បរទេស៖ ប្រទេសម៉ារ៉ុក បានបញ្ជូនជំនួយមនុស្សធម៌ ចំនួន ៤០តោន សម្រាប់តំបន់ហ្គាហ្សា តាមរយៈអាកាសយានដ្ឋានរបស់អ៊ីស្រាអែល ដែលជាវិធីសាស្ត្រផ្តល់ជំនួយថ្មីមួយ សម្រាប់ជនស៊ីវិលប៉ាឡេស្ទីន។

ការធ្វើពិពិធកម្មផ្តល់ជំនួយជាស្បៀងអាហារ ទៅក្នុងទឹកដីហ្គាហ្សាដែលរងគ្រោះពីសង្គ្រាម បែបនេះ ត្រូវបានបញ្ជូនទៅដល់អាកាសយានដ្ឋាន Ben Gurion នៅជិតទីក្រុង Tel Aviv កាលពីថ្ងៃអង្គារ ហើយត្រូវបានបន្តផ្ទេរ ទៅអឌ្ឍចន្ទក្រហមប៉ាឡេស្ទីន នៅឯច្រក Kerem Shalom ភ្ជាប់រវាងអ៊ីស្រាអែល និងហ្គាហ្សា។

ក្រសួងការបរទេសម៉ារ៉ុកបាននិយាយ នៅក្នុងសេចក្តីថ្លែងការណ៍មួយថា ម៉ារ៉ុកគឺជាប្រទេសដំបូងគេដែលដឹកជញ្ជូនជំនួយមនុស្សធម៌របស់ខ្លួន តាមរយៈផ្លូវគោកបែបនេះ ដែលមិនធ្លាប់មានពីមុនមក។

តាំងពីសង្រ្គាម ចាប់ផ្តើម នៅថ្ងៃទី ៧ ខែតុលាមក រថយន្តជំនួយ ជាទូទៅ បានចូល ទៅក្នុង Gaza Strip តាមរយៈច្រកតានតឹង នៅអេហ្ស៊ីប។ ក្រៅពីនេះ ក៏មានការទម្លាក់ជំនួយ តាមយន្តហោះរបស់អាមេរិក និងបណ្តាប្រទេសផ្សេងៗទៀត ព្រមទាំង ទើបតែមានការដឹកជញ្ជូនជំនួយ តាមនាវាពីប្លុកអឺរ៉ុប ទៀតផង នាពេលថ្មីៗនេះ។

ជាមួយគ្នានេះ កាលពីថ្ងៃអង្គារ សហរដ្ឋអាមេរិកបានសាងសង់កំពង់ផែបណ្តោះអាសន្ន នៅលើឆ្នេរសមុទ្រហ្គាហ្សាសម្រាប់ការផ្តល់ជំនួយដល់ជនស៊ីវិលប៉ាឡេស្ទីន។

គិតត្រឹមព្រឹកថ្ងៃពុធនេះ មានមនុស្ស ៣១១៨៤នាក់បានស្លាប់ នៅហ្គាហ្សា ដោយសារតែវាយប្រហារសងសឹករបស់អ៊ីស្រាអែល លើពួកហាម៉ាស់ ភាគច្រើន គឺជាស្ត្រី និងកុមារ នេះបើតាមក្រសួងសុខាភិបាលហ្គាហ្សា គ្រប់គ្រងដោយហាម៉ាស់។ ពួកហាម៉ាស់ប៉ាឡេស្ទីន ដែលបានវាយឆ្មក់ភាគខាងត្បូង ប្រទេសអ៊ីស្រាអែល ស្លាប់មនុស្ស ជាង១ពាន់នាក់ កាលពីថ្ងៃទី៧ ខែតុលា ឆ្នាំ២០២៣៕ ប្រភពពី AFP ប្រែសម្រួល៖ សារ៉ាត