ផ្តល់កាសឌីជីថលជំនួយការស្តាប់៧០០គ្រឿងដល់កុមារខ្សោយការស្តាប់
អង្គការសុខភាពត្រចៀកនៅកម្ពុជា All Ears Cambodia កំពុងផ្តល់ឧបករណ៍ជំនួយការស្តាប់ ប្រភេទឌីជីថល ចំនួន៧០០ គ្រឿង ដោយមិនគិតថ្លៃ។ កុមារអាយុក្រោម១៨ ឆ្នាំ ដែលមានបញ្ហាខ្សោយការស្តាប់អាចទៅស្នើរសុំកាសត្រចៀកដ៏ទំនើបនេះនៅអង្គការដែលស្ថិតនៅសង្កាត់ចតុមុខនៃរាជធានីភ្នំពេញ។
លោកស្រី រស់ ប៊ុណ្ណារ៉េត ប្រធានអង្គការសុខភាពត្រចៀកនៅកម្ពុជាបានប្រាប់ទូរទស្សន៍អប្សរាថា ឧបករណ៍ជំនួយការស្តាប់ប្រភេទឌីជីថលមានគុណភាពខ្ពស់ ផលិតនៅប្រទេសស្វីស។ វាមានប្រសិទ្ធភាពខ្លាំងដែលអាចជួយឲ្យកុមារស្តាប់លឺល្អ។
ការបាត់បង់ការស្តាប់ អាចកើតមានពីកំណើត ឬអាចកើតឡើងក្នុងវ័យកុមារភាពដែលភាគច្រើនអាចបណ្តាលមកពីការឆ្លងមេរោគអំឡុងពេលមានផ្ទៃពោះ ដូចជាឆ្លងមេរោគស្អូច ជាដើម។ ចំណែកការបាត់បង់ការស្តាប់ក្នុងវ័យកុមារភាពអាចបណ្តាលមកកពីជំងឺឆ្លងចំនួន ដែលបានធ្វើឱ្យប៉ះពាល់ដល់ការស្តាប់របស់កុមារ ដូចជា ជំងឺរលាកស្រោមខួរក្បាល ឬការបង្ករោគនៅក្នុងត្រចៀកដែលកើតឡើងញឹកញាប់ និងរបួសពីប៉ះទង្គិច ជាដើម។
លោកស្រី រស់ ប៊ុណ្ណារ៉េត បានលើកឡើងថា កុមារដែលមានកម្សោយការស្ដាប់ ជះឥទ្ធិពលដល់ការនិយាយ ហើយវាក៏ប៉ះពាល់ផងដែរដល់ការអភិវឌ្ឍ និងសុខុមាលភាពផ្លូវចិត្តរបស់កុមារ។ មិនត្រឹមតែប៉ុណ្ណោះ វាឈានធ្វើឱ្យកុមារ បាត់ឱកាសជាច្រើននៅពេលឈានដល់ពេលពេញវ័យ ដូចជាបាត់ឱកាសការងារ និងការរកប្រាក់ចំណូលជាដើម។ ដូច្នេះ ការព្យាបាលទាន់ពេលវេលាជារឿងសំខាន់បំផុត។
យោងតាមអង្គការសុខភាពពិភពលោក នៅតំបន់អាស៊ីអាគ្នេហ៍វិញ មានប្រជាជនជាង ៤០0លាននាក់បានបាត់បង់ការស្ដាប់ឮ ហើយនៅត្រឹមឆ្នាំ២០៥០ នឹងមានប្រជាជនចំនួន៦៦៦លាននាក់ ប្រឈមនឹងការបាត់បង់ការស្តាប់ឮ។ ជនមានពិការភាពបាត់បង់ការស្ដាប់ឮ ជិត៨០ភាគរយ រស់នៅតាមបណ្តាប្រទេសមានប្រាក់ចំនូលទាប និងប្រាក់ចំនូលមធ្យម ហើយភាគច្រើនបំផុត មិនបានទទួលសេវាកម្មពិនិត្យ និងព្យាបាលឡើយ។ ទិន្និន័យនេះត្រូវបានលើកយកមកបង្ហាញដោយ លោកជំទាវ ជា សិរី ទេសាភិបាលធនាគារជាតិនៃកម្ពុជា និងជា សហស្ថាបនិកមូលនិធិរក្សាកុមារ។ ប៉ុន្តែពុំទាន់តួលេខផ្លូវការណាមួយដែលបង្ហាញពីអត្រាកុមារកម្ពុជាដែលមានបញ្ហាស្តាប់នេះនៅឡើយទេ។
យោងតាមអង្គការសុខភាពត្រចៀកនៅកម្ពុជាដែលមានបេសកម្មជាង២០ឆ្នាំមកហើយនៅកម្ពុជា ឲ្យដឹងថា មានកុមារខ្មែរដែលមានបញ្ហាការស្តាប់មកពិគ្រោះព្យាបាលជាបន្តបន្ទាប់។ អង្គការនេះបានចែកកាសត្រចៀក៧០០គ្រឿងជារៀងរាល់ឆ្នាំ ចាប់តាំងពីឆ្នាំ២០២២ មក៕ ដោយ៖សែន ដាវិត
