ភ្នំពេញ៖ តាមរយៈបណ្ដាញសង្គមនាព្រលប់ថ្ងៃទី៣០កក្កដា ឆ្នាំ២០២៤ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានបង្ហាញវីដេអូពីសកម្មភាពចូលទទួលទានអាហារពេលព្រឹក នៅផ្សារកាបី ស្រុកស្នូល ខេត្តក្រចេះ ។

សម្ដេចធិបតី បានសរសេរលើបណ្ដាញសង្គមភ្ជាប់ជាមួយវីដេអូនេះថា៖ មុនទៅដល់គោលដៅពិនិត្យការជួសជុលផ្លូវនៅតាមព្រំដែន ខ្ញុំបានចូលញ៊ាំអាហារពេលព្រឹក នៅផ្សារកាបី(K3) ស្ថិតក្នុងឃុំក្រញ៉ូងសែនជ័យ ស្រុកស្នូល ខេត្តក្រចេះ ។

សម្ដេចបន្តថា ខ្ញុំគិតថា លបចូលស្ងាត់ៗ ព្រោះអត់មានប្រាប់អជ្ញាធរខេត្តទេ ហើយក៏មិនអោយមានរថយន្តសារ៉ែនបើកមុខដែរ ដើម្បីកុំអោយគេចាប់អារម្មណ៍។ ប៉ុន្តែគ្រាន់តែចុះពីលើរថយន្ត ហើយដើរចូលហាងភ្លាម ត្រូវបែកការបាត់ ព្រោះមីងម្ចាស់ហាងថា ធ្លាប់ឃើញក្នុងទូរស័ព្ទ ។

សម្ដេចធិបតី សូមអរគុណចំពោះលោកយាយ លោកតា លោកអ៊ំ ពូមីង បងប្អូន និងក្មួយៗទាំងