ភ្នំពេញ៖ រដ្ឋាភិបាលគម្រោងចំណាយថវិកាជាតិឆ្នាំ២០២៤ ទំហំ ១០ ២៥៤ ៩៦៧ លានរៀល ឬប្រមាណជាង ២ ៥០០ លានដុល្លារអាមេរិក សម្រាប់ការបើក និងដំឡើងប្រាក់បៀវត្សដល់មន្ត្រីរាជការ និងកងកម្លាំងប្រដាប់អាវុធ។

ឯកឧត្តម ប៉ែន បូណា មន្រ្តី​អ្នកនាំពាក្យរាជ​រដ្ឋាភិបាលកម្ពុជាបាន​ឱ្យដឹងថា រដ្ឋាភិបាលថ្មីតែងគិតគូរការដំឡើងប្រាក់ខែជូនមន្ត្រីទោះ​​បីស្ថានភាពពិភពលោកមិនមានភាពអំណោយផល និងកំពុងរងគ្រោះក្តី។ ក្នុងនោះ​រដ្ឋក៏​មានផែនការដំឡើងប្រា​ក់បៀវត្សមូលដ្ឋានដល់មន្ត្រី និងកងកម្លាំងចំនួន ៥ភាគរយផងដែរ​។​

ឯកឧត្តមបានបន្តថា យើងពិនិត្យមើលទៅបច្ចុប្បន្ន ជីវភាពរបស់មន្ត្រីរាជការ កងកម្លាំងប្រដាប់អាវុធ គ្រូបង្រៀនជាដើមមានជីវភាពសមរម្យមួយ ហើយចំនួនអ្នកដែលចង់ចូលបម្រើការជាមន្ត្រីរាជការក៏មានចំនួនកាន់តែច្រើនផងដែរ ទាំងក្មេងទាំងចាស់សម្រុកមកដាក់ពាក្យប្រឡងធ្វើមន្ត្រីរាជការ ខុសពីមុនឆ្ងាយណាស់។

ឯកឧត្តមបានសង្កត់ធ្ងន់ថាចំនួនអ្នកចង់បម្រើការងារក្របខ័ណ្ឌមន្ត្រីរាជការដ៏ច្រើនលើសលប់នៅពេលបច្ចុប្បន្ន សបញ្ជាក់ពីតម្លៃនៃមន្ត្រីរាជការ និងកត្តាជីវភាពរបស់មន្ត្រីដ៏សមរម្យមួយ ដែលកើតចេញពីការខិតខំ និងយកចិត្តទុកដាក់របស់រដ្ឋាភិបាលដែលធ្វើយ៉ាងណាដើម្បីឱ្យមន្ត្រីមានជីវភាពសមរម្យ។

យោងតាមខ្លឹមសារសង្ខេបនៃសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៤ ដែលផ្ស​ព្វផ្សាយដោយក្រសួងសេដ្ឋកិច្ច និងហិរញ្ញវត្ថុ ចុះ​ថ្ងៃទី២៧ ខែតុលា ឆ្នាំ២០២៣បាន​បញ្ជាក់ថា រដ្ឋាភិបាលគ្រោ​ងចំណាយថវិកាជាតិសរុបចំនួន ៣៧ ១១០ ៤០៤ លានរៀល ដែលស្មើនឹងចំនួន ២៩,៩៦ភាគរយ នៃសមាមាត្រផលិតផលក្នុងស្រុកសុប(ផ.ស.ស.)ដែលថយចុះជាងច្បាប់ថវិកា​ឆ្នាំ២០២៣ចំនួន ៥,៣ភាគរយ។ ​

សេចក្តីព្រាងច្បាប់ស្តីពីហិរញ្ញវត្ថុបន្ត​ថា សម្រាប់ថវិកាថ្នាក់ជាតិដែលត្រូវចំណាយនៅឆ្នាំ២០២៤ មានរង្វង់ ៣៤ ៤៩៧ ៤៤៤លានរៀល ស្មើនឹងអត្រា ២៤,១៣ភាគរយ នៃផ.ស.ស. និងចំណាយចំនួន ៤ ៣៣១ ៨៧១ លានរៀល ទៅលើគម្រោងចំណាយថ្នាក់ក្រោមជាតិ ដែលស្មើនឹងអត្រា ៣,០៣ភាគរយ នៃផ.ស.ស.។​

ក្នុងនោះដែរគម្រោងចំណាយទៅលើបន្ទុកបុគ្គលិករដ្ឋ ឬប្រាក់បៀវត្សមន្ត្រីរាជការ និងកងកម្លាំងប្រដាប់អាវុធស្ថិតក្នុងរង្វង់ ១០ ២៥៤ ៩៦៧លានរៀល ឬស្មើប្រមាណ ២,៥ ពាន់លានដុល្លារអាមេរិក បែកចែងជា ៣ផ្នែកក្នុងនោះមាន (ទី១) ​ការជ្រើសរើសមន្ត្រីក្របខ័ណ្ឌថ្មី ជំនួសអ្នកចូលនិវត្តន៍, (ទី២) ការដំឡើងបៀវត្សជូនមន្ត្រីរាជការ និង(ទី៣) ការដំឡើងប្រាក់បំណាច់មុខងារ។​

