ហាណូយ៖ ឈូងសមុទ្រដ៏ល្បីល្បាញរបស់ប្រទេសវៀតណាម Ha Long កំពុងបាត់បង់ទឹកសមុទ្រមានពណ៌ខៀវដ៏ស្រស់ស្អាតរបស់វា ដោយសារតែការបំពុលបរិស្ថាន និងការអភិវឌ្ឍន៍ហួសហេតុ ដែលបានគំរាមកំហែងដល់ជីវិតសត្វព្រៃ និងរូបភាពដ៏ល្អឥតខ្ចោះរបស់តំបន់នេះ។

គេហទំព័រ UNESCO បានចាត់ទុកឈូងសមុទ្រ Ha Long ជាគោលដៅទេសចរណ៍ដ៏ពេញនិយមបំផុតមួយរបស់វៀតណាម ដែលមានមនុស្សជាង ៧លាននាក់បានទៅលេងទឹកពណ៌ខៀវស្រងាត់ និងកោះថ្មកំបោរដែលមានព្រៃលិចទឹកកាលពីឆ្នាំមុន។

ប៉ុន្តែប្រជាប្រិយភាពរបស់ឆ្នេរសមុទ្រ និងការរីកចម្រើនជាបន្តបន្ទាប់នៃទីក្រុង Ha Long ដែលឥឡូវនេះជាទីតាំងរថយន្តខ្សែកាប សួនកម្សាន្ត សណ្ឋាគារប្រណីត និងលំនៅដ្ឋានថ្មីរាប់ពាន់ខ្នង កំពុងបង្កការបំផ្លាញប្រព័ន្ធអេកូឡូស៊ីរបស់ខ្លួនយ៉ាងធ្ងន់ធ្ងរ។

នៅថ្ងៃព្រហស្បតិ៍សប្តាហ៍នេះ អ្នកទេសចរបានតម្រង់ជួរឡើងជិះយន្តហោះ ដើម្បីធ្វើដំណើរទៅទស្សនាឈូងសមុទ្រ Ha Long ដែលមានកោះរហូតជាង ១,៩០០កោះពីលើអាកាស។

បន្ទាប់ពីការហោះហើរជាច្រើនលើកពីលើឈូងសមុទ្រ Ha Long ភ្ញៀវទេសចរបាននិយាយថា ក្នុងរយៈពេលមួយទសវត្សរ៍កន្លងទៅនេះ ការទប់ស្កាត់ការចោលសំរាមផ្លាស្ទិកចូលទៅក្នុងសមុទ្រ ហាក់មានភាពប្រសើរឡើងយ៉ាងខ្លាំង។ ប៉ុន្តែគាត់ចង់ឃើញពណ៌ទឹកសមុទ្រវិលមកពណ៌ខៀវដូចមុនវិញ៕ ប្រភព៖ AFP ប្រែសម្រួលដោយ៖ ឈឹម ទីណា