កេតលើកម្មវិធី X ដោយសារការល្មើសច្បាប់បច្ចេកវិទ្យាថ្មីរបស់ខ្លួន ជុំវិញការគ្រប់គ្រងព័ត៌មានក្លែងក្លាយមិនបានល្អទាក់ទិនទៅនឹងការវាយប្រហាររបស់ក្រុមហាម៉ាសទៅលើអ៊ីស្រាអែល។
ចំណែកឯ និយ័តករអូស្ត្រាលីវិញបានពិន័យកម្មវិធីបណ្តាញសង្គម X នេះចំនួន ៦១០,៥០០ ដុល្លារអូស្ត្រាលី (៣៨៦,០០០ ដុល្លារអាមេរិក) សម្រាប់ការខកខានក្នុងការសហការជាមួយនឹងការស៊ើបអង្កេតលើការអនុវត្តគោលការណ៍ប្រឆាំង នឹងការរំលោភបំពានលើកុមារ ដោយក្រុមហ៊ុននេះនៅតែព្យាយាមរក្សាពាណិជ្ជកម្មមួយចំនួនបើទោះបីជាវាបង្កផលប៉ះពាល់ដល់កុមារក្តី៕
ប្រែសម្រួល៖ ស្រ៊ុន សិរីវឌ្ឍនៈ
ប្រភពព័ត៌មាន៖
