ភ្នំពេញ៖ បុរសវ័យចំណាស់ម្នាក់ស្រវឹងស្រាជោកជាំ បើករថយន្តហាយឡែនឌ័រ ជ្រុលចង្កូតទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យរថយន្តខូចខាតមួយកំណាត់មុខយ៉ាងដំណំ កាលពីម៉ោង១១យប់ ថ្ងៃអង្គារ ទី២ ខែកក្កដា ឆ្នាំ២០១៩ នៅមុខស្ថានទូតជប៉ុន តាមបណ្តោយមហាវិថីព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្តបង្កម៉ាកហាយឡែនឌ័រ ពណ៌ទឹកប្រាក់  ពាក់ស្លាកលេខ  កណ្តាល2A.9828 បើកបរដោយបុរសវ័យចំណាស់ម្នាក់ស្រវឹងស្រាជោកជាំ ធ្វើដំណើរតាមបណ្ដោយមហាវិថីព្រះនរោត្ដម ទិសដៅពីជើងទៅត្បូង ក្នុងល្បឿនយ៉ាងលឿន ក៏ជ្រុលទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យរថយន្តបង្កខូចខាតមួយកំណាត់មុខយ៉ាងដំណំតែម្ដង ចំណែករបាំងថ្មមិនមានបាក់បែកនោះទេ។ ករណីនេះមិនបណ្ដាលឲ្យមនុស្សណាម្នាក់រងរបួសនោះទេ។

ក្រោយពីកើតហេតុសមត្ថកិច្ចមូលដ្ឋាន បានចុះមកដល់ និងទាក់ទងទៅសមត្ថកិច្ចជំនាញចរាចរណ៍ឲ្យមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ រង់ចាំដោះស្រាយតាមផ្លូវច្បាប់៕ម.ន