ភ្នំពេញ៖សភាយុវពាណិជ្ជករអន្តរជាតិកម្ពុជា ចេស៊ីអាយ (JCI CAMBODIA) និងសហភាពសហព័ន្ធយុវជនកម្ពុជា (ស.ស.យ.ក.) នឹងរៀបចំមហាសន្និបាតតំបន់អាស៊ីនិងប៉ាស៊ីហ្វិកប្រចាំឆ្នាំ២០២៤ ​នៅលើទឹកដីខេត្តសៀ​មរាប រយៈពេលបួនថ្ងៃ ចាប់ពីថ្ងៃទី៦ ដល់ទី​៩ ខែមិថុនា ឆ្នាំ២០២៤ខាងមុខ​។

ថ្លែងក្នុងសន្និសីទសារព័ត៌មាន ស្តីពីការរៀបចំកម្មវិធីមហាសន្និបាតតំបន់អាស៊ី​និងប៉ាស៊ីហ្វីកប្រចាំឆ្នាំ២០​២៤ កាលពីថ្ងៃទី​២៣ ខែធ្នូ លោក ឃឹម ប៊ុនឡែន ប្រធានថ្នាក់ជាតិនៃសភាយុវពាណិជ្ជករអន្តរជាតិកម្ពុជា ​បាន​លើកឡើង​ថា កម្ពុជាបានទទួលសិទ្ធិធ្វើជាម្ចាស់ផ្ទះនៃមហាសន្និបាតតំបន់អាស៊ី និងប៉ាស៊ីហ្វិកប្រចាំឆ្នាំ២០២៤។

លោកបាន​ថ្លែងថា ៖ «រាជរដ្ឋាភិបាលតែងតែផ្តល់ក្តីសង្ឃឹម​ ការគាំទ្រ និងលើកទឹកចិត្ត ទើបយើងមានភាពក្លា​ហានក្នុងការរៀបចំកម្មវិធីនេះ។ ប្រសិនបើប្រទេសជាតិយើងមិនមានសុខសន្តិភាព មិនមានសុវត្ថិភាព ស្ថេរភាពនយោបាយ សេដ្ឋកិច្ចមិនល្អនោះទេ ដាច់ខាតយើងមិនអាចរៀបចំកម្មវិធីនេះទេ។ ខ្ញុំសូមអរគុណរដ្ឋាភិបាល ដែលបានធ្វើរឿងធំៗជាច្រើន ដើម្បីជាកត្តាជំរុញឱ្យ​យើងអាចធ្វើរឿងនេះបាន»។

ក្នុងសន្និសីទ​សារព័ត៌មាននោះដែរ ​កញ្ញា ដែក ដារី ប្រធានគណៈកម្មាធិការរៀបចំមហាសន្និបាតតំបន់អា​ស៊ី​និងប៉ាស៊ីហ្វីកប្រចាំឆ្នាំ២០២៤ បាន​លើកឡើងដែរ​ថា កម្មវិធីមហាសន្និបាតតំបន់អាស៊ីនិងប៉ាស៊ីហ្វិកប្រចាំឆ្នាំ២០២៤ (2024 JCI ASIA-PACIFIC CONFERENCE) នេះ នឹងមានការចូលរួមពីប្រតិភូជាតិ និងអន្តរជាតិ​ជាង៤ ០០០នាក់ ដែល​មកពីបណ្តាប្រទេសក្នុងតំបន់អាស៊ី ដូចជា ជប៉ុន កូរ៉េ ហុងកុង តៃវ៉ាន់ សិង្ហបុរី ឥណ្ឌូនេស៊ី ម៉ាឡេស៊ី ថៃ វៀតណាម និងបណ្តាប្រទេសជាច្រើនផ្សេងទៀតក្នុងពិភពលោក។

កញ្ញាបានបន្តថា កម្មវិធីសំខាន់ៗ ក្នុងមហាសន្និបាតតំបន់អាស៊ីនិងប៉ាស៊ីហ្វីកប្រចាំឆ្នាំ២០២៤នោះមានចំនួន៣ ដែលនឹងកើតឡើង ក្នុងនោះរួមមាន ការផ្គូរផ្គងពាណិជ្ជករក្នុងស្រុក និងក្រៅស្រុក, ការផ្លាស់ប្តូរវប្បធម៌ និងការបណ្តុះបណ្តាលភាពជាអ្នកដឹកនាំ និងជំនាញពាណិជ្ជកម្មផ្សេងៗ។ 

