អាមេរិក៖សហរដ្ឋអាមេរិកកាលពីថ្ងៃទី២១ ខែតុលា បានស្នើឡើងនូវសេចក្តីព្រាងសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ(អ.ស.ប)​ដែលមានខ្លឹមសារថា អ៊ីស្រាអែលមានសិទ្ធិក្នុងការការពារបូរណភាពទឹកដីរបស់​ខ្លួន និងទាមទារឱ្យអ៊ីរ៉ង់​បញ្ឈប់​ការនាំចេញអាវុធទៅកាន់ក្រុមភេរវករដែលគំរាមកំហែង​ដល់សន្តិភាព និងសន្តិសុខនៅទូទាំងតំបន់។​

បើតាមទីភ្នាក់ងារសារព័ត៌មានរ៉យទ័រឱ្យដឹងថា សេចក្ដីព្រាងសម្រេចនោះបាន​អំពាវនាវឱ្យមានការ​កា​រ​ពារ​ជនស៊ីវិល រួមទាំងមនុស្សគ្រប់គ្នាដែលកំពុងស្វះស្វែងរកទីសុវត្ថិភាព​និងបានកត់សម្គាល់ថា​រដ្ឋត្រូវតែគោរពតាមច្បាប់អន្តរជាតិក្នុងការឆ្លើយតបទៅនឹងការវាយប្រហារលក្ខណៈភេរវកម្ម និងជាពិសេសបន្តស​កម្មភាពនាំជំនួយមនុស្សធម៌ទៅកាន់តំបន់កាហ្សា។​

ប៉ុន្តែយ៉ាងណា រហូតមកដល់ពេលនេះ គេនៅមិនទាន់ដឹងច្បាស់ទេថា ពេលណាសហរដ្ឋអាមេរិកដាក់ សេ​ចក្ដីព្រាងនេះទៅជាការបោះឆ្នោតសម្រេច។ ក្នុងករណីនេះ ដើម្បីអនុម័តនូវដំណោះ​ស្រាយ​ខាងលើ គេត្រូវការសំឡេងគាំទ្រយ៉ាងតិចប្រាំបួន ចេញពីសមាជិកអ.ស.ប ដោយមិន​រាប់បញ្ចូល​សំឡេងរបស់រុស្ស៊ី ចិន សហរដ្ឋអាមេរិក បារាំង ឬអង់គ្លេសនោះទេ។​

ចំណាត់ការរបស់សហរដ្ឋអាមេរិកនាពេលនេះផងដែរកើតឡើងបន្ទាប់ពីខ្លួនបដិសេធមិនទទួលស្គាល់ សេចក្ដី​ព្រាងសម្រេចមួយរបស់ប្រេស៊ីលដែលអំពាវនាវឱ្យមានការផ្អាកសកម្មភាព​មនុស្សធម៌នៅក្នុង​ជម្លោះរវាងអ៊ីស្រាអែល និងក្រុមសកម្មប្រយុទ្ធហាម៉ាសប៉ាឡេស្ទីន។​

ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោកស្រី Linda Thomas-Greenfield បាននិយាយថា ដំណោះស្រាយដែលរៀបចំឡើងដោយអ្នកការទូតប្រេស៊ីល គឺមិនអាចទទួលយក​បានទេ ព្រោះ​វាមិនបាននិយាយ​ពីសិទ្ធិការពារខ្លួនរបស់អ៊ីស្រាអែលឡើយ។ចក្រភពអង់គ្លេសក៏បានបដិសេធដោ​យ​និយាយថាដំណោះស្រាយនេះខ្វះការលើកឡើងពីវិធីដែលក្រុមហាម៉ាសកំពុងប្រើប្រជាជនប៉ាឡេស្ទីនស្លូតត្រង់ជាខែលការពារពួកគេ។

គួរបញ្ជាក់ថា ស្ថានភាពសង្គ្រាម​គិតត្រឹមថ្ងៃទី២២ ខែ​តុលា​ ​គឺឈានដល់ដំណាក់កាលដែល​អ៊ីស្រាអែលប្រើប្រាស់ការវាយប្រហារតាមផ្លូវអាកាស​ ខណៈដែលការវាយប្រហារបែប​នេះគឺកម្រមានណាស់។​​មិន​ត្រឹមតែប៉ុណ្ណោះអ៊ីស្រាអែលនៅតែបន្ត​ការទម្លាក់គ្រាប់បែករបស់ខ្លួនទៅលើតំបន់​ហ្គាហ្សាពេញ​មួយយប់ រួមទាំងការវាយប្រហារទៅលើមជ្ឈមណ្ឌលលក់ទំនិញ និងហាងកាហ្វេដ៏ពេញ​និយមនៅតំបន់ហ្គាហ្សា។​

បើតាមទីភ្នាក់ងារសារព័ត៌មាន Aljazeera បានឱ្យដឹងថា ជនជាតិប៉ាឡេស្ទីនយ៉ាងហោចណាស់ ៤ ៣៨៥ នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែលលើតំបន់​កាហ្សា​ចាប់តាំងពីថ្ងៃទី ៧ ខែតុលាមក។ ជនជាតិអ៊ីស្រាអែលជាង ១,៤០០ នាក់ទៀតក៏ត្រូវបានសម្លាប់ ដែលភាគច្រើនបំផុត គឺនៅក្នុងអំឡុងពេលការវាយប្រហាររបស់ក្រុមហាម៉ាសនៅភាគខាង​ត្បូងអ៊ីស្រាអែលកាលពីថ្ងៃទី៧ ខែតុលា កន្លងទៅ​៕

​​ប្រែសម្រួល៖កែវ បុស្បា