ភ្នំពេញ៖​មន្រ្តីជាន់ខ្ពស់នៃ​អាជ្ញាធរជាតិប្រយុទ្ធប្រឆាំងគ្រឿងញៀន និងមន្រ្តីនៃ​​ក្រសួងប្រៃសណីយ៍និងទូរគមនា​គមន៍បាន​អំពាវនាវ ​ក៏ដូចជាណែនាំ​ឱ្យ​មន្រ្តីពាក់ព័ន្ធទាំងអស់​មានការ​យកចិត្តទុកដាក់លើការងារប្រយុទ្ធនឹងជំងឺអេដស៍ និងបញ្ហាគ្រឿងញៀន។

មន្ទីរ​ប្រៃ​សណីយ៍និងទូរគមនាគមន៍ខេត្តស្ទឹងត្រែងនាថ្ងៃទី​១៩ ខែតុលា ឆ្នាំ​២០២៣បាន​រៀបចំ​សិក្ខាសាលាស្តីពី ការចូលរួមបញ្ចប់ជំងឺអេដស៍នៅកម្ពុជាឆ្នាំ២០២៥ និងទប់ស្កាត់ការប្រើប្រាស់ ជួញដូរ ចរា​ចរណ៍គ្រឿងញៀនតាមបញ្ញើប្រៃសណីយ៍» ដោយមានការ​​ចូលរួមពីមន្រ្តីនៃ​​មន្ទីរនេះ​ ​ចំនួនប្រាំ រួមមាន ខេត្តស្ទឹងត្រែង មណ្ឌលគិរី រតនគិរី ព្រះវិហារ និងខេត្តក្រចេះ ព្រមទាំងសាខាប្រតិបត្តិករផងដែរ។

ប្រភពហ្វេសប៊ុកក្រសួងប្រៃសណីយ៍បានបញ្ជាក់ថា ​ឯកឧត្តម ខាយ ឃុនហេង រដ្ឋលេខាធិការ និងជាប្រធានគណៈកម្មាធិការប្រយុទ្ធនឹងជំងឺអេដស៍ នៃ​ក្រសួងប្រៃ​សណីយ៍និងទូរគមនាគមន៍ បានថ្លែងថា​​ ​សិក្ខាសាលានេះ​​ជា​ការ​​ផ្សព្វផ្សាយ និងលើកទឹកចិត្ត​ឱ្យមន្រ្តី​ពាក់ព័ន្ធ បង្កើនការគាំទ្រចូលរួមបញ្ចប់អេដស៍ឱ្យបាននៅឆ្នាំ២០២៥។ការចូលរួម​ទប់ស្កាត់ការចរាចរណ៍គ្រឿងញៀនតាមបញ្ញើប្រៃសណីយ៍ សំដៅឆ្លើយតបតាមផែនការ និងទិសដៅក្នុងការទប់ស្កាត់ការឆ្លងជំងឺអេដស៍និងការប្រើប្រាស់គ្រឿងញៀនរបស់រាជរដ្ឋាភិបាលផងដែរ​។​

ឯកឧត្តមមានប្រសាសន៍ថា ៖ «​សិក្ខាកាមដែលបានចូលរួមនាពេលនេះ​ គឺជាសកម្មជន ជាចលករ ចូលរួមបញ្ច​ប់ជំងឺអេដស៍ និងទប់ស្កាត់ការប្រើប្រាស់ ជួញដូរ និងចរាចរណ៍គ្រឿងញៀន ក្នុងការត្រួតពិនិត្យ និងរឹតប​ន្តឹងការទទួលកញ្ចប់បញ្ញើ ដែលក្រុមហ៊ុនរបស់ខ្លួនកំពុងតែបម្រើសេវាលើបញ្ញើប្រៃសណីយ៍ផងដែរ​»​។​

​ដោយឡែក យោងតាម​អាជ្ញាធរ​ជា​តិប្រយុទ្ធប្រឆាំងគ្រឿងញៀន​នៅថ្ងៃដដែល​ ​លោក ថោង សុគន្ធា​ អគ្គលេខាធិការរនៃអគ្គលេខាធិការដ្ឋានអាជ្ញាធរ​ជា​តិប្រយុទ្ធប្រឆាំងគ្រឿងញៀន ក៏បាន​លើកឡើងដែរ​ថា អ្នកប្រើគ្រឿងញៀនដោយចាក់គ្រឿងញៀននៅតែជាក្រុមគោលដៅប្រឈមខ្ពស់នឹងមេរោគអេដស៍ ជំងឺអេដស៍។ លោក ថោង សុគន្ធា ថ្លែងដូចនេះ​ក្នុងសិក្ខាសាលាពិគ្រោះយោបល់ស្តីពីការរៀបចំផែនការយុ​ទ្ធសាស្ត្រជាតិទូលំទូលាយ និងពហុវិស័យឆ្លើយតបនឹងមេរោគអេដស៍ និងជំងឺអេដស៍លើកទី ៦​(២០២៤-២០២៨)។

សូមបញ្ជាក់ផងដែរថា ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ដ្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន នាសប្តាហ៍មុន បានចេញគោលការណ៍ណែ​នាំ សម្រាប់ចាត់តាំងអនុវត្តការងារ ប្រយុទ្ធប្រឆាំ​ងគ្រឿ​ងញៀន នៅទូទាំងប្រទេស៕​

ដោយ៖ នាង សុគន្ធា