សេអ៊ូល៖ នៅថ្ងៃទី២៥ ខែតុលា ឆ្នាំ២០២៣ ក្រុមមនុស្សយ៉ាងច្រើនបានចេញអនុវត្តហាត់សមពីវិធីដោះស្រាយ និងការពារខ្លួនពេលកំពុងស្ថិតនៅក្នុងហ្វូងមនុស្សច្រើន ដែលអាចនឹងកើតឡើងនៅថ្ងៃបុណ្យហាឡូវីន (Halloween) ដែលនឹងប្រព្រឹត្តទៅនៅថ្ងៃទី៣១​ ខែតុលា ខាងមុខនេះ។ ការហាត់សមនេះ ដោយពួក​គេ​បាន​រុញ​ច្រាន​គ្នា​ទៅ​វិញ​ទៅ​មក​ក្នុង​ផ្លូវ​តូច​ចង្អៀត និងទាញគ្នាចុះឡើង។

ការចុះសមសម្ដែងនេះធ្វើឡើងដើម្បីតេស្តសាកល្បងទៅលើប្រព័ន្ធថ្មីនៃកាមេរ៉ា CCTV ដែលកំពុងត្រូវបានបង្កើតឡើងក្នុងការប្រើបញ្ញាសិប្បនិម្មិត ចាប់យកសញ្ញាកន្លែងហ្វូងមនុស្សណាដែលមានគ្រោះថ្នាក់ ហើយវានឹងបញ្ចេញសំឡេងប្រកាសអាសន្នប្រាប់ដល់មន្ត្រីសង្គ្រោះបន្ទាន់ ។ក្រុមមន្ត្រីនឹងប្រចាំការនៅមើលលើអេក្រង់ធំៗ ហើយត្រៀមខ្លួនចាត់វិធានការចុះជួយ ក្នុងករណីដែលប្រព័ន្ធបានរកឃើញថាហ្វូងមនុស្សកំពុងមានគ្រោះថ្នាក់។

កិច្ចខិតខំប្រឹងប្រែងនេះធ្វើឡើងបន្ទាប់ពីកូរ៉េខាងត្បូងធ្លាប់មានបទពិសោធសោកនាដកម្ម ដោយហ្វូងមនុស្សដ៏ច្រើនណែនតាន់តាប់ រត់ជាន់គ្នាស្លាប់កាលពីឆ្នាំមុននៅលើផ្លូវតូចចង្អៀតមួយនៅក្នុងកន្លែងកម្សាន្តរាត្រីមួយឈ្មោះថា អ៊ីថេវ៉ុន (Itaewon) បណ្ដាលឱ្យមនុស្សស្លាប់ចំនួន ១៥៩នាក់។ ការស្លាប់នេះត្រូវបានគេរិះគន់ថា មួយផ្នែកគឺបណ្តាលមកពីកង្វះការរៀបចំវិធានការគ្រប់គ្រងហ្វូងមនុស្ស ដោយដំបូងឡើយ មានអ្នកអំពាវនាវសុំជំនួយដែរ ប៉ុន្តែគ្មានការឆ្លើយតប។

ដូច្នេះហើយ នៅឆ្នាំនេះ រដ្ឋាភិបាលក្រុងសេអ៊ូល (Seoul) នឹងធ្វើការជាមួយក្រុមប៉ូលិសជំនាញ ក្រុមសេវាសង្គ្រោះបន្ទាន់ និងក្រុមមន្ត្រីក្នុងតំបន់ ដើម្បីធ្វើការលើរឿងនេះ និងធានាថាគ្មាននរណាម្នាក់រងរបួសក្នុងអំឡុងពេលពិធីបុណ្យហាឡូវីន (Halloween) នោះទេ។ ពួកគេ​នឹង​ប្រើ​បច្ចេកវិទ្យា​ទំនើបៗ​ដើម្បី​តាមដាន​ស្ថានការណ៍​ក្នុង​ពេលវេលា​ជាក់ស្តែង។

ក្រុមមន្ត្រីរដ្ឋាភិបាលកំពុងដំឡើងប្រព័ន្ធកាមេរ៉ា CCTV ថ្មីចំនួន ៩០៩ គ្រឿង ត្រង់ចំណុច ៧១ ទីតាំង។ កាមេរ៉ា CCTV ទាំងអស់នេះនឹងត្រូវបានប្រើប្រាស់ដើម្បីតាមដានហ្វូងមនុស្ស និងជូនដំណឹងដល់អាជ្ញាធរពេលមានសញ្ញាគ្រោះថ្នាក់ ដូចជាមនុស្សច្រើនលើសកំណត់ ឬសកម្មភាពគួរឱ្យសង្ស័យណាមួយ។ អ្នកស្ម័គ្រចិត្តប្រហែលជា ១៥០ នាក់ក៏បានចូលរួមធ្វើតេស្ដសាកល្បងជាមួយប្រព័ន្ធថ្មីនេះផងដែរ។

តំបន់ចំនួន ១៦ ទីតាំងនឹងត្រូវបានត្រួតពិនិត្យដោយក្រុមមន្ត្រីដែលត្រៀមខ្លួនដើម្បីបំបែកហ្វូងមនុស្ស ប្រសិនបើប្រព័ន្ធនេះរកឃើញថាមានមនុស្សបីនាក់ ឬច្រើននាក់ក្នុងមួយម៉ែត្រការ៉េនៅក្នុងតំបន់ណាមួយ។ ​មន្ត្រី​សុវត្ថិភាព​ប្រចាំទីក្រុង លោក អាន់យ៉ុង ជុន (Ahn Hyoung-jun) បាននិយាយថា «ប្រព័ន្ធនេះប្រើប្រាស់កាមេរ៉ា CCTV ដើម្បីវិភាគវីដេអូ និងស្វែងរកហ្វូងមនុស្ស។ ដូច្នេះ វានឹងជួយការពារកុំឱ្យមនុស្សបង្កើតកំហុសដោយឈរប្រជ្រៀតគ្នា»។

