វៀតណាម កាត់ទោសដាក់ពន្ធនាគារមនុស្សប្រាំមួយនាក់ ជុំវិញការជួញដូរស្រ្តីយកទៅលក់ធ្វើប្រពន្ធនៅចិន
ហាណូយ៖តុលាការខេត្ត Bac Lieu នៃប្រទេសវៀតណាម បានកាត់ទោសស្រ្តី៦នាក់ ឱ្យជាប់ពន្ធនាគារជាច្រើនឆ្នាំចំពោះការជួញដូរ បោកបញ្ឆោត និងលក់ស្ត្រីរងគ្រោះទៅប្រទេសចិន ដើម្បីឱ្យគេយកធ្វើជាប្រពន្ធ ។ នេះបើតាមការចុះផ្សាយរបស់កាសែត VnExpress។
នាង Luong Thi Hai អាយុ ៣១ ឆ្នាំ មានស្រុកកំណើតនៅខេត្ត Nghe An ត្រូវបានគេកំណត់អត្តសញ្ញាណថាជាមេខ្លោង។ នាងត្រូវបានកាត់ទោសកាលពីថ្ងៃអង្គារ ឱ្យជាប់គុករយៈពេល ៣០ ឆ្នាំចំពោះ ការជួញដូរមនុស្ស ការទិញ និងលក់មនុស្សអាយុក្រោម ១៦ ឆ្នាំ ការរៀបចំការឆ្លងដែនខុសច្បាប់សម្រាប់អ្នកដទៃ និងការរឹបអូសទ្រព្យសម្បត្តិជាដើម។
ស្រ្តីប្រាំនាក់ទៀត ត្រូវបានកាត់ទោសឱ្យជាប់គុកពីចន្លោះ ៥ ទៅ ២៩ ឆ្នាំ ក្រោមបទចោទប្រកាន់ដូចគ្នា និងទៅតាមស្ថានភាពទម្ងន់ទោស។
យោងតាមសាលក្រមកាលពីថ្ងៃអង្គារ នាង ហៃ(Hai )បានទៅធ្វើការនៅប្រទេសចិននៅឆ្នាំ ហើយរៀបការ និងតាំងទីលំនៅនៅក្នុងខេត្ត Henan ភាគកណ្តាលរបស់ប្រទេសចិន។ នាង Hai ដឹងថា មានបុរសជាច្រើននៅចិនចង់រៀបការ និងមានកូនជាមួយស្រ្តីវៀតណាម ។ដូច្នេះនាង និងប្ដី ដែលតុលាការមិនបានកំណត់អត្តសញ្ញាណ ក៏បានសម្រេចចិត្តបោកបញ្ឆោតនិងលក់ស្ត្រីវៀតណាមឱ្យបុរសៗ ដែលត្រូវការទាំងនោះ។
ក្នុងឆ្នាំ ២០១៩ នាង Hai បានស្គាល់ស្រ្តីជាប់ទោសដូចគ្នា ពីរនាក់ តាមរយៈក្រុមមួយដើម្បីផ្គូផ្គងនារីវៀតណាមជាមួយបុរសបរទេស នៅលើបណ្តាញសង្គម។ អ្នកទាំងបីបានស្វែងរកស្រីៗ ដែលមានជីវភាពគ្រួសារលំបាក និងមានការអប់រំទាបនៅខេត្ត Bac Lieu និងខេត្តជិតខាង ដើម្បីបោកប្រាស់ ហើយលក់ពួកគេទៅប្រទេសចិន។
ជនរងគ្រោះ ត្រូវបានតម្រូវឱ្យបង់ថ្លៃសេវាចំនួន ៤០ លានដុង ( ១ ៦៣០ ដុល្លារអាមេរិក) ក្នុងម្នាក់ៗ ជាថ្នូរនឹងការសន្យាថា ពួកគេនឹងមានអនាគតប្រកបដោយស្ថិរភាពនៅចិន ហើយគ្រួសាររបស់ពួកគេនៅវៀតណាម នឹងទទួលបានប្រាក់កាសមួយចំនួន។
