(ភ្នំពេញ)៖ គណៈកម្មការប្រដាល់សកលអាជីពកម្ពុជា (CPBC) អមសហព័ន្ធ កីឡាប្រដាល់សកលកម្ពុជា នឹងរៀបចំ កម្មវិធីប្រកួត ប្រដាល់សកលអាជីព នាថ្ងៃទី២៩ ខែកុម្ភៈ ឆ្នាំ២០២៤ វេលាម៉ោង ២:០០ រសៀល នៅពហុកីឡដ្ឋានជាតិ ដែលមានចំនួន ៨គូរ ដោយតម្រូវឱ្យប្រកួត ស្របតាមបទបញ្ជាការប្រកួត និងបទប្បញ្ញត្តិ របស់ក្រុមប្រឹក្សាប្រដាល់ពិភពលោក-WBC។

កម្មវិធីប្រកួតនេះរៀបចំឡើងក្នុងគោលបំណងបំពេញនូវលក្ខខណ្ឌ ដើម្បីសុំចូលជាសមាជិក របស់ស្ថាប័ន ប្រដាល់សកលអាជីពពិភពលោក (World Boxing Council-WBC) ដោយនឹងមានថ្នាក់ ដឹកនាំរបស់ ស្ថាប័ន ប្រដាល់សកលអាជីព WBC មកពី ប្រទេសជប៉ុន មកធ្វើការពិនិត្យ និងវាយតម្លៃ ដោយផ្ទាល់។ អត្ថប្រយោជន៍នៃការចូលជាសមាជិករបស់ក្រុមប្រឹក្សាប្រដាល់ពិភពលោក WBC គឺកីឡាករ កីឡាការិនី ប្រដាល់សកលអាជីពកម្ពុជានឹងមានសិទ្ធិចូលរួមការប្រកួតប្រដាល់សកលអាជីពដែលស្ថិតក្រោមការគ្រប់គ្រង និងរៀបចំឡើងដោយស្ថាប័ន ប្រដាល់សកល អាជីព WBC ៕

ដោយ ៖ ជាវ ចន្ធូ