គីតូ៖ ប្រទេសអេក្វាទ័របានប្រកាសថា ខ្លួននឹងបណ្តេញអ្នកទោសបរទេស ប្រហែល ១៥០០ នាក់ ដែលភាគច្រើន មកពីប្រទេសកូឡុំប៊ី ប៉េរូ និងវ៉េណេស៊ុយអេឡា។ ការបណ្តេញនេះគឺជាផ្នែកមួយនៃផែនការរបស់រដ្ឋាភិបាលក្នុងការកាត់បន្ថយអំពើហិង្សាដែលកំពុងកើនឡើង បង្កឡើងដោយអ្នកទោសជួញដូរគ្រឿងញៀន និងក្រុមឧក្រិដ្ឋជន។

ប្រធានាធិបតីនៃប្រទេសអេក្វាទ័រ លោក Daniel Noboa បានប្រកាស កាលពីថ្ងៃសុក្រ សប្តាហ៍នេះថា «អ្នកដែលមានទោសអនុវត្ត ចាប់ពីប្រាំឆ្នាំ ឬលើសពីនេះ នឹងត្រូវបណ្តេញចេញពីប្រទេសនេះ»។

លោកបានបន្តថា «អ្នកទោសត្រូវបណ្តេញ គឺជាអ្នកទោសបរទេសប្រមាណ ១៥០០ នាក់ ដែលបានមកប្រព្រឹត្តបទឧក្រិដ្ឋ ក្នុងប្រទេស។ ពួកគេមិនមែនជាឧក្រិដ្ឋកម្មសាមញ្ញទេ ពួកគេគឺជាឧក្រិដ្ឋជនប្រព្រឹត្តបទឧក្រិដ្ឋធ្ងន់ធ្ងរ»។

លោក ប្រធានាធិបតីនៃប្រទេសអេក្វាទ័រ បានថ្លែងបែបនេះ នៅក្នុងសន្និសីទសារព័ត៌មានមួយ បន្ទាប់ពីលោកបានដឹកនាំកិច្ចប្រជុំសន្តិសុខ នៅក្នុងទីក្រុង Guayaquil។

យោងតាមជំរឿនពន្ធនាគារឆ្នាំ ២០២២ មានអ្នកទោសបរទេសចំនួន ៣២៤៥ នាក់ ដែលស្មើនឹង ១០% នៃចំនួនអ្នកទោសសរុប នៅក្នុងប្រទេស អេក្វាទ័រ។ ពន្ធនាគារក្នុងប្រទេសនេះ ស្ថិតក្នុងការបារម្ភខ្លាំង ចំពោះអំពើហិង្សា ។ ចាប់តាំងពីខែកុម្ភៈ ឆ្នាំ២០២១ មក មានអ្នកទោស ៤៦០នាក់ បានស្លាប់ អំឡុងការប៉ះទង្គិចគ្នា នៅក្នុងពន្ធនាគារ ជាបន្តបន្ទាប់៕

ប្រភពពី AFP ប្រែសម្រួល៖ សារ៉ាត