ទូក «ង» ជាង ៣០០ ទូក នឹងចូលរួមប្រណាំងក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុកនាខែវិច្ឆិកា
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានមានប្រសាសន៍ថា មានទូក ង ប្រមាណជាង ៣០០ ទូក នឹងចូលរួមប្រណាំងក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដើម្បីអបអរសាទរនៃពិធីបុណ្យនេះ និងបង្កលក្ខណៈសប្បាយរីករាយជូនប្រជាពលរដ្ឋដែលនឹងប្រព្រឹត្តឡើង ចាប់ពីថ្ងៃទី២៦-២៧ និងទី២៨ ខែវិច្ឆិកា ឆ្នាំ២០២៣ខាងមុខនេះ។
សម្ដេចធិបតី ហ៊ុន ម៉ាណែត បានថ្លែងដូចនេះ នៅក្នុងពិធីជួបសំណេះសំណាលជាមួយបងប្អូនកម្មករនិយោជិត ជិត២ម៉ឺនាក់ នៅតាមបណ្តារោងចក្រ សហគ្រាស ដែលមានមូលដ្ឋានក្នុងខណ្ឌមានជ័យ និងខណ្ឌពោធិ៍សែនជ័យ រាជធានីភ្នំពេញ កាលពីថ្ងៃទី២៨ ខែតុលា។
សម្ដេចធិបតីបានមានប្រសាសន៍ថា នៅបន្តិចទៀត យើងមានពិធីបុណ្យអុំទូក ហើយឥឡូវមានទូកចូលរួម ៣០០ ទូកហើយ។ ពាក់ព័ន្ធនឹងការឧបត្ថម្ភចំណុះទូកនេះដែរ ក៏នឹងមានការចូលរួមពីរូបខ្ញុំ, ពីសម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងថ្នាក់ដឹកនាំមួយចំនួនទៀតផងដែរ ។
ជាមួយគ្នានេះសម្ដេចធិបតីនាយករដ្ឋមន្ត្រីក៏បានអំពាវនាវដល់ប្រជាពលដ្ឋ និងកម្មករ កម្មការិនី ចូលរួមសប្បាយរីករាយនៅក្នុងឱកាសព្រះរាជពិធីបុណ្យអុំទូកខាងមុខនេះដែរ ព្រោះកម្ពុជាខកខានសប្បាយរីករាយកាលពីសង្គ្រាមស៊ីវិលក្នុងទសវត្សរ៍ឆ្នាំ៧០ និងអំឡុងពេលនៃការរីករាលដាលកូវីដ១៩ជាដើម។
សូមរម្លឹកដែរថា ថ្លែងក្នុងពិធីសំណេះសំណាលជាមួយកម្មករកម្មការិនី នៅខេត្តពោធិ៍សាត់ កាលពីចុងខែមិថុនា ឆ្នាំ២០២៣ កន្លងទៅសម្ដេចតេជោ ហ៊ុន សែន អតីតនាយករដ្ឋមន្ត្រីកម្ពុជា ធ្លាប់បានប្រកាសថា នៅក្នុងឆ្នាំនេះ រាជរដ្ឋាភិបាលនឹងរៀបចំព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុកដ៏ធំ នៅរាជធានីភ្នំពេញ រួមនឹងពិធីបុណ្យឯករាជ្យជាតិផងដែរ ដើម្បីអបអរខួបលើកទី ៧០ ឆ្នាំ នៃបុណ្យឯករាជ្យជាតិនេះ។
សូមបញ្ជាក់ដែរថា នៅតាមបណ្តាខេត្តមួយចំនួន បាននិងកំពុងរៀបចំពិធីប្រណាំងទូកងផងដែរ ។ក្នុងនោះមាន ខេត្តកណ្តាល សៀមរាប បាត់ដំបង និងខេត្តព្រៃវែងជាដើម ដោយមានប្រជាពលរដ្ឋ ភ្ញៀវជាតិ និងអន្តរជាតិចូលរួមទស្សនា និងអបអរសាទរជាច្រើនកុះករផងដែរ៕
ដោយ៖គឹម យុត្ថារ៉ូ
