ឯកឧត្តមទេសរដ្ឋមន្រ្តី លី ធុជ ទទួលបានពានរង្វាន់ភាពជាអ្នកដឹកនាំគំរូក្នុងវិស័យសកម្មភាពមីន
ភ្នំពេញ៖តំណាងអង្គការស្មារតីនៃអ្នកកីឡា (Spirit of Soccer_SOS) លោក បេន ប៊្រេត(Ben Brett) បានប្រគល់ពានរង្វាន់ភាពជាអ្នកដឹកនាំគំរូក្នុងវិស័យសកម្មភាពមីនដល់ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន ដែលជាការលើកទឹកចិត្តចំពោះសកម្មភាពដ៏ឆ្នើម។
ពិធីប្រគល់ពានរង្វាន់នេះបានធ្វើឡើងនាថ្ងៃទី១២ ខែធ្នូ ឆ្នាំ២០២៣ នៅទីស្នាក់ការអាជ្ញាធរមីន ។លោក Ben Brett បានថ្លែងនាឱកាសនោះថា វាពិតជាបង្ហាញនូវកិត្តិយសណាស់ដែលលោកបានមកទីនេះ ដែលតំណាងឱ្យអង្គការស្មារតីនៃអ្នកកីឡា ដើម្បីប្រគល់ពានរង្វាន់នេះជូនឯកឧត្តម លី ធុច សម្រាប់ការដឹកនាំដ៏ឆ្នើម និងជាជើងឯកពិតប្រាកដក្នុងសកម្មភាពមីន។
លោកបានថ្លែងថា ៖ «ដូចដែលយើងទាំងអស់គ្នាដឹងហើយថា គ្រាប់មីន និងយុទ្ធភ័ណ្ឌមិនទាន់ផ្ទុះ គឺជាការគំរាមកំហែងយ៉ាងធ្ងន់ធ្ងរដល់ការអភិវឌ្ឍន៍សេដ្ឋកិច្ច សុវត្ថិភាព និងសុខុមាលភាពរបស់មនុស្សជុំវិញពិភពលោក។ ពួកគេជាឃាតករដែលបានធ្វើបាប និងសម្លាប់ជនស៊ីវិលស្លូតត្រង់ រួមទាំងកុមារជាច្រើននាក់ដោយមិនរើសអើង»។
លោក Ben Brett បានបន្តថា តាមរយៈការខិតខំប្រឹងប្រែងមិនចេះនឿយហត់របស់ឯកឧត្តម លី ធុជ បានធ្វើឱ្យប្រតិបត្តិករអាចលុបបំបាត់ការគម្រាមកំហែងដោយផ្ទុះទាំងនេះពីសហគមន៍ទូទាំងប្រទេសកម្ពុជា ដោយបានជួយសង្គ្រោះជីវិតមនុស្សរាប់មិនអស់ និងផ្តល់ឱកាសឱ្យប្រជាពលរដ្ឋក្នុងការកសាងសហគមន៍របស់ពួកគេឡើងវិញ ប្រកបដោយសុវត្ថិភាព និងសន្តិសុខ។
លោកមានប្រសាសន៍ថា ៖ «ក្រៅពីការងារក្នុងសកម្មភាពមីន ឯកឧត្តមបណ្ឌិត លី ធុជ ក៏ជាអ្នកគាំទ្រមួយរូបរបស់អង្គការ Spirit of Soccer ក្នុងកម្មវិធីអប់រំកុមារពីគ្រោះថ្នាក់នៃគ្រាប់មីន។ ការប្តេជ្ញាចិត្តរបស់ឯកឧត្តមបណ្ឌិតចំពោះសកម្មភាពមីន និងការគាំទ្រអង្គការ SOS គឺជាសក្ខីភាពបញ្ជាក់ពីចរិតលក្ខណៈ និងការប្តេជ្ញាចិត្តក្នុងការធ្វើឱ្យពិភពលោកកាន់តែល្អប្រសើរ»។
