ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៣ ឈានដល់ថ្ងៃទី២
ភ្នំពេញ៖ ក្រោយពីខកខានរយៈពេលបីឆ្នាំព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក បានប្រារព្ធធ្វើឡើងវិញដោយបានឈានដល់ថ្ងៃទី២ហើយនៅថ្ងៃទី ២៧ ខែវិច្ឆិកាឆ្នាំ២០២៣ ដែលមានប្រជាពលរដ្ឋយ៉ាងច្រើនកុះករចូលរួមទស្សនាកម្សាន្តយ៉ាងសប្បាយរីករាយ ដោយមានទាំងទេសចរជាតិ និងអន្តរជាតិ។
សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជាបានសរសេរលើបណ្ដាញសង្គមតេឡេក្រាមផ្លូវការរបស់សម្ដេចនៅថ្ងៃទី២៧ ខែវិច្ឆិកាថា ៖ «អបអរសាទរថ្ងៃទី២ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក»។
សម្ដេចបានលើកឡើងថា ក្រោយពីខកខានប្រារព្ធព្រះរាជពិធីបុណ្យអុំទូក អស់រយៈពេលបីឆ្នាំមក ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០២៣ បានប្រារព្ធធ្វើឡើងវិញ រយៈពេល៣ថ្ងៃ គឺចាប់ពីថ្ងៃទី២៦ដល់២៨ ខែវិច្ឆិកា ឆ្នាំ២០២៣ ស្ថិតក្នុងបរិយាកាសសប្បាយរីករាយក្រោមម្លប់នៃសុខសន្តិភាព។
សូមជម្រាបថាព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០២៣នេះ មានទូកង ចូលរួមប្រកួតប្រជែងប្រមាណ ៣៣៨ទូក និងមានប្រទីបរបស់បណ្តាក្រសួងស្ថាប័ននានា ចំនួន៣០ប្រទីប។
នាព្រះរាជពិធីបុណ្យអុំទូកថ្ងៃទី១ កាលពីថ្ងៃទី២៦ ខែវិច្ឆិកា មានវត្តមានប្រជាពលរដ្ឋ ភ្ញៀវជាតិ អន្តរជាតិជាច្រើនកុះករមកពីគ្រប់ទិសទីមកកម្សាន្តនៅក្នុងព្រះរាជពិធីបុណ្យ រួមទាំងកីឡាករប្រណាំងទូកប្រកបដោយភាពសប្បាយរីករាយ។
អតីតនាយករដ្ឋមន្រ្តីនៃកម្ពុជាសម្ដេចតេជោ ហ៊ុន សែន បានលើកឡើងតាមរយៈហ្វេសប៊ុករបស់សម្ដេចនារសៀលថ្ងៃទី២៦ ខែវិច្ឆិកាដែរថា ទន្ទឹមនឹងការកម្សាន្តសប្បាយរីករាយ របស់ប្រជាពលរដ្ឋនៅក្នុងទីក្រុងភ្នំពេញ ប្រជាពលរដ្ឋនៅតាមបណ្ដាខេត្តទូទាំងប្រទេស ក៏ទទួលបាននូវភាពរីករាយតាមរយៈព្រះរាជពិធីបុណ្យនេះ ក្រោមម្លប់សុខសន្តិភាពផងដែរ។
សម្ដេចតេជោ ហ៊ុន សែន បានបញ្ជាក់ថា៖ «ប្រទេសជាតិយើងមានសុខសន្តិភាពពេញលេញ ទើបយើងអាចប្រារព្ធពិធីបុណ្យជាតិធំបែបនេះបាន»៕
ដោយ៖នាង សុគន្ធា
