អាមេរិកផ្អាកការនាំចេញកាំភ្លើងទៅកាន់ប្រទេសថៃនិងប្រទេសផ្សេងទៀតចំនួន៩០ថ្ងៃ
អាមេរិក៖នាយកដ្ឋានពាណិជ្ជកម្មរបស់សហរដ្ឋអាមេរិក បានសម្រេចផ្អាកការនាំចេញសព្វាវុធ (ភាគច្រើនផលិតនៅអាមេរិក) ទៅកាន់ប្រទេសថៃ និងទីផ្សារប្រទេសដទៃទៀតក្នុងរយៈពេល ៩០ថ្ងៃ។ ការផ្អាករយៈពេល ៩០ថ្ងៃរបស់សហរដ្ឋអាមេរិកនាពេលនេះ គឺធ្វើឡើងដើម្បីត្រួតពិនិត្យឡើងវិញ នូវការគាំទ្ររបស់ខ្លួនចំពោះការផ្ដល់សព្វាវុធទៅកាន់ទីផ្សារនានា។
ការពិនិត្យឡើងវិញនេះផងដែរ នឹងធ្វើឡើងជាបន្ទាន់ ដែលអាចឱ្យនាយកដ្ឋានវាយតម្លៃកាន់តែមានប្រសិទ្ធភាព ឈានទៅកាត់បន្ថយហានិភ័យនៃអាវុធដែលត្រូវបានលក់ចេញទៅកាន់ទីផ្សារនានា ជាពិសេសធានាបាននូវការចៀសវាងការរំលោភសិទ្ធិមនុស្ស ឬបង្កសកម្មភាពឧក្រិដ្ឋកម្ម។
វិធានការនេះបានគ្របដណ្ដប់លើទីផ្សារធំៗមួយចំនួនដូចជា ថៃ ប្រេស៊ីល និងប្រទេសហ្គូតេមាឡា ជាដើម ប៉ុន្តែយ៉ាងណា ការផ្អាកនេះមិនរាប់បញ្ចូលនូវអ៊ីស្រាអ៊ែល អ៊ុយក្រែន និងប្រទេសប្រមាណជា ៤០ទៀត ដែលមានកិច្ចព្រមព្រៀងត្រួតពិនិត្យការនាំចេញពហុភាគីនោះទេ។
វិធានការផ្អាកការនាំចេញកាំភ្លើងនេះ វាក៏មានទាក់ទិនផងដែរជាមួយនឹងករណីបាញ់សម្លាប់រង្គាលកាលពីឆ្នាំមុន នៅពេលដែលអតីតប៉ូលិសម្នាក់ បានបាញ់សម្លាប់មនុស្ស៣៥នាក់ ក្នុងនោះមានក្មេង២២នាក់។
ការស៊ើបអង្កេតបានបង្ហាញថា កាំភ្លើងម៉ាក The Sig Sauer P365 ដែលត្រូវបានប្រើដោយឃាតករ នាពេលនោះ គឺជាកាំភ្លើងដែលផលិត និងនាំចេញពីសហរដ្ឋអាមេរិក។
ការស៊ើបអង្កេតក៏បានលម្អិតផងដែរពីក្រុមហ៊ុន Sig Sauer បានចុះកុងត្រាចំនួន២ ជាមួយ ថៃសម្រាប់ការទិញយកកាំភ្លើងចំនួន ៤០ម៉ឺនដើម ក្នុងគោលដៅទុកឱ្យប៉ូលិស និងមន្ត្រីរដ្ឋាភិបាលផ្សេងទៀតប្រើប្រាស់។
សូមបញ្ជាក់ថា ប្រទេសថៃគឺជាទីផ្សារសព្វាវុធដ៏ធំមួយរបស់សហរដ្ឋអាមេរិក បើធៀបនឹងប្រទេសផ្សេង ទៀតទូទាំងពិភពលោក។ ចាប់ពីឆ្នាំ ២០០៥ រហូតដល់ឆ្នាំ ២០២២ ការស៊ើបអង្កេតបានបង្ហាញថា កាំភ្លើងចំនួន ៧៩៥,០០០ ដើមត្រូវបានចេញពីសហរដ្ឋអាមេរិក ទៅកាន់ប្រទេសថៃ។ ដែលចំនួននេះ ស្មើនឹង ២១.៥% នៃទីផ្សារនាំចេញទូទាំងពិភពលោក។
ដោយឡែក កាលពីពីរទសវត្សរ៍មុន សហរដ្ឋអាមេរិកបានលក់កាំភ្លើងក្នុងចំនួនតិចតួចប៉ុណ្ណោះទៅកាន់ទីផ្សារអន្តរជាតិ ប៉ុន្តែយ៉ាងណា ក្រោយក្រុមហ៊ុនផលិតក្នុងស្រុក បានបង្វែរទីផ្សារថ្មី ការលក់អាវុធបែបយោធាបានកើនឡើងយ៉ាងឆាប់រហ័ស ដោយការលក់សរុបបានកើនឡើងច្រើនជាង ៣.៧លានអាវុធ ចាប់ពីឆ្នាំ ២០០៥មក៕
ប្រែសម្រួល៖កែវ បុស្បា
