កង់បេរ៉ា៖នៅថ្ងៃអាទិត្យ​ទី២២ ខែតុលា​ នាយករដ្ឋមន្ត្រីអូស្ត្រាលីលោក Anthony Albanese បាននិយាយ​ថា លោកនឹ​ង​ធ្វើដំណើរទស្សនកិច្ចទៅកាន់ប្រទេសចិននៅថ្ងៃទី៤ រហូត​ដល់ថ្ងៃទី ៧ ខែវិច្ឆិកាខាងមុខ​ ដើម្បីជួបជា​មួយ​ប្រធានាធិបតីចិនលោក ស៊ី ជីនភីង (Xi Jinping) និងនាយករដ្ឋមន្ត្រី លោក លី ឈាង (Li Qiang) ក្នុងគោលបំណងដើម្បីរក្សាស្ថិរភាព​ទំនាក់​ទំនង​​​រវាងប្រទេសទាំងពីរ។

នេះជាលើកទី១ហើយដែល​មេដឹក​នាំអូស្ត្រាលី​ប្រកាសធ្វើដំណើរទៅកាន់ប្រទេសចិនចាប់តាំងពីឆ្នាំ២០​១​៦ មក។​ លោក Anthony Albanese បានចូលកាន់តំណែងក្នុងឆ្នាំ ២០២២ ដោយមានកាតព្វកិច្ច​ចម្បង​គឺពង្រឹងទំនាក់ទំនងឡើងវិញជាមួយដៃគូពាណិជ្ជកម្មដ៏ធំបំផុតរបស់ខ្លួនគឺចិន បន្ទាប់ពីទំនាក់ទំនង​នៃប្រ​ទេ​ស​ទាំង២ ធ្លាក់ក្នុង​សភាពយ៉ាប់យ៉ឺ​ន​ប៉ុន្មានឆ្នាំមកនេះ ដោយសារជម្លោះក្រុមហ៊ុនទូរគមនាគមន៍ ហួវៃ(Huawei) បញ្ហាចារកម្ម និងកូវីដ១៩។​

ថ្លែងពីក្នុងទីក្រុងកង់បេរ៉ា រាជធានីនៃប្រទេសអូស្ត្រាលី លោក Albanese បានឱ្យដឹងថា​នៅក្នុង​ដំណើរ​ទស្សនកិច្ច​នេះ មេដឹកនាំនៃប្រទេសទាំងពីរ នឹងពិភាក្សាអំពីកិច្ចសហប្រតិបត្តិការលើវិស័យដូចជា ទំនាក់ទំ​នង​ សេដ្ឋកិច្ច ការប្រែប្រួលអាកាសធាតុ និងទំនាក់ទំនងរវាងប្រជាជននៃប្រទេសទាំងពីរ។​

ហេតុផលចម្បងមួយនៃដំណើរទស្សនកិច្ចនេះ គឺដោយសារប្រទេសទាំងពីរ បានឈាន​ដល់កិ​ច្ច​ព្រមព្រៀងមួយក្នុងការដោះស្រាយជម្លោះនាំចូលស្រាពីប្រទេសអូស្ត្រាលីទៅកាន់ប្រទេសចិន។​

មុនពេលចិនដាក់ពន្ធធ្ងន់ធ្ងរ ទីផ្សារចិន​គឺជាទីផ្សារនាំ​ចេញ​ដ៏​មានតម្លៃបំផុត​សម្រាប់​អ្នកផលិត​ស្រា​អូស្ត្រាលី ដោយទិន្នន័យពាណិជ្ជកម្មក្នុងឆ្នាំ ២០១៩ បង្ហាញថា​អូស្ត្រាលី​បាននាំចេញ ស្រា​ទៅកាន់ប្រទេស​ចិនក្នុង​រង្វ​ង់ ៨០០ លានដុល្លារក្នុងមួយឆ្នាំ ​ប៉ុន្តែនៅខែតុលាឆ្នាំ២០២០ ការនាំចេញនេះបាន​ធ្លាក់ចុះដល់ដី​ក្រោយ​ពី​​ចិនប្រកាសដាក់ពន្ធលើអូស្រ្តាលីប្រមាណ២១៨ភាគរយ បន្ទាប់ពីប្រទេសនេះបាន​អំពាវនាវ​ឱ្យ​មាន​ការ​ស៊ើបអង្កេត​លើ​ប្រភព​ដើម​នៃ​ជំងឺ​កូវីដ១៩។

មកទល់ពេលនេះ គេឃើញថាការរឹតបន្តឹងពាណិជ្ជកម្មភាគច្រើនត្រូវ​បានដកចេញហើយ​ចាប់​តាំ​ង​​ពី​អូស្ត្រាលីផ្លាស់​ប្តូររដ្ឋាភិបាលថ្មី ក្នុងនោះចិនបានដកការរឹតបន្តឹងលើការនាំចូលធ្យូងថ្ម ឈើ និងស្រូវ​ដែ​លមានតម្លៃរាប់ពាន់លានដុល្លារ ក៏ប៉ុន្តែសម្រាប់ស្រា ​​បង្កង និង​សាច់​មួយ​ចំនួន ចិននៅ​រក្សារឹត​បន្តឹងដដែល​៕​

ប្រែសម្រួល៖ស្រ៊ុន សិរីវឌ្ឍនៈ