(ភ្នំពេញ)៖ ក្នុងឱកាសអនុញាតិឱ្យ ឯកឧត្តម Tino CHRUPALLA ប្រធានក្រុមសភា នៃគណបក្សAfD នៃសហព័ន្ធអាល្លឺម៉ង់ និងសហការី ចូលជួបធ្វើសវនាការ និងពិភាក្សាការងារ នៅវិមានរដ្ឋសភា ព្រឹកថ្ងៃទី៨ ខែមករា ឆ្នាំ២០២៤ ឯកឧត្ដមកិត្តិសេដ្ឋាបណ្ឌិត ជាម យៀប អនុប្រធានទី១រដ្ឋសភា បានថ្លែងអំណរគុណ សភា រដ្ឋាភិបាល និងប្រជាជនអាល្លឺម៉ង់ ដែលផ្តល់ជំនួយជាបន្តបន្ទាប់សម្រាប់ការអភិវឌ្ឍសង្គមសេដ្ឋកិច្ចនៅកម្ពុជាទាំងទ្វេភាគី និងជំនួយដល់អង្គការសង្គមស៊ីវិលនៅកម្ពុជា ។

ឯកឧត្ដមកិត្តិសេដ្ឋាបណ្ឌិត ជាម យៀប បានមានប្រសាសន៍ថា កិច្ចជំនួបនាថ្ងៃនេះ គឺជាសក្ខីភាពបង្ហាញឱ្យឃើញកាន់តែច្បាស់ថែមទៀត អំពីសារៈសំខាន់នៃទំនាក់ទំនង និងកិច្ចសហប្រតិបត្តិការរបស់ស្ថាប័ននីតិប្បញ្ញត្តិនៃប្រទេសទាំងពីរ ដែលមិត្តអាល្លឺម៉ង់ ជាប្រទេសដែលបានជួយគាំទ្រលើការអភិវឌ្ឍន៍គ្រប់បែបយ៉ាងជាយូរអង្វែងមួយនៅកម្ពុជា ដល់ស្ថាប័ននីតិប្បញ្ញត្តិ និងរាជរដ្ឋាភិបាលកម្ពុជា ។

ឯកឧត្ដមកិត្តិសេដ្ឋាបណ្ឌិត បានលើកឡើងពីវឌ្ឍនភាព និងការរីកចម្រើនរបស់កម្ពុជាសព្វថៃ្ង ពិតជាមិនអាចកាត់ផ្តាច់បានពីការរួមវិភាគទានដ៏ថ្លៃថ្លាពីបណ្តាប្រទេសជាមិត្តទាំងក្នុងតំបន់ និងសកលលោក ក្នុងនោះអាល្លឺម៉ង់ ជាប្រទេសមួយដែលបានផ្តល់ជំនួយយ៉ាងច្រើន និងលើច្រើនវិស័យដល់កម្ពុជា។

ឯកឧត្ដមកិត្តិសេដ្ឋាបណ្ឌិត ជាម យៀប បានមានប្រសាសន៍បន្តថា រដ្ឋសភាកម្ពុជា បានបង្កើតក្រុមមិត្តភាពសភា កម្ពុជា-អាល្លឺម៉ង់ នៅគ្រប់នីតិកាល នៃរដ្ឋសភាជាបន្តបន្ទាប់ ហើយកិច្ចសហប្រតិបត្តិការនេះ បាននាំមកនូវទំនាក់ទំនងការទូតសភាទាំងពីរយ៉ាងល្អប្រពៃ ។ ស្ថាប័ននីតិប្បញ្ញត្តិ នៃប្រទេសទាំងពីរបានធ្វើការយ៉ាងសកម្មក្នុងការផ្លាស់ប្តូរបទពិសោធន៍ និងចំណេះដឹងកិច្ចការសភាពីគ្នាទៅវិញទៅមក ហើយសភាកម្ពុជា បានសិក្សារៀនសូត្រជាច្រើន ពីសភាអាល្លឺម៉ងតាមរយៈ ដំណើរទស្សនកិច្ចសិក្សា និងកម្មវិធីផ្សេងៗ។

ឯកឧត្តម Tino CHRUPALLA ប្រធានក្រុមសភានៃគណបក្សAfD នៃសហព័ន្ធអាល្លឺម៉ង់ បានថ្លែងអំណរគុណចំពោះការទទួលស្វាគមន៍ដ៏កក់ក្ដៅ និងសូមឯកភាពចំពោះប្រសាសន៍របស់ ឯកឧត្ដមកិត្តិសេដ្ឋាបណ្ឌិត ជាម យៀប ដែលបានលើកឡើងពីចំណងមិត្តភាព និងកិច្ចសហប្រតិបត្តិការដ៏ល្អរវាងប្រទេសកម្ពុជា និងអាល្លឺម៉ង់ ។

