ក្រសួងកិច្ចការនារី ដាក់ចេញគោលការណ៍អាទិភាពចំនួនប្រាំ ដើម្បីលើកកម្ពស់ស្រ្តីក្នុងភាពជាអ្នកដឹកនាំ និងសុខុមាលភាព
ភ្នំពេញ៖ក្រសួងកិច្ចការនារីបានដាក់ចេញគោលការណ៍អាទិភាពចំនួនប្រាំដោយផ្តោតលើការធ្វើបដិវត្តន៍កម្មយេនឌ័រ តាមរយៈការគាំពារស្ត្រីក្នុងភាពជាអ្នកដឹកនាំ ក៏ដូចជាលើកកម្ពស់សុខុមាលភាពស្ត្រី ខណៈកម្មវិធីអភិវឌ្ឍន៍សហប្រជាជាតិ( UNDP) ប្តេជ្ញានឹងស្វែងរកលទ្ធភាពគាំទ្រ ដើម្បីឱ្យគោលការណ៍អាទិភាពទាំងនោះ កាន់តែមានភាពល្អប្រសើរ។
គោលការណ៍អាទិភាពទាំងនេះ ត្រូវបានលើកឡើងនៅក្នុងជំនួបពិភាក្សាការងារ ក្នុងន័យបន្តកិច្ចសហប្រតិបត្តិការក្នុងអាណត្តិថ្មីនេះរវាង លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី ជាមួយលោកស្រី អាលីហ្សា ឆាកឺ (Alissar Chaker) ប្រធានកម្មវិធីអភិវឌ្ឍន៍សហប្រជាជាតិ (UNDP) ប្រចាំកម្ពុជាកាលពីថ្ងៃទី ១៨ ខែតុលា ឆ្នាំ២០២៣។
ប្រភពក្រសួងកិច្ចការនារីបានឱ្យដឹងថា នៅក្នុងជំនួបនោះលោកជំទាវ អ៊ឹង កន្ថាផាវី បានបញ្ជាក់ជូនភ្ញៀវថា ក្រសួងកំពុងរៀបចំផែនការនារីរតនៈទី៦ ដែលក្នុងផែនការនេះមានអាទិភាពប្រាំផ្តោតលើការធ្វើបដិវត្តន៍កម្មយេនឌ័រ ។ក្នុងនោះ អាទិភាពទី១.គឺការផ្តល់ភាពអង់អាចស្ត្រី ទៅក្នុងសេដ្ឋកិច្ចឌីជីថល។ អាទិភាពទី២.គិតគូរអំពីសុខុមាលភាព សេដ្ឋកិច្ចបៃតង ជាអភិបាលកិច្ចដែលមានបរិយាបន្ន ។អាទិភាពទី ៣. ការគាំពារស្ត្រីក្នុងភាពជាអ្នកដឹកនាំ ។អាទិភាពទី៤. ការទប់ស្កាត់អំពើហិង្សាលើស្ត្រី និងទី៥. ការលើកកម្ពស់សុខុមាលភាពស្ត្រី។
ចំណែកលោកស្រី អាលីហ្សា ឆាកឺ ក៏បានបង្ហាញនូវក្របខ័ណ្ឌផែនការសហប្រតិបត្តិការថ្មីរបស់កម្មវិធីអភិវឌ្ឍន៍សហប្រជាជាតិ រយៈពេល៥ឆ្នាំ សម្រាប់ប្រចាំប្រទេសកម្ពុជា ដែលក្នុងនោះទាក់ទងទៅនឹងយេនឌ័រផ្ដោតទៅលើការគាំពារដោះស្រាយគម្លាតយេនឌ័រ ក្នុងផ្នែកឌីជីថល ការដោះស្រាយសេដ្ឋកិច្ច ដែលគិតគូរពីសុខុមាលភាព ការងារស្ត្រីក្នុងការប្រែប្រួលអាកាសធាតុ ស្ត្រីក្នុងសហគ្រិនភាពផងដែរ។
ប្រភពដដែលបញ្ជាក់ថា បន្ទាប់ពីការពិភាក្សាគ្នាទៅវិញទៅមកឃើញថា ការងារអាទិភាពនៃភាគីទាំងពីរ គឺមានភាពស៊ីចង្វាក់គ្នា។ ក្នុងន័យនេះ យូអិនឌីភី ប្ដេជ្ញាថា នឹងស្វែងរកលទ្ធភាពដើម្បីជួយគាំទ្រដល់ការងារអទិភាពទាំង៥ របស់ក្រសួងកិច្ចការនារីឱ្យកាន់តែមានភាពមុតស្រួចនិងមានភាពពេញលេញ»។
ទាក់ទងរឿងនេះ លោកស្រី អេង ចាន់ឌី នាយិកាអង្គការយេនឌ័រ និងអភិវឌ្ឍន៍ដើម្បីកម្ពុជា បានឱ្យដឹងនៅថ្ងៃទី១៩ ខែតុលាថា គោលការណ៍អាទិភាពទាំងនេះ គឺវាមានភាពស៊ីចង្វាក់គ្នាជាមួយគោលនយោបាយជាតិ ស្ដីពីការលើកកម្ពស់សិទ្ធអំណាចរបស់ស្ត្រី ក៏ដូចជាផែនការជាតិស្ដីពីការទប់ស្កាត់អំពើហិង្សាលើស្ដ្រី ដែលក្រសួងកិច្ចការនារីបានដាក់ចេញនេះ ដើម្បីធ្វើឱ្យយូអិនឌីភី បន្តចាប់ដៃគូគ្នាក្នុងការអនុវត្តគោលការណ៍អាទិភាពទាំងនេះ។
យោងតាមសមិទ្ធផលការងាររបស់ក្រសួងកិច្ចការនារីរយៈពេលប្រាំឆ្នាំ ចាប់ពីឆ្នាំ២០១៨-២០២២ បានបង្ហាញថា ស្រ្ដីរងគ្រោះដោយអំពើហិង្សាទាក់ទងយេនឌ័រ មានចំនួន ២.៥៦៣ ករណី បានទទួលសេវាប្រឹក្សាយោបល់ ផ្នែកច្បាប់ ផ្លូវចិត្ត អន្តរាគមន៍ និងតាមដានការប្រកាសសាលក្រម ដោយផ្ទាល់ និងតាម
រយៈអនឡាញ ផ្ដល់ដោយក្រសួងកិច្ចការនារី និងអង្គការដៃគូ៕
ដោយ៖ ជា សុខនី
