កាហ្សាក់ស្ថាន៖ មនុស្សជាង ៤០ នាក់ស្លាប់ និងបាត់ខ្លួន ក្នុងហេតុការណ៍ភ្លើងឆេះនៅអណ្ដូងរ៉ែ
អាស្តាណា៖ក្រសួងសង្រ្គោះបន្ទាន់កាហ្សាក់ស្ថានបាននិយាយឱ្យដឹងកាលពីថ្ងៃសៅរ៍ថា មនុស្ស ៣២ នាក់បានស្លាប់ និង១៤ នាក់ផ្សេងទៀត នៅតែបន្តបាត់ខ្លួន ក្នុងហេតុការណ៍ភ្លើងឆេះនៅអណ្តូងរ៉ែធ្យូងថ្ម Kostenko នាខេត្តភាគកណ្ដាលរបស់ប្រទេស។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
ក្រុមហ៊ុនប្រតិបត្តិករ ArcelorMittal Temirtau បាននិយាយថា មនុស្ស ២០៦ នាក់ក្នុងចំណោម ២៥២ នាក់ក្នុងអណ្ដូងរ៉ែកើតហេតុ បានជម្លៀសចេញទាន់ពេល បន្ទាប់ពីការផ្ទុះឧស្ម័នមេតាន។ ក្រុមហ៊ុនបន្តថា មនុស្ស ១៨ នាក់ បានរងរបួស ត្រូវការសម្រាកព្យាបាល។
ប្រធានាធិបតីកាហ្សាក់ស្ថាន លោក Kassym-Jomart Tokayev បានចូលរួមរំលែកទុក្ខដល់ក្រុមគ្រួសារជនរងគ្រោះ និងបានប្រកាសថ្ងៃទី ២៩ ខែតុលាថា ជាថ្ងៃកាន់ទុក្ខជាតិ។ លោកថែមទាំងបានបញ្ជាឱ្យគណៈរដ្ឋមន្ត្រីរបស់លោក បញ្ឈប់កិច្ចសហប្រតិបត្តិការវិនិយោគជាមួយជាមួយក្រុមហ៊ុន ArcelorMittal Temirtau ដែលជាក្រុមហ៊ុនខ្សែស្រឡាយរបស់ក្រុមហ៊ុនផលិតដែកមានមូលដ្ឋាននៅទីក្រុងលុចសំបួរ ArcelorMittal។
រីឯក្រុមហ៊ុន ArcelorMittal Temirtau បាននិយាយថា ខ្លួនបានផ្អាកប្រតិបត្តិការអណ្តូងរ៉ែធ្យូងថ្មនេះរយៈពេល ២៤ ម៉ោង ដើម្បីត្រួតពិនិត្យមើលសុវត្ថិភាពឧស្ម័ន។ រដ្ឋាភិបាល និងក្រុមហ៊ុនក៏បានបញ្ជាក់ផងដែរថា ពួកគេកំពុងធ្វើការបញ្ចប់កិច្ចព្រមព្រៀងមួយ ដើម្បីធ្វើជាតូបនីយកម្មក្រុមហ៊ុន ដែលដំណើរការរោងចក្រផលិតដែកដ៏ធំបំផុតរបស់ប្រទេសមួយនេះ។
កាលពីខែមុន ឧបនាយករដ្ឋមន្ត្រីទី១កាហ្សាក់ស្ថាន លោក Roman Sklyar បានប្រាប់អ្នកយកព័ត៌មានថា កាហ្សាក់ស្ថានកំពុងពិភាក្សាជាមួយអ្នកវិនិយោគសក្តានុពល ដែលអាចកាន់កាប់រោងចក្រនេះ។
លោកថា គណៈរដ្ឋមន្ត្រីមិនសប្បាយចិត្តនឹងការបរាជ័យរបស់ក្រុមហ៊ុន ArcelorMittal លើការបំពេញកាតព្វកិច្ចវិនិយោគរបស់ខ្លួន ដំឡើងឧបករណ៍ថ្មីៗ និងធានាសុវត្ថិភាពកម្មករ បន្ទាប់ពីមានឧបទ្ទវហេតុបង្កការស្លាប់ជាបន្តបន្ទាប់។
គួរបញ្ជាក់ថា ក្រុមហ៊ុន ArcelorMittal Temirtau គ្រប់គ្រងអណ្តូងរ៉ែធ្យូងថ្ម និងរ៉ែចំនួន ១៥ នៅកាហ្សាក់ស្ថាន។ កាលពីខែសីហា កម្មកររ៉ែ៤នាក់ បានស្លាប់ក្នុងហេតុការណ៍ភ្លើងឆេះនៅអណ្តូងរ៉ែ Karaganda ដែលគ្រប់គ្រងដោយក្រុមហ៊ុននេះដូចគ្នា៕
ប្រែសម្រួល៖ហួន ឌីណា ប្រភព៖ At least 32 dead, 14 missing after ArcelorMittal mine fire in Kazakhstan