សេចក្តីព្រាងច្បាប់ដដែលលើកឡើងថា រដ្ឋមានគោលបំណងបន្តអនុវត្តគោលនយោបាយដំឡើងប្រាក់បៀវត្សអប្បបរមាជូនមន្ត្រីរាជការ ប្រាក់បៀវត្សមូលដ្ឋានមូលដ្ឋានមន្ត្រីរាជការ និងកម្លាំងប្រដាប់អាវុធនៅឆ្នាំ២០​២៤ ខាងមុខ ក្នុងរង្វង់អត្រា ៥ភាគរយ។

ក្នុងន័យនេះ រដ្ឋនឹងផ្តល់បន្ថែមជូន ២២ ៥០០ រៀល សម្រាប់មន្រ្តីរាជការស៊ីវិលដែលមានប្រាក់បំណាច់មុខងារក្នុងកម្រិតចាប់ពី ១ ១៣០ ០០០រៀល ចុះក្រោម និងបន្ថែមជូន ២០ ០០០ រៀល សម្រាប់មន្រ្តីរាជការដែលមានប្រាក់បំណាច់មុខងារក្នុងកម្រិតចាប់ពី ១ ១៣០ ១០០រៀល ឡើងទៅ។​

​​ប្រភពដដែល​បន្តថា ផ្តល់បន្ថែមជូន ២៥ ០០០ រៀល សម្រាប់មន្រ្តីនគរបាលជាតិ និងយោធិន ដែលមានប្រា​ក់បំណាច់មុខងារ ក្នុងកម្រិតចាប់ពី ៩៦០ ០០០ រៀល ចុះក្រោម និងបន្ថែមជូន ២០ ០០០ រៀល ស​ម្រាប់មន្រ្តីនគរបាលជាតិ និងយោធិន ដែលមានប្រាក់បំណាច់មុខងារក្នុងកម្រិតចាប់ពី ៩៦០ ១០០ រៀល ឡើ​ងទៅ។​ចំណែកមន្រ្តីជាប់កិច្ចសន្យា ក៏នឹងត្រូវបានដំឡើងពី ៧១ ម៉ឺនរៀល ទៅដល់ ៧៧ ម៉ឺនរៀលផងដែរ។​

ពាក់ព័ន្ធនឹងបញ្ហានេះ លោក ហុង វណ្ណៈ អ្នកជំនាញផ្នែកសេដ្ឋកិច្ចនៃរាជបណ្ឌិត្យសភាកម្ពុជា ក៏បាន​លើកឡើងដែរ​ថា បើមើលទៅតួលេខគ្រោងដំឡើងប្រាក់ខែមន្ត្រីរាជការ និងកងកម្លាំងរង្វង់ ៥% នៅឆ្នាំ២០២៤ ។លោកបន្តថា  ការដំឡើងនេះ ក៏ជាផ្នែកមួយអាចជំរុញសេដ្ឋកិច្ចជាងផងដែរ ព្រោះមន្ត្រីនឹងចំណាយប្រាក់ខែខ្លួនបន្ថែមទៅលើចំណាយចរន្ត ពោលគឺការចាយវាយប្រចាំថ្ងៃ ដែលជួយជំរុញសកម្មភាពសេដ្ឋកិច្ច។​

លោក ហុង វណ្ណៈ បាន​ថ្លែងថា  ការគិតគូរដំឡើងប្រាក់បៀរវត្សជូនមន្ត្រីរាជការរបស់រដ្ឋាភិបាលថ្មីនេះ ជារឿងល្អ មិនខុសពីរដ្ឋាភិបាលមុននោះដែរ ហើយនឹងជំរុញកំណើនសេដ្ឋកិច្ច ដោយសារកាលណាមនុស្សមានលុយកាន់តែច្រើន នឹងចំណាយកាន់តែច្រើន មនុស្សកាន់តែចំណាយច្រើន ចរន្តសេដ្ឋកិច្ចកាន់តែរស់រវើក បង្កើនការលក់រាយ-ដុំ​ និងកំណើនទំហំវិនិយោគ​។​

សូមជម្រាប​ថា កាលពីឆ្នាំ២០២២ រដ្ឋាភិបាលមានទិសដៅចំណាយលើប្រាក់ខែបុគ្គលិករដ្ឋ មន្ត្រីរាជការ គ្រូ​បង្រៀន កងកម្លាំងប្រដាប់អាវុធក្នុងទំហំជាង ៩ ៥៥៥ ០០០ លានរៀល ឬប្រមាណ ២ ២៩៥ លានដុល្លារ ​នៅក្នុងឆ្នាំ២០២៣ ក៏ដូចជាការដំឡើងប្រាក់បៀរវត្សផងដែរ ខណៈប្រាក់ខែជាអប្បបរមា ១,១​លានរៀល ដំឡើងឱ្យដល់ជាង ១,៣លានរៀល ខណៈមន្រ្តីជាប់កិច្ចសន្យាដំឡើងដល់ ៧​១ម៉ឺនរៀល ៕

ដោយ៖សំបាន ច័ន្ទដារ៉ា