វ៉ាស៊ីងតោន ឌីស៊ី៖ លោកអតីតប្រធានាធិបតី និងជាបេក្ខជនត្រៀមប្រជែងម្តងទៀត ដូណាល់ ត្រាំ បានថ្លែងអបអរសាទរចំពោះ «ការដួលរលំច្បាប់ព្រំដែន»។ លោកបានប្តេជ្ញាថា បើជារដ្ឋបាលរបស់លោកវិញ លោកនឹងដាក់ចេញ «ប្រតិបត្តិការនិរទេស»។

លោក Donald Trump បានអបអរបែបនេះ អំឡុងការប្រមូលផ្តុំក្រុមអ្នកគាំទ្រ របស់លោក នៅរដ្ឋ South Carolina កាលពីថ្ងៃសៅរ៍។

គេបានដឹងថា សេចក្តីព្រាងកញ្ចប់ថវិកា ២០ពាន់លានដុល្លារអាមេរិក មិនទទួលបានការអនុម័តពីសម័យប្រជុំសភា នាសប្តាហ៍នេះ។ ច្បាប់ផ្តោតលើការដោះស្រាយវិបត្តិជនចំណាកស្រុក នៅតាមព្រំដែនអាមេរិក-ម៉ិកស៊ិក។ ដោយគេដឹងថា ជនអន្តោប្រវេសន៍ចេះតែបន្តចូលតាមច្រកព្រំដែនប្រទេសមិចស៊ីក ចូលទៅក្នុងទឹដីអាមេរិក បង្កការឈឺក្បាលខ្លាំង ដល់បណ្តារដ្ឋជាប់ព្រំដែន។

លោក Donald Trump ក៏បានប្តេជ្ញាដែរថា ប្រសិនជាលោកជាប់ឆ្នោត ធ្វើជាប្រធានាធិបតីអាមេរិកឡើងវិញ លោកនឹងអនុវត្ត «ប្រតិបត្តិការនិរទេស» ដ៏ធំ នៅថ្ងៃដំបូង នៅសេតវិមាន អនាគតរបស់លោក។

លោក Trump បានប្រកាសប្រាប់ហ្វូងមនុស្សថា «កុំភ្លេចថា សប្តាហ៍នេះ យើងក៏មានជ័យជម្នះដ៏ធំមួយទៀត ដែលគ្រប់អ្នកអភិរក្សទាំងអស់គ្នា គួរតែប្រារព្ធពិធីអបអរ…ក្រុមទាំងមូលបានធ្វើការងារដ៏អស្ចារ្យ នៅក្នុងសភា យើងបានកំទេចវាហើយ»។

ការអបអរជាមួយនឹងបរាជ័យច្បាប់នេះ បានធ្វើឡើង ស្របពេលដែលលោកហាក់ចង់ប្រឆាំងនឹងប្រធានបទក្តៅ អំពីអន្តោប្រវេសន៍របស់លោកប្រធានាធិបតី ចូ បៃឌិន ខណៈដែលពួកលោកអាចប្រជែងតំណែងប្រធានាធិបតីអាមេរិក នៅខែវិច្ឆិកា ខាងមុខនេះ ម្តងទៀត៕ ប្រភពពី AFP ប្រែសម្រួល៖ សារ៉ាត