មណ្ឌលគិរី៖ ប្រជាពលរដ្ឋ២២គ្រួសារ ដែលរស់នៅក្នុងភូមិត្រពាំងផ្អេរ ឃុំស្រែខ្ទុម ឃុំស្រែខ្ទុម ស្រុកកែវសីមា ខេត្តមណ្ឌលគិរី មានការកើតទុក្ខមិនសុខចិត្ត និងបានផ្ដិតមេដៃដាក់ពាក្យបណ្ដឹងទៅកាន់សាលាស្រុកកែវសីមា កាលពីថ្ងៃទី២១ ខែមិថុនា ដើម្បីស្វែងរកកិច្ចអន្តរាគមន៍មួយក្រោយពេលដែលមានប្រជាពលរដ្ឋម្នាក់បានលើកទំនប់ទប់ទឹក បង្កឱ្យមានការជន់លិច ផលដំណាំអស់ជាច្រើនហិកតា។

នៅក្នុងពាក្យបណ្ដឹងប្រជាពលរដ្ឋថា មានប្រជាពលរដ្ឋម្នាក់ឈ្មោះ ស៊ុន សក្កិកាក់ ហៅ ចិ អាយុ៥០ឆ្នាំ មានទីលំនៅ ក្នុងមូលដ្ឋានខាងលើ បានលើកទំនប់ទប់ទឹកអូរធម្មជាតិ កាលពីថ្ងៃទី២០ ខែមិថុនា បង្កឲ្យផលដំណាំ រួមមាន ស្វាយចន្ទី កៅស៊ូ ដូងដំឡូង អំពៅ ស្វាយកែវរមៀត ចំនួន៦ហិកតា និងផ្លូវមួយខ្សែ បានរងនូវការលិចលង់ដោយសារទឹក។

នៅថ្ងៃទី២៤ខែមិថុនានេះ អភិបាលស្រុកកែវសីមា លោក នួន សារ៉ន បានឱ្យដឹងថា ក្រោយទទួលបានពាក្យបណ្ដឹងពីប្រជាពលរដ្ឋ លោកបានបញ្ជាដល់លោកមេឃុំស្រែខ្ទុម ដឹកនាំក្រុមការងារ ចុះទៅពិនិត្យ ទីតាំងកើតហេតុ និងបានធ្វើការសម្របសម្រួលប្រជាពលរដ្ឋដោយសន្តិវិធី។

លោកប៊ុត សំអែល មេឃុំស្រែខ្ទុម បានបញ្ជាក់ថា ក្រុមប្រឹក្សាឃុំស្រែខ្ទុម និងមន្ត្រីរបស់សាលាឃុំ បានចុះទៅពិនិត្យ មូលដ្ឋានជន់លិច នឹងបានឃើញថា ពិតជាមានការជន់លិច ផលដំណាំនៅក្នុងចំការជាង០៦ហិកតាដូចក្នុងពាក្យបណ្តឹងពិតប្រាកដមែន។ លោកថាឈ្មោះ ស៊ុន សក្កិកាក់ ហៅ ចិ នឹងត្រូវកោះហៅសួរនាំនៅសាលាឃុំ ករណីទប់ទឹកអូរធម្មជាតិ នៅថ្ងៃទី២៥ ខែមិថុនាស្អែកនេះ។

សូមជម្រាបថា នៅក្នុងពាក្យបណ្ដឹងរបស់ប្រជាពលរដ្ឋទាំង២២គ្រួសារ បានទាមទារឲ្យ អ្នកទប់ទំនប់ខាងលើ ធ្វើការកាយដីទំនប់ចេញ ដើម្បីឱ្យទឹកហូរ ចេញពីចម្ការដូចសព្វដងឡើងវិញ។ ទោះជាយ៉ាងណា ករណីនេះត្រូវបានអាជ្ញាធរអះអាងថា ពុំទាន់មានផលដំណាំ នៅក្នុងចម្ការដែលជន់លិចនោះ រងការខូចខាតនោះទេ៕ធ.ដ

ដោយៈ សាត ចាន់បុត្រ