ប៉េកាំង៖ រដ្ឋមន្ត្រីការបរទេសចិនលោក វ៉ាង យី បានលើកឡើងថា ដំណើរឆ្ពោះទៅរកជំនួបរវាងប្រធានាធិបតី ស៊ី ជីនពីង (Xi Jinping) និងលោកប្រធានាធិបតីអាមេរិក ចូ បៃដិន (Joe Biden) នឹងមិនអាចទៅរួចដោយងាយស្រួលនោះទេ ។នេះបើយោងតាមក្រសួងការបរទេសចិន ចេញផ្សាយកាលពីថ្ងៃអាទិត្យ។ លោក វ៉ាង បានបន្ថែមថា ភាគីទាំងពីរចាំបាច់ត្រូវសហការគ្នាដើម្បីសម្រេចបានលទ្ធផលជាវិជ្ជមាន។

លោក វ៉ាង បានជួបជាមួយលោក បៃដិន រដ្ឋមន្ត្រីការបរទេសអាមេរិក លោក អាន់តូនី ប្លិងកិន (Antony Blinken) និងទីប្រឹក្សាសន្តិសុខជាតិ លោក ចេក ស៊ូលីវ៉ាន (Jake Sullivan) ក្នុងអំឡុងដំណើរទស្សនកិច្ចរយៈពេលបីថ្ងៃទៅកាន់ទីក្រុងវ៉ាស៊ីនតោនចាប់ពីថ្ងៃទី២៦ ដល់ថ្ងៃទី២៨ ខែតុលា។ ភាគីទាំងពីរបានព្រមព្រៀងគ្នារៀបចំកិច្ចប្រជុំមួយនៅក្នុងកិច្ចប្រជុំកំពូលនៃវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅទីក្រុងសាន់ហ្វ្រាន់ស៊ីស្កូ ក្នុងខែវិច្ឆិកាខាងមុខនេះ។

នៅក្នុងសេចក្តីថ្លែងការណ៍មួយរបស់ក្រសួងការបរទេសចិនស្ដីពីកិច្ចពិភាក្សាជាមួយសហគមន៍យុទ្ធសាស្រ្តរបស់សហរដ្ឋអាមេរិក លោក វ៉ាង បានលើកឡើងថា ផ្លូវទៅកាន់កិច្ចប្រជុំទ្វេភាគីនឹងមិនងាយស្រួល ហើយយវាក៏មិនអាចនឹងកើតឡើងដោយស្វ័យប្រវត្តិនោះទេ។

គួរដឹងដែរថា ដំណើរទស្សនកិច្ចរយៈពេលបីថ្ងៃរបស់លោក វ៉ាង នៅទីក្រុងវ៉ាស៊ីនតោន បានធ្វើឡើងស្របពេលដែលភាពតានតឹងកំពុងកើនឡើង។ ភាពតានតឹងទាំងនេះគឺទាក់ទងទៅនឹងការគ្រប់គ្រងការនាំចេញរបស់សហរដ្ឋអាមេរិកលើបច្ចេកវិទ្យាទំនើបៗ និងសកម្មភាពពង្រីកឥទ្ធិពលរបស់ចិននៅតំបន់សមុទ្រចិនខាងកើត និងខាងត្បូង។

សេចក្តីថ្លែងការណ៍ដដែលនោះបានកត់សម្គាល់ថា ខណៈដែលមានបញ្ហាជាច្រើនដែលមិនទាន់បានដោះស្រាយ ភាគីទាំងពីរជឿថា វាពិតជាមានសារៈសំខាន់ និងចាំបាច់ខ្លាំងណាស់សម្រាប់សហរដ្ឋអាមេរិក និងចិន បន្តជួបពិភាក្សាគ្នា។

កិច្ចប្រជុំនេះផងដែរ គឺជាផ្នែកមួយនៃកិច្ចពិភាក្សាសំខាន់ៗជាច្រើនរវាងប្រទេសទាំងពីរ ខណៈដែលភាគីទាំងពីរកំពុងព្យាយាមធ្វើឱ្យប្រសើរឡើងនូវទំនាក់ទំនងការទូត ជាពិសេសពាក់ព័ន្ធនឹងជម្លោះនៅអ៊ុយក្រែន និងអ៊ីស្រាអែល។

យោងតាមសេចក្តីថ្លែងការណ៍របស់ក្រសួងការបរទេស លោក វ៉ាង បានលើកឡើងពីសារៈសំខាន់នៃជំនួបរវាងលោក បៃដិន និង លោក ស៊ី នៅឯកោះបាលី ប្រទេសឥណ្ឌូណេស៊ី អំឡុងពេលកិច្ចប្រជុំកំពូល G20 កាលពីឆ្នាំមុន។ ក្នុងជំនួបនោះ មេដឹកនាំទាំងពីរបានពិភាក្សាគ្នាអំពីបញ្ហាតៃវ៉ាន់ ភាពតានតឹងពាណិជ្ជកម្មរវាងសហរដ្ឋអាមេរិក និងចិន និងកិច្ចសហប្រតិបត្តិការលើការប្រែប្រួលអាកាសធាតុ សុខភាព និងសន្តិសុខស្បៀងជាដើម។

លោក វ៉ាង ក៏បានសង្កត់ធ្ងន់ទៅលើការជៀសវាងនូវការជ្រៀតជ្រែករឿងផ្ទៃក្នុង ដោះស្រាយបញ្ហាប្រឈម កសាងកិច្ចព្រមព្រៀងដើម្បីសម្រេចបាននូវវឌ្ឍនភាព។ លើសពីនេះ លោក វ៉ាង និងលោក បៃដិន ក៏បានជជែកអំពីការផ្លាស់ប្តូរផ្នែកយោធា ហិរញ្ញវត្ថុ បច្ចេកវិទ្យា និងវប្បធម៌ និងកិច្ចសហប្រតិបត្តិការរវាងសហរដ្ឋអាមេរិក និងចិន ក៏ដូចជាវិបត្តិនៅមជ្ឈិមបូព៌ា និងអ៊ុយក្រែនផងដែរ៕ ប្រែសម្រួល៖ ធា សុណា