គែរ៖ អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឱ្យមាន «សកម្មភាពដើម្បីបញ្ចប់សុបិន្ត ដ៏សែនអាក្រក់» នៅក្នុងតំបន់ហ្គាហ្សា ជាការអំពាវនាវ អំឡុងកិច្ចប្រជុំកំពូលសន្តិភាពអន្តរជាតិ នៅក្នុងទីក្រុងគែរ ប្រទេសអេហ្ស៊ីប។

នៅក្នុងកិច្ចប្រជុំកំពូលសន្តិភាពអន្តរជាតិ កាលពីថ្ងៃសៅរ៍ ចុងសប្តាហ៍នេះ ដែលផ្តោតលើ បទឈប់បាញ់ និងមនុស្សធម៌ ជុំវិញសង្គ្រាមអ៊ីស្រាអែល-ក្រុមភេរវករហាម៉ាស អគ្គលេខាធិការអង្គការសហប្រជាជាតិ លោក Antonio Guterres បានទាមទារឱ្យ ចាត់វិធានការដើម្បីបញ្ចប់ នូវអ្វីដែលលោកហៅថា «សុបិន្ត ដ៏សែនអាក្រក់នេះ»។

ថ្លែងទៅកាន់កិច្ចប្រជុំកំពូលដើម្បីសន្តិភាព ខណៈដែលជម្លោះបានឈានចូលដល់សប្តាហ៍ទី ៣ នោះ លោក Guterres បាននិយាយថា ប្រជាជនប៉ាឡេស្ទីនប្រមាណ ២លាន៤សែននាក់កំពុងរស់នៅ ក្នុង«គ្រោះមហន្តរាយ មនុស្សធម៌» ស្របពេលដែលមនុស្សរាប់ពាន់នាក់បានស្លាប់ និងជាងមួយលាននាក់បានផ្លាស់ទីលំនៅ ខណៈដែលគោលដៅវាយប្រហាររបស់អ៊ីស្រាអែល គឺនៅ Gaza Strip ។

លោក Guterres បានប្រាប់កិច្ចប្រជុំ ដែលមានវត្តមានចូលរួម ពីសំណាក់មេដឹកនាំនៃប្រទេសអេហ្ស៊ីប អ៊ីរ៉ាក់ ហ្ស៊កដានី និងអេមីរ៉ាត់ អារ៉ាប់រួម ក៏ដូចជា ប្រទេសអ៊ីតាលី និងអេស្បាញ និងប៉ាឡេស្ទីនថា «យើងជួបគ្នា នៅក្នុងបេះដូងនៃតំបន់ ដែលកំពុងតែវិលវល់ក្នុងការឈឺចាប់ និងមួយជំហាន ពីជ្រោះ» ។

គួរបញ្ជាក់ថា ចាប់តាំងពីការវាយប្រហាររបស់ពួកហាម៉ាស់ មកលើអ៊ីស្រាអែល កាលពីថ្ងៃទី ៧ ខែតុលា ដែលបានសម្លាប់មនុស្ស ១៤០០ នាក់មក អ៊ីស្រាអែលបានបើកការបំផ្លិចបំផ្លាញតាមអាកាស និងទម្លាក់គ្រាប់បែកលើដី នៅតំបន់ហ្គាហ្សា។ អាជ្ញាធរហាម៉ាស់និយាយថា មនុស្ស៤.៣៨៥នាក់បានស្លាប់ អំឡុងការវាយប្រហារបស់អ៊ីស្រាអែល៕ ប្រភពពី The Times Of Israel ប្រែសម្រួល៖ សារ៉ាត