ហាណូយ៖ លោកប្រធានាធិបតី Vo Van Thuong នឹងចូលរួមកម្មវិធី «សប្តាហ៍មេដឹកនាំសេដ្ឋកិច្ចនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក ហៅកាត់ APEC» នៅទីក្រុង San Francisco សហរដ្ឋអាមេរិក ចាប់ពីថ្ងៃទី ១៤ ដល់ ១៧ ខែវិច្ឆិកា។

ក្រសួងការបរទេសអាមេរិកបានប្រកាស ថ្មីៗនេះថា ការចូលរួមរបស់ លោក Vo Van Thuong នាពេលខាងមុខនេះ គឺធ្វើឡើង តបតាមការអញ្ជើញរបស់ប្រធានាធិបតីសហរដ្ឋអាមេរិក លោក Joe Biden ហើយវត្តមានរបស់ប្រធានធិបតីវៀតណាម នៅអាមេរិក នាពេលនោះ ក៏នឹងមានកម្មវិធីជួបពិភាក្សាផ្តោតលើទំនាក់ទំនងទ្វេភាគី រវាងអាមេរិក និងវៀតណាមផងដែរ។

ដំណើរបេសកកម្មរបស់ប្រធានាធិបតីវៀតណាមនៅអាមេរិក ត្រូវបានគ្រោងរៀបចំឡើង បន្ទាប់ពីរយៈពេលពីរខែ ដែលវៀតណាម និងសហរដ្ឋអាមេរិកបានធ្វើឱ្យប្រសើរឡើងនូវទំនាក់ទំនងការទូតទ្វេភាគី ទៅជាភាពជាដៃគូយុទ្ធសាស្ត្រលើគ្រប់ជ្រុងជ្រោយ ក្នុងអំឡុងដំណើរទស្សនកិច្ចរបស់លោកប្រធានាធិបតី Joe Biden ទៅកាន់ទីក្រុងហាណូយ។

សហរដ្ឋអាមេរិកគ្រោងធ្វើជាម្ចាស់ផ្ទះ រៀបចំកិច្ចប្រជុំ APEC ឆ្នាំ២០២៣នេះ ក្រោមប្រធានបទ «បង្កើតអនាគតដែលធន់ និងនិរន្តរភាពសម្រាប់ទាំងអស់គ្នា»៕ ប្រភពពី AFP ប្រែសម្រួល៖ សារ៉ាត