នៅថ្ងៃអង្គារនេះ នាយកប្រតិបត្តិក្រុមហ៊ុន Microsoft របស់អាមេរិកបានសន្យាថា នឹងចំណាយទុនវិនិយោគ ១.៧ ពាន់លានដុល្លារ អភិវឌ្ឍន៍ហេដ្ឋារចនាសម្ព័ន្ធសិប្បនិម្មិត ឬ AI និង Cloud Computing នៅក្នុងប្រទេសឥណ្ឌូនេស៊ី។

បន្ទាប់ពីចូលរូមកិច្ចប្រជុំជាមួយ លោកប្រធានាធិបតីឥណ្ឌូនេស៊ី Joko Widodo នៅទីក្រុងហ្សាកាតា CEO របស់ក្រុមហ៊ុន Microsoft លោក Satya Nadella បានអះអាថា មជ្ឈមណ្ឌល AI និង Cloud Computing នឹងត្រូវសាងសង់ ឆាប់ៗនេះ។

ឥណ្ឌូណេស៊ី ដែលប្រទេសមានសេដ្ឋកិច្ចធំជាងគេ នៅអាស៊ីអាគ្នេយ៍ និងមានប្រជាជនប្រហែល ២៨០ លាននាក់ កំពុងប្រឹងប្រែងសម្របខ្លួនជាមួយនឹងតម្រូវការកាន់តែកើនឡើង នៃមជ្ឈមណ្ឌលទិន្នន័យ និងបច្ចេកវិទ្យា AI នៅក្នុងតំបន់។

លោក Satya Nadella បានអះអាងថា Microsoft ក៏នឹងផ្តល់ការបណ្តុះបណ្តាលលើ AI នេះដល់ប្រជាជនឥណ្ឌូនេស៊ី រាប់ម៉ឺននាក់ផងដែរ។

គួរបញ្ជាក់ថា លោក Nadella កំពុងធ្វើដំណើរទស្សនកិច្ច ក្នុងតំបន់អាស៊ីអាគ្នេយ៍ រួមមានទាំងថៃ និងម៉ាឡេស៊ីផងដែរ ដើម្បីផ្សព្វផ្សាយបច្ចេកវិទ្យា AI របស់ Microsoft៕ ប្រភពពី AFP ប្រែសម្រួល៖ សារ៉ាត