ឧបនាយករដ្ឋមន្រ្តី៖ ក្រសួងដែនដី សហការជាមួយរដ្ឋបាលខេត្តកំពង់ឆ្នាំង បាននិងកំពុងប្រែក្លាយភូមិឋានឱ្យទៅជាបុរីជនបទ
ភ្នំពេញ ៖ក្រសួងដែនដី នគរូបនីយកម្ម និងសំណង់ សហការជាមួយរដ្ឋបាលខេត្តកំពង់ឆ្នាំង បាននិងកំពុងប្រែក្លាយភូមិឋាន ឱ្យទៅជាបុរីជនបទ ស្របតាមប្រសាសន៍របស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ។ នេះជាលើកឡើងរបស់ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដីនគរូបនីយកម្មនិងសំណង់ក្នុងឱកាសអញ្ជើញជាអធិបតី ក្នុងពិធីចាប់ឆ្នោតជ្រើសរើសយកដីឡូត៍លំនៅឋាន និងដីឡូត៍កសិកម្ម នៃកម្មវិធីសម្បទានដីសង្គមកិច្ច នៃគម្រោងបែងចែកដីដើម្បីសង្គមកិច្ច ដំណាក់កាលទី៣ ( LASED lll ) នៅឃុំប្រស្នឹប ស្រុករលាប្អៀរ ខេត្តកំពង់ឆ្នាំង កាលពីព្រឹកថ្ងៃទី១២ ខែធ្នូ ឆ្នាំ២០២៣ ។
ក្នុងឱកាសនេះឯកឧត្តមឧបនាយករដ្ឋមន្រ្តី សាយ សំអាល់ ក៏បានណែនាំដល់បងប្អូនប្រជាពលរដ្ឋ ដែលទទួលបានដីដែលជាគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច នាពេលនេះ ត្រូវប្រែក្លាយឱ្យទៅជាតំបន់កសិកម្ម បង្កបង្កើនផល លើកស្ទួយជីវភាពក្នុងគ្រួសារ ។
ឯកឧត្តមឧបនាយករដ្ឋមន្រ្តី បានបញ្ជាក់ថា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា ក្នុងអាណត្តិទី៧ នីតិកាលទី១ បានដាក់ចេញនូវគោលនយោបាយយុទ្ធសាស្រ្តបញ្ចកោណ ដំណាក់កាលទី១ អាទិភាពរបស់រាជរដ្ឋាភិបាលកម្ពុជា ដោយផ្តោតសំខាន់ជាអាទិ៍រួមមាន ធនធានមនុស្ស ទឹក ភ្លើង ផ្លូវថ្នល់ បច្ចេកវិទ្យា ការបណ្តុះបណ្តាលវិជ្ជាជីវៈ ។ល។
គួរជម្រាបថា តាមរយៈគម្រោង LASED lll រាជរដ្ឋាភិបាល បានសម្រេចផ្តល់ដីឡូត៍លំនៅឋាន និងដីឡូត៍កសិកម្ម ដល់ប្រជាពលរដ្ឋ២៤៩គ្រួសារ ឃុំប្រស្នឹប ស្រុករលាប្អៀរ។ ក្នុងនោះបានយកចិត្តទុកដាក់ក្នុងការកសាងហេដ្ឋារចនាសម្ព័ន្ធ ផ្លូវថ្នល់ ប្រព័ន្ធទឹក-ភ្លើង ងាយស្រួលក្នុងការរស់នៅ និងប្រកបរបរទទួលទាន ។
ប្រជាពលរដ្ឋរស់នៅឃុំប្រស្នឹប ស្រុករលាប្អៀរ ទាំង២៤៩គ្រួសារ ដែលបានចាប់ឆ្នោតទទួលបានយកដីឡូត៍លំនៅឋាន និងដីឡូត៍កសិកម្ម នៃកម្មវិធីសម្បទានដីសង្គមកិច្ច នៃគម្រោងបែងចែកដីដើម្បីសង្គមកិច្ច ដំណាក់កាលទី៣ ( LASED lll ) បានសម្តែងនូវក្តីសប្បាយរីករាយ និងថ្លែងអំណរគុណចំពោះប្រមុខរាជរដ្ឋាភិបាល ដែលបានផ្តល់ដីសម្រាប់ពួកគាត់សាងសង់ផ្ទះរស់នៅបានសមរម្យ និងធ្វើកសិកម្ម ដើម្បីលើកស្ទួយដល់ជីវភាពរស់នៅប្រចាំថ្ងៃ ៕ ដោយ ៖គ្រី សម្បត្តិ
