បាតុករប្រមាណ ១០ម៉ឺនាក់ ចូលរួមដង្ហែក្បួនគាំទ្រប៉ាឡេស្ទីនពាសពេញរាជធានីនៃប្រទេសអង់គ្លេស
ភ្នំពេញ៖កាលពីថ្ងៃទី២២ ខែតុលា មនុស្សប្រហែល ១០ម៉ឺននាក់បានប្រមូលផ្តុំគ្នាបាតុកម្មគាំទ្រប៉ាឡេស្ទីននៅកណ្តាលទីក្រុងឡុងដ៍ ប្រទេសអង់គ្លេស ដោយបានដើរឆ្លងកាត់ពាសពេញទីក្រុងដើម្បីទាមទារឱ្យមានបទឈប់បាញ់ភ្លាមៗនៅក្នុងតំបន់ហ្គាហ្សា ក្រោយការវាយប្រហាររបស់ក្រុមហាម៉ាស់លើអ៊ីស្រាអែល ដែលបានផ្ទុះឡើងកាលពីពីរសប្តាហ៍មុន។
ក្រុមបាតុករបានដើរ និងស្រែកថា «ដោះលែងប៉ាឡេស្ទីន» ដោយកាន់បដា និងគ្រវីទង់ជាតិប៉ាឡេស្ទីន។ ដំបូងឡើយក្រុមអ្នកតវ៉ាត្រឹមតែធ្វើដំណើរឆ្លងកាត់ទីក្រុងឡុងដ៍ប៉ុណ្ណោះលុះក្រោយមកពួកគេបានប្រមូលផ្តុំគ្នានៅឯផ្លូវ Downing ដែលជាតំបន់លំនៅដ្ឋានផ្លូវការ និងការិយាល័យរបស់នាយករដ្ឋមន្ត្រីអង់គ្លេស លោក Rishi Sunak។
បាតុករស្ត្រីម្នាក់ សុំមិនបញ្ចេញឈ្មោះបានប្រាប់ទីភ្នាក់ងារព័ត៌មានរ៉យទ័រថា ៖ «ក្នុងនាមជាជនជាតិប៉ាឡេស្ទីនដែលចង់ត្រឡប់ទៅផ្ទះវិញនៅថ្ងៃណាមួយ ក្នុងនាមជាជនជាតិប៉ាឡេស្ទីនដែលមានបងប្អូនប្រុសស្រី និងក្រុមគ្រួសារនៅហ្គាហ្សា ខ្ញុំប្រាថ្នាថាយើងអាចធ្វើអ្វីបានច្រើនជាងនេះ ប៉ុន្តែការតវ៉ាគឺជាជម្រើសតែមួយគត់ដែលយើងអាចធ្វើបាននៅពេលនេះ»។
ក្នុងដំណើរនៃការតវ៉ានេះទៀតសោធ បាតុករបានស្រែកខ្លាំងៗ និងកាន់បដាជាច្រើនដែលមានពាក្យស្លោកប្រឆាំងអ៊ីស្រាអែល ខណៈមានបាតុករម្នាក់បានកាន់បដាដែលមានរូបភាពរបស់លោក Sunak នាយករដ្ឋមន្ត្រីអង់គ្លេស ប្រធានាធិបតីសហរដ្ឋអាមេរិក Joe Biden និងនាយករដ្ឋមន្ត្រីអ៊ីស្រាអែល Benjamin Netanyahu ជាមួយនឹងពាក្យថា «ប្រមាញ់ឧក្រិដ្ឋកម្មសង្គ្រាម»។
បាតុកម្មនេះមិនត្រូវបានហាមឃាត់ដោយរដ្ឋាភិបាលអង់គ្លេសនោះទេ ក៏ប៉ុន្តែមុនការហែក្បួនតវ៉ា ក្រុមប៉ូលិសអង់គ្លេសក៏បានព្រមានដែរថា នរណាម្នាក់ដែលបង្ហាញការគាំទ្រដល់ក្រុមហាម៉ាស ត្រូវចាត់ទុកជាភេរវករក្នុងប្រទេសអង់គ្លេសដោយពួកគេអាចប្រឈមមុខនឹងការចាប់ខ្លួន ហើយទង្វើឧក្រិដ្ឋកម្មបែបស្អប់ខ្ពើមចំពោះជាតិសាសន៍ណាមួយនឹងមិនត្រូវបានអត់ឱនឡើយ។
ប៉ុន្មានម៉ោងក្រោយពីការហែក្បួនតវ៉ា ប៉ូលិសអង់គ្លេសបានឱ្យដឹងថា ការបាតុកម្មប្រព្រឹត្តទៅដោយរលូន មិនមានអំពើហិង្សានោះទេ ខណៈមានបាតុករត្រឹម ១០ នាក់ប៉ុណ្ណោះត្រូវបានឃាត់ខ្លួន៕
ប្រែសម្រួល៖ស្រ៊ុន សិរីវឌ្ឍនៈ