អ្នកជំនាញផ្នែកការពារអគ្គិភ័យ និងគ្រោះមហន្តរាយបាននិយាយថា កិច្ចខិតខំប្រឹងប្រែងរបស់រដ្ឋបាលក្រុងក្នុងការទប់ស្កាត់ការកកស្ទះនៃហ្វូងមនុស្សគឺជារឿងវិជ្ជមានមួយ ប៉ុន្តែជាដំបូង គឺសំខាន់ណាស់ក្នុងការទប់ស្កាត់មិនឱ្យមានការប្រមូលផ្តុំច្រើនលើសការកំណត់។ លោក​ក៏​បាន​បញ្ជាក់​ដែរ​ថា ផែនការ​នេះគឺអនុវត្តតែនៅក្នុង​ទីក្រុង​សេអ៊ូល​ប៉ុណ្ណោះ មិន​មែននៅទូទាំង​ប្រទេស​ទាំង​មូល​នោះទេ។

លោកបានផ្ដល់ជាអនុសាសន៍ថា ​រដ្ឋាភិបាលថ្នាក់ជាតិ​គួរតែ​ជា​អ្នក​ទទួលខុសត្រូវ​ក្នុង​ការ​រៀបចំ​ផែនការ​ដោះស្រាយ​បញ្ហា​ហ្វូង​មនុស្សច្រើនណែនតាន់តាប់បែបនេះ ជាជាង​ទុក​​ឱ្យ​រដ្ឋបាល​ក្រុង​និមួយៗ​ដោះស្រាយរៀងៗខ្លួន។ នេះ​ក៏​ព្រោះ​តែ​ការដែលមាន​ហ្វូង​មនុស្សច្រើនណែនតាន់តាប់ អាច​កើត​មានឡើង​នៅ​គ្រប់​ទីកន្លែង ហើយរដ្ឋាភិបាលថ្នាក់ជាតិត្រូវ​ធានា​ថានឹង​មាន​វិធានការការពារ​នៅ​ទូទាំង​ប្រទេស។

រដ្ឋាភិបាលកូរ៉េខាងត្បូងបាននិយាយថា ខ្លួនបានខិតខំបង្កើតប្រព័ន្ធមួយ ដើម្បីការពារកុំឱ្យមានបញ្ហានេះកើតឡើង ប៉ុន្តែប្រព័ន្ធនេះចាំបាច់ត្រូវអនុវត្តឱ្យបានត្រឹមត្រូវ។ គួររំឭកថា រដ្ឋាភិបាលបាន​បដិសេធ​មិន​បណ្តេញ​មន្ត្រី​​ណា​ម្នាក់​ជុំវិញហេតុការណ៍នៅ អ៊ីថេវ៉ុន នោះទេ។

ហេតុការណ៍នៅ អ៊ីថេវ៉ុន បានធ្វើឱ្យ​អាជ្ញាធរនៅប្រទេសផ្សេងៗទៀតមាន​ការ​ភ័យ​ខ្លាចថាវានឹងអាចកើតមានឡើងនៅក្នុងប្រទេសរបស់ពួកគេដែរ។ ជាក់ស្ដែង នៅទីក្រុងតូក្យូ ក្រុមមន្ត្រីកំពុងជំរុញប្រជាជនកុំឱ្យប្រមូលផ្តុំគ្នានៅតំបន់ដើរឆ្លងកាត់ស៊ីប៊ូយ៉ា (Shibuya Scramble Crossing) ដែលជាកន្លែងពេញនិយមសម្រាប់អ្នកចូលចិត្តពិធីបុណ្យហាឡូវីនកាលពីមុនពេលជំងឺរាតត្បាតកូវីដ១៩។

ក្រុមមន្ត្រីរដ្ឋាភិបាលនៅតំបន់ស៊ីប៊ូយ៉ា មានការព្រួយបារម្ភថា ហ្វូងមនុស្សដ៏ច្រើនណែនតាន់តាប់ដូចនៅទីក្រុងសេអ៊ូលកាលពីឆ្នាំមុន អាចនឹងកើតមានឡើងនៅតំបន់ស៊ីប៊ូយ៉ានេះ ក្នុងឱកាសពិធីបុណ្យហាឡូវីនខាងមុខ។ ដើម្បីទប់ស្កាត់បញ្ហានេះ អាជ្ញាធរជប៉ុនបានហាមឃាត់ការផឹកស្រានៅតាមដងផ្លូវនៅថ្ងៃបុណ្យហាឡូវីន និងកំពុងបង្ហោះវីដេអូនៅលើបណ្តាញសង្គមដោយសុំឱ្យមនុស្សនៅឆ្ងាយពីតំបន់ស៊ីប៊ូយ៉ានៅរាត្រីហាឡូវីន៕

ប្រែសម្រួល៖ ធា សុណា

ប្រភពព័ត៌មាន៖ Channel NewsAsia South Korea Halloween crush: Seoul tests crowd safety plan ahead of anniversary