ប៉េកាំង៖ប្រទេសចិនកំពុងមើលឃើញស្ថានការណ៍ជម្លោះនៅតំបន់ហ្កាហ្សា(Gaza)ថា ជារឿងដែលធ្ងន់ធ្ងរហើយជម្លោះនេះអា​ចនឹងរីករាលដាលកាន់តែធំទៅៗនៅក្នុងតំបន់មជ្ឈិមបូព៌ា ។យោងតាមបេសកជនចិនពិសេសប្រចាំនៅតំបន់មជ្ឈិមបូព៌ាបានឱ្យដឹងថា ទំហំនៃជម្លោះនេះកំពុងរីករាលដាលនៅក្នុងតំបន់បន្តិចម្ដងៗ។​

ខណៈពេលកំពុងបំពេញទស្សនកិច្ចនៅមជ្ឈិមបូព៌ា ប្រេសិតពិសេសរបស់ចិន លោក ចាយ ជុន (Zhai Jun) បានចង្អុ​ល​បង្ហាញឱ្យឃើញពីជម្លោះនៅព្រំដែនអ៊ីស្រាអែល-លីបង់ និងអ៊ីស្រាអែល-ស៊ីរី និងបាន​សម្តែង​ការ​ព្រួយ​បារម្ភ​អំពី​ស្ថានកា​រណ៍ដ៏​គ្រោះថ្នាក់មួយនេះ។​

លោក ចាយ បាន​ជំរុញ​ឱ្យ​សហគមន៍​អន្តរជាតិ​រក្សា​ការ​ប្រុង​ប្រយ័ត្ន និង​ចាត់​វិធានការ​ឱ្យ​បាន​ឆាប់​រហ័ស។ លោក​បាន​សង្ក​ត់​ធ្ងន់​លើ​សារៈសំខាន់​នៃ​ភាគីពាក់ព័ន្ធទាំងអស់ ក្នុងការចូលរួម​អនុវត្ត​តាម​ច្បាប់​មនុស្សធម៌​អន្តរជាតិ ដើម្បី​ទប់ស្កាត់​វិបត្តិ​មនុស្សធម៌​ ជាពិសេសគឺការខិតខំ​ប្រឹងប្រែង​រួមគ្នា​គ្រប់​គ្រង​ស្ថានការណ៍។​

លោក ចាយ បាននិយាយថា ៖ «ប្រទេសចិនមានឆន្ទៈក្នុងការធ្វើអ្វីគ្រប់យ៉ាងដើម្បីជួយសម្រួលដល់ការសន្ទនា បង្កើតប​ទឈប់បាញ់ និងនាំមកនូវសន្តិភាព ក៏ដូចជាគាំទ្រដំណោះស្រាយរដ្ឋពីរផងដែរ»។​

កាលពីសប្តាហ៍មុន លោក ចាយ បានប្រកាសចាត់ទុកវិបត្តិអ៊ីស្រាអែល-ហ្កាហ្សា ថាជាបញ្ហាខ្វះចន្លោះក្នុងការធានាដល់សិទ្ធិរបស់ក្រុមប៉ាឡេស្ទីន។ នេះជាការលើកឡើងអំឡុងពេលលោកបានជួបជាមួយសមភាគីរុស្ស៊ីក្នុងប្រទេសកាតាដែ​ល​ជាតួអង្គដ៏សំខាន់ដែលកំពុងព្យាយាមសម្រុះសម្រួលភាគីក្នុងជម្លោះ។​

ប្រេសិតពិសេសរបស់ចិនរូបនេះបានបញ្ជាក់ថា ប្រទេសចិននឹងរក្សាទំនាក់ទំនងយ៉ាងយកចិត្តទុកដាក់ជាមួយសហគមន៍អន្តរជាតិ រួមទាំងប្រទេសទាំងអស់នៅតំបន់អារ៉ាប់ផងដែរ។ គួរបញ្ជាក់ថា លោកបានធ្វើដំណើរទៅដល់ប្រទេសអារ៉ាប់រួមនៅថ្ងៃទី២៣ ខែតុលា​ ដើម្បីចូលរួមវេទិកាទំនាក់ទំនងចិន-អារ៉ាប់ លើកទី១០ និងកិច្ចសន្ទនាអរិយធម៌ចិន-អារ៉ាប់ ហើ​យលោកក៏នឹងឡើងថ្លែងសុន្ទរកថាផងដែរ។​

បន្ថែមលើនេះ អ្នកនាំពាក្យក្រសួងការបរទេសលោកស្រី ម៉ៅ និង (Mao Ning) បានលើកឡើងនៅក្នុងសន្និសីទសារព័ត៌មានមួយថា «បេសកជនពិសេសរបស់ចិនមានបំណងបន្តទស្សនកិច្ចទៅកាន់ភាគីពាក់ព័ន្ធនៅមជ្ឈិមបូព៌ា»។ នេះជាការឆ្លើយតបរបស់លោកស្រី នៅពេលត្រូវបានគេសាកសួរអំពីផែនការរបស់លោក ចាយ ក្នុងដំណើរទស្សនកិច្ចទៅកា​ន់ប្រទេសអ៊ីស្រាអែល ឬទឹកដីប៉ាឡេស្ទីន។​

យោងតាមទូរទស្សន៍ CCTV លោក ចាយ កំពុងរៀបចំផែនការធ្វើដំណើរទស្សនកិច្ចទៅកាន់ប្រទេសអារ៉ាប៊ីសាអូឌីត  ហ្ស៊កដានី និងប្រទេសជិតខាងផ្សេងទៀត។ មុនពេលធ្វើដំណើរ លោក ចាយ ក៏បានសន្ទនាតាមទូរសព្ទជាមួយរដ្ឋមន្ត្រីការបរទេសប៉ាឡេស្ទីន អ៊ីស្រាអែល អេហ្ស៊ីប អារ៉ាប៊ីសាអូឌីត អារ៉ាប់រួម និងន័រវែស ព្រមទាំង​តំណាង​ពិសេស​មក​ពី​អង្គការ​សហប្រជាជាតិ និង​សហភាព​អឺរ៉ុបទៀតផង។

ទូរទស្សន៍ CCTV បានដកស្រង់សម្ដីរបស់លោកថា ៖ «ប្រទេសចិនបានផ្តល់ នឹងបន្តផ្តល់ជំនួយមនុស្សធម៌ទៅកាន់តំ​ប​ន់ប៉ាឡេស្ទីន តាមរយៈអង្គការសហប្រជាជាតិ និងដោយផ្ទាល់ពីប្រទេសចិន ដើម្បីជួយសម្រាលវិបត្តិមនុស្សធម៌នៅទីនោះ​»៕

ប្រែសម្រួល៖ធា សុណា

ប្រភពព័ត៌មាន៖ Channel NewsAsia China says outlook worrisome as conflict spreads in Middle East: State media