ក្រុមរបស់នាង Hai នាំក្រុមស្រ្តីរងគ្រោះដែលខ្លួនទាក់ទងបាន ទៅក្រុងហាណូយ មុនឆ្លងកាត់ព្រំដែនដោយខុសច្បាប់ចូលទៅក្នុងប្រទេសចិន ។បន្ទាប់មក នាំជនរងគ្រោះទៅកាន់សណ្ឋាគារមួយកន្លែងក្នុងខេត្ត Henan ប្រទេសចិន ដោយចាំលក់ស្រ្តីៗរងគ្រោះទាំងនោះទៅបុរសជនជាតិចិនយកទៅធ្វើជាប្រពន្ធ។ អ្នកណាហ៊ានតតាំង នឹងត្រូវគេវាយដំ និងគំរាមលក់ទៅឲ្យផ្ទះបន។
អាស្រ័យលើអាយុ និងរូបរាងរបស់ស្ត្រីរងគ្រោះ បុរសជនជាតិចិនបង់ប្រាក់ឱ្យនាង Hai និងប្តី ចន្លោះពី ២០០ ទៅ ៤០០ លានដុង។ យោងទៅតាមការចោទប្រកាន់ ស្ត្រីមួយចំនួនត្រូវបានគេធ្វើទារុណកម្ម បន្ទាប់ពីរៀបការជាមួយបុរសជនជាតិចិន ដូច្នេះពួកគេចង់ត្រឡប់ទៅផ្ទះវិញ ប៉ុន្តែនាង Hai បានសម្រេចថា អ្នកណាម្នាក់ដែលចង់ចាកចេញពីប្រទេសចិន ត្រូវតែសងប្រាក់ទាំងអស់ដែលគ្រួសាររបស់ពួកគេទទួលបាន រួមជាមួយនឹងប្រាក់បន្ថែមផ្សេងទៀត។
ក្នុងករណីជាច្រើន ស្ត្រីរងគ្រោះខ្លះបានរត់គេចខ្លួន ប៉ុន្តែត្រូវបានក្រុមរបស់នាង Hai ចាប់បាន។
ប៉ូលិសវៀតណាមបាននិយាយថា ចន្លោះឆ្នាំ ២០១៩ ដល់ឆ្នាំ ២០២២ គូរកនរបស់នាង Hai បានបោកបញ្ឆោត និងលក់ស្ត្រីចំនួន ១១ នាក់ទៅកាន់ប្រទេសចិន រួមទាំងក្មេងស្រីអាយុក្រោម ១៦ ឆ្នាំម្នាក់ ហើយទទួលបានប្រាក់ចំនួន មួយប៊ីលានដុង។
យោងតាមកាសែតរបស់ប៉ូលិសក្រុងហូជីមិញ ករណីនេះបានផ្ទុះឡើងនៅក្នុងខែតុលា ឆ្នាំ ២០២២ នៅពេលដែលស្ត្រីម្នាក់ក្នុងចំនោមស្ត្រីរងគ្រោះ បានព្យាយាមសម្លាប់ខ្លួននៅក្នុងប្រទេសចិន បន្ទាប់ពីការប៉ុនប៉ងរត់គេចខ្លួនមិនបានសម្រេចជាច្រើនដង ដូច្នេះហើយក្រុមគ្រួសារប្តីរបស់នាង បានសម្រេចចិត្តនាំនាងទៅប៉ូលិស។ ស្រ្តីរូបនោះ ត្រូវបាននិរទេសមកប្រទេសវៀតណាមវិញ ហើយបានដាក់ពាក្យបណ្ដឹងទៅប៉ូលិសប្រឆាំងនឹងនាង Hai និងបក្ខពួក៕ ប្រែសម្រួលដោយ៖ ហួន ឌីណា
ប្រភព៖ Six jailed for selling women to China as wives
