ប៉ារីស៖ ប៉ម Eiffel Tower ដែលជាគោលដៅទេសចរណ៍ដ៏ល្បីល្បាញមួយរបស់បារាំង និងពិភពលោក ដែលបានបិទអស់រយៈពេល៥ថ្ងៃ ដោយសារបុគ្គលិកធ្វើកូដកម្មនោះ ចាប់បើកដំណើរឡើងវិញនៅថ្ងៃអាទិត្យសប្តាហ៍មុន បន្ទាប់ពីមានកិច្ចព្រមព្រៀងមួយជាមួយសហជីព។

ប៉ម Eiffel Tower បានបិទទ្វារផ្អាកទទួលភ្ញៀវចាប់តាំងពីថ្ងៃចន្ទទី១៩ ខែកុម្ភៈ បន្ទាប់ពីផ្ទុះការតវ៉ាដែលផ្តោតលើតម្លាភាព នៃការគ្រប់គ្រងហិរញ្ញវត្ថុ។ ប្រតិបត្តិករនៃអគារ The Eiffel Tower ហៅកាត់ថា SETE និយាយថា ខ្លួនបានឈានដល់កិច្ចព្រមព្រៀងមួយ ជាមួយសហជីពកាលពីថ្ងៃសៅរ៍សប្តាហ៍មុន ដោយភាគីនានានឹងត្រួតពិនិត្យជាប្រចាំនូវគំរូអាជីវកម្មរបស់ក្រុមហ៊ុន, ការវិនិយោគលើការងារ និងប្រាក់ចំណូល តាមរយៈស្ថាប័នដែលនឹងជួបប្រជុំរៀងរាល់៦ខែម្តង។

ការផ្អាកដំណើរការទីតាំងទេសចរណ៍នេះ គឺជាលើកទី២ហើយក្នុងពេលមិនដល់ពីរខែផង ខណៈដែលបុគ្គលិកបានប្រមូលផ្តុំតវ៉ាក្នុងហេតុផលពាក់ព័ន្ធកត្តាហិរញ្ញវត្ថុរបស់ក្រុមហ៊ុន។ ប៉ម Eiffel Tower ដែលជាកន្លែងដ៏ល្បីល្បាញបំផុតរបស់ទីក្រុងប៉ារីស ដែលបានទាក់ទាញអ្នកទស្សនាប្រមាណជិត៧លាននាក់ក្នុងមួយឆ្នាំ ខណៈជាង៣ភាគ៤នៃភ្ញៀវដែលមកទស្សនា គឺជាជនបរទេស។

ក្នុងអំឡុងពេលជំងឺរាតត្បាតកូវីដ១៩ ចំនួនភ្ញៀវទេសចរណ៍បានធ្លាក់ចុះយ៉ាងខ្លាំង ដោយសារតែការបិទខ្ទប់ និងការរឹតបន្តឹងការធ្វើដំណើរ ក៏ប៉ុន្តែចំនួនភ្ញៀវទេសចរណ៍បានកើនឡើងវិញដល់ ៥.៩លាននាក់កាលពីឆ្នាំ២០២២ ខណៈកាលពីឆ្នាំ២០២៣ បានទាក់ទាញអ្នកទេសចរណ៍ដល់ចំនួន ៦.៣លាននាក់។

បើតាមការប៉ាន់ស្មាន ចំនួនភ្ញៀវទេសចរណ៍ទៅកាន់ទីក្រុងប៉ារីស នឹងកើនឡើងខ្លាំងបន្ថែមទៀតនៅរដូវក្តៅនេះ ខណៈដែលប្រទេសបារាំងទទួលធ្វើជាម្ចាស់ផ្ទះកីឡាអូឡាំពិក ឆ្នាំ២០២៤៕

ប្រភព៖ AFP ប្រែសម្រួលដោយ៖ ឈឹម ទីណា