ក្នុងពេលទទួលពានរង្វាន់នោះដែរឯកឧត្តមទេសរដ្ឋមន្រ្តី លី ធុជ បានលើកឡើងដែរថា ពានរង្វាន់ភាពជាអ្នកដឹកនាំគំរូនេះ មិនមែនសម្រាប់តែរូបលោក និងស្ថាប័នអាជ្ញាធរមីនទេ តែវាគឺជាពានរង្វាន់ឆ្លុះបញ្ចាំងពីកិច្ចខិតខំប្រឹងប្រែងក្នុងការបំពេញកាតព្វកិច្ច និងការទទួលបាននូវសមិទ្ធផលរួមគ្នារបស់រដ្ឋាភិបាល ម្ចាស់ជំនួយ ដៃគូរអភិវឌ្ឍ ប្រតិបត្តិករ សប្បុរសជន គ្រប់ភាគីពាក់ព័ន្ធ និងប្រជាពលរដ្ឋកម្ពុជាទាំងអស់ ដែលបានផ្តល់ការគាំទ្រដោយគ្មានលក្ខខណ្ឌដល់សកម្មភាពមីននៅកម្ពុជា។
លោកបានមានប្រសាសន៍ថា ៖ «ពានរង្វាន់នេះ គឺជារង្វាន់កើតចេញពីនយោបាយ ឈ្នះ ឈ្នះ របស់សម្តេចតេជោ ហ៊ុន សែន ដែលបាននាំមកនូវសុខសន្តិភាព និងស្ថិរភាពជូនប្រទេសជាតិ សម្រាប់ធ្វើជាមូលដ្ឋានគ្រឹះនៃសកម្មភាពមីន និងការអភិវឌ្ឍ ហើយជាងនេះទៅទៀត វាកើតចេញពីការតាំងចិត្តយ៉ាងមុះមុតរបស់ សម្តេចនាយករដ្ឋមន្ត្រី ហ៊ុន ម៉ាណែត ក្នុងការបន្តការការពារសន្តិភាព និងស្ថិរភាពរបស់ប្រទេសជាតិ និងដឹកនាំឆ្ពោះទៅរកកម្ពុជាមួយដែលគ្មានមីន»។
បើតាមឯកឧត្តម លី ធុជ ចាប់តាំងពីឆ្នាំ១៩៩៦ អង្គការ SOS បាននិងកំពុងផ្តល់ការអប់រំពីហានិភ័យនៃកិច្ចសង្គ្រោះជីវិតដល់កុមារ និងសហគមន៍នៅក្នុងប្រទេសដែលហែកហួរដោយសង្រ្គាម ឬក្រោយសង្រ្គាម នៅក្នុងប្រទេសជាង ១០ ជុំវិញពិភពលោក ដោយបានអប់រំដោយផ្ទាល់ដល់កុមារជាងមួយលាននាក់ និងបានបណ្តុះបណ្តាលវិជ្ជាជីវៈដល់គ្រូបង្វឹកបាល់ទាត់ជាង ២ ០០០ នាក់។
អង្គការ SOS បានចាប់ផ្តើមបំពេញការងាររបស់ខ្លួននៅប្រទេសកម្ពុជា ក្នុងកម្មវិធីបាល់ទាត់ និងអប់រំការយល់ដឹងអំពីមីន ចាប់តាំងពីឆ្នាំ ២០០៦ ហើយបានបណ្តុះបណ្តាលគ្រូបង្វឹកបាល់ទាត់ចំនួន ១៦៧ នាក់ ក្នុងកម្រិតទទួលស្គាល់ជាអន្តរជាតិ និងបានជួយសង្រ្គោះជីវិតកុមារជាង ៥០០ ០០០ នាក់ រួមទាំងសហគមន៍រងផលប៉ះពាល់ ផងដែរ៕
ដោយ៖នាង សុគន្ធា
