បរទេស៖ ក្រុមផ្តល់ជំនួយដែលកំពុងធ្វើការនៅប្រទេសយេម៉ែន កំពុងព្រមានអំពីការកើនឡើងថ្លៃដឹកជញ្ជូន និងការពន្យារពេលដឹកជញ្ជូន ដោយសារការវាយប្រហារ នៅសមុទ្រក្រហម ដែលបង្កឡើងដោយក្រុមឧទ្ទាមហ៊ូធី ហើយការណ៍នេះគំរាមកំហែងធ្វើឱ្យកាន់តែធ្ងន់ធ្ងរ ដល់វិបត្តិមនុស្សធម៌ដ៏អាក្រក់បំផុតមួយ នៅលើពិភពលោក។

កម្មវិធីស្បៀងអាហារពិភពលោក នៃអង្គការសហប្រជាជាតិ ហៅកាត់ WFP បានចេញផ្សាយរបាយការណ៍ ដែលត្រូវបានផ្សព្វផ្សាយ ថ្មីៗនេះថា មុនពេលមានវិបត្តិសមុទ្រក្រហម ប្រជាជនយេម៉ែនពាក់កណ្តាលទៅហើយដែលត្រូវការជំនួយមនុស្សធម៌ ព្រោះតែជម្លោះប្រដាប់អាវុធ ជាមួយពួកបះបោរហ៊ូធី ដែលបានអូសបន្លាយជាង៤ឆ្នាំមកហើយនោះ។

ថ្មីៗនេះ ការវាយប្រហារលើនាវាពាណិជ្ជកម្មដោយក្រុមហ៊ូធី ពោលគឺចាប់តាំងពីខែវិច្ឆិកា ឆ្នាំ២០២៣មក បានធ្វើឱ្យកាន់តែស្មុគស្មាញ ដល់ប្រទេសនេះ ខណៈដែលក្រុមហ៊ុនដឹកជញ្ជូនប្រឈមនឹងការចំណាយខ្ពស់ នៅពេលពួកគេធ្វើដំណើរជុំវិញទ្វីបអាហ្វ្រិកខាងត្បូង ដើម្បីជៀសវាង តាមផ្លូវសមុទ្រក្រហម។ ក្រុមឧទ្ទាមដែលគេជឿថា គាំទ្រដោយអ៊ីរ៉ង់ បាននិយាយថា យុទ្ធនាការរបស់ពួកគេ ធ្វើឡើងដើម្បីបង្ហាញសាមគ្គីភាពជាមួយប៉ាឡេស្ទីន នៅក្នុងសង្គ្រាមអ៊ីស្រាអែល និងហាម៉ាស។

កម្មវិធីស្បៀងអាហារពិភពលោកអះអាថា ខ្លួនកំពុងមានអារម្មណ៍រួចជាស្រេចនូវផលប៉ះពាល់នៃការកើនឡើងនេះ ដែលបានឃើញផងដែរ នូវការវាយប្រហារតបត របស់សហរដ្ឋអាមេរិក និងចក្រភពអង់គ្លេស ទៅលើគោលដៅយោធារបស់ ក្រុមហ៊ូធី។

របាយការណ៍របស់ទីភ្នាក់ងារមួយនេះបង្ហាញថា ស្ថានភាពសន្តិសុខនៅសមុទ្រក្រហមបន្តកាន់តែយ៉ាប់យ៉ឺនWFP កំពុងប្រឈមមុខនឹងការកើនឡើងថ្លៃដឹកជញ្ជូន ក៏ដូចជា ការពន្យារពេលដឹកជញ្ជូនដែលអាចកើតមាន»។ គេបានបន្តថា ស្ថានភាពសន្តិសុខស្បៀងនឹងកាន់តែយ៉ាប់យ៉ឺនក្នុងរយៈពេលប៉ុន្មានខែខាងមុខនេះ ខណៈដែលយេម៉ែនពឹងផ្អែកលើការនាំចូល ៩០ ភាគរយនៃតម្រូវការអាហារ របស់ខ្លួន។

ការវាយប្រហារនៅសមុទ្រក្រហម ត្រូវបានគេដឹងថា បានដំឡើងថ្លៃធានារ៉ាប់រង សម្រាប់ក្រុមហ៊ុនដឹកជញ្ជូន ដោយបង្ខំឱ្យនាវាវាងផ្លូវ ដែលជាធម្មតា គ្របដណ្តប់ការដឹកជញ្ជូនប្រហែល១២ ភាគរយនៃពាណិជ្ជកម្មតាមសមុទ្រពិភពលោក មួយនេះ។

យោងតាមមូលនិធិរូបិយវត្ថុអន្តរជាតិបានឲ្យដឹងថា ចរាចរណ៍សមុទ្រក្រហមបានធ្លាក់ចុះ យ៉ាងហោចណាស់ ៣០ ភាគរយរួចមកហើយ នៅឆ្នាំនេះ ដោយសារការវាយប្រហារទាំងនេះ៕ ប្រភពពី AFP ប្រែសម្រួល៖ សារ៉ាត