កញ្ញា ដែក ដារី  បានថ្លែងបញ្ជាក់​ថា ៖ «បច្ចុប្បន្ននេះ ក្រុមការងារ បានកំពុងរៀបចំការងារស្នូលសំខាន់ៗ ដើ​ម្បីឱ្យ​ការរៀបចំកម្មវិធីនេះដំណើរការទៅដោយរលូន។​ ក្រុមការងារយើងពិបាក ហត់ ប៉ុន្តែសប្បាយចិត្តក្នុ​ងការធ្វើកិច្ចការទាំងនោះដើម្បីរៀបចំការងារសំខាន់ និងផលិតវិដេអូផ្សព្វផ្សាយពីវប្បធម៌ អរិយធម៌ដ៏ផូរ​ផ​ង់ ពីការរីកចម្រើនឥតឈប់ឈរនៅកម្ពុជា ដើម្បីបង្ហាញពីសក្តានុពលដ៏សំបូរបែបរបស់កម្ពុជា»។

ជាមួយគ្នានោះដែរ JCI Cambodia និងសហភាពសហព័ន្ធយុវជនកម្ពុជា រំពឹងថានឹងជួយបង្កើនសេដ្ឋកិច្ចជាតិ បានប្រមាណជាង៤លានដុល្លារអាមេរិក តាមរយៈការចូលមកទស្សនា និងចូលរួមកម្មវិធីមហាសន្និ​បាតតំបន់អាស៊ីនិងប៉ាស៊ីហ្វិកប្រចាំឆ្នាំ២០២៤ នេះ។

លោក សុខ សប្បាយណា សមាជិកគណៈអចិន្តៃ្រយ៍ នៃគណៈកម្មាធិការកណ្តាល ស.ស.យ.ក. ​ដែល​បានចូ​លរួមសន្និសីទសារព័ត៌មាននេះ បាន​​លើកឡើង​ដោយ​បាន​​បង្ហាញនូវសេចក្តីសោមនស្សរីករាយ ដោយសូមកោតសរសើរ និងអបអរសាទរដល់សភាយុវពាណិជ្ជករអន្តរជាតិកម្ពុជា ដោយទទួលបានឱកាស និងទំនុកចិត្តពីសភាយុវពាណិជ្ជករអន្តរជាតិប្រចាំតំបន់អាស៊ីប៉ាស៊ីហ្វិក ក្នុងការរៀបចំមហាសន្និបាតតំបន់អាស៊ីនិងប៉ាស៊ីហ្វិកប្រចាំឆ្នាំ២០២៤ ​នាទឹកដី​ខេត្តសៀមរាប។

យោងតាម​រយៈកិច្ចសហការនេះ ​ ស.ស.យ.ក. នឹងផ្តល់ឱកាសស្ម័គ្រចិត្តដល់យុវជនចូលរួម បង្ហាញពី​ភាសាបេះដូងសម្រាប់កម្ពុជាផងដែរ​។

​​សូមបញ្ជាក់ដែរថា សន្និបាតអាស៊ីប៉ាស៊ីហ្វិក របស់សភាយុវពាណិជ្ជអន្តរជាតិ ដែល​មានសមាជិកជាង១២០ ប្រទេស ត្រូវបានកំណត់ឱ្យ​រៀបចំមួយឆ្នាំម្តង។ ក្រោយការខិតខំរបស់ក្រុមប្រឹក្សាភិបាល ក៏ដូចជាស​មាជិក សមាជិការបស់សភាយុវពាណិជ្ជករអន្តរជាតិកម្ពុជា រយៈពេលជាង១០ឆ្នាំកន្លងមកនេះ កម្ពុជាត្រូវបា​នជ្រើសរើស​ធ្វើជាម្ចាស់ផ្ទះនៃសន្និបាតអាស៊ីប៉ាស៊ី។

ការទទួលសិទ្ធិធ្វើជាម្ចាស់ផ្ទះនៃសន្និបាតនេះ នឹងធ្វើឱ្យ​កម្ពុជាមានឱកាស ក្នុងការផ្សព្វផ្សាយ តំបន់វប្បធម៌ប្រវត្តិសាស្រ្ដ ទំនៀមទម្លាប់ប្រពៃណី​ឱ្យ​ពិភពលោកបានស្គាល់​កាន់តែច្បាស់៕

ដោយ៖នាង សុគន្ធា