ឯកឧត្តមប្រធានគណៈប្រតិភូសភានៃសហព័ន្ធអាល្លឺម៉ង់ បានកោតសរសើរចំពោះការអភិវឌ្ឍរីកចម្រើនរបស់ប្រទេសកម្ពុជា និងថា កម្ពុជាកំពុងធ្វើដំណើរដ៏ល្អលើវិថី សន្តិភាព ស្ថេរភាព ដើម្បីការអភិវឌ្ឍប្រទេស ។

ឯកឧត្តម Tino CHRUPALLA បានមានប្រសាសន៍ថា ឯកឧត្តមបានដឹងពីតម្រូវការមួយចំនួនរបស់កម្ពុជា ពិសេសលើផ្នែកហេដ្ឋារចនាសម្ព័ន្ធ ដោយ ឯកឧត្ដមនឹងនាំយកបញ្ហាទាំងនេះទៅពិភាក្សាគ្នានៅក្នុងគណៈកម្មការសភាអាល្លឺម៉ង់ ដើម្បីធ្វើយ៉ាងណារកមធ្យោបាយអាចជួយចែករំលែកដល់កម្ពុជា ក៏ដូចជាចូលរួមក្នុងការជួយកសាងធនធានមនុស្សរបស់កម្ពុជា ។

ឯកឧត្តម Tino CHRUPALLA បានថ្លែងអំណរគុណចំពោះសម្ដេចប្រធានរដ្ឋសភាដែលបានអនុញ្ញាតឱ្យឯកឧត្ដម មានជំនួបសវនាការជាមួយឯកឧត្ដមកិត្តិសេដ្ឋាបណ្ឌិតអនុប្រធានទី១ រដ្ឋសភានាពេលនេះ ដោយឯកឧត្ដមបានរៀនសូត្រ និងយល់ដឹងច្រើនពីកម្ពុជា ។

ជាថ្មីម្តងទៀត ឯកឧត្ដមកិត្តិសេដ្ឋាបណ្ឌិត ជាម យៀប បានថ្លែងអំណរគុណ និងវាយតម្លៃខ្ពស់ចំពោះប្រសាសន៍របស់ឯកឧត្ដមប្រធានគណៈប្រតិភូសភាអាល្លឺម៉ង់ ដែលបានឆ្លុះបញ្ចាំងពីវឌ្ឍនភាពនៃទំនាក់ទំនង និងកិច្ចសហប្រតិបត្តិការរវាងប្រទេសយើងទាំងពីរ ដោយសង្ឃឹមថា តម្រូវការរបស់កម្ពុជា នឹងត្រូវបានលើកយកទៅពិភាក្សានៅក្នុងសភាអាល្លឺម៉ង់។

ឯកឧត្ដមកិត្តិសេដ្ឋាបណ្ឌិត ក៏បានស្នើដល់សភា និងរដ្ឋាភិបាលអាល្លឺម៉ង់ សុំឱ្យជួយជំរុញអ្នកវិនិយោគ និងប្រជាជនអាល្លឺម៉ង់ មកបណ្ដាក់ទុននិងធ្វើទេសចរណ៍កម្សាន្ត នៅប្រទេសកម្ពុជា ឱ្យបានកាន់តែច្រើនថែមទៀត ។

ឯកឧត្ដមកិត្តិសេដ្ឋាបណ្ឌិត បានស្នើសុំឱ្យមានការផ្លាស់ប្តូរទស្សនកិច្ចរវាងសភាទាំងពីរ ដើម្បីធ្វើការចែករំលែក និងសិក្សាបទពិសោធន៍ ពីគ្នាទៅវិញទៅមក ព្រមទាំងសូមស្នើ អាល្លឺម៉ង់បន្តជួយគាំទ្រជាជំនួយទ្វេភាគី ដល់កម្ពុជា និងដល់អង្គការសង្គមស៊ីវិល ក៏ដូចជាផ្តល់អាហារូបករណ៍ដល់និស្សិតកម្ពុជាឲ្យបានទៅបន្តការសិក្សានៅអាល្លឺម៉ង់បន្ថែមទៀតផងដែរ៕

ដោយ ហេង សម្បត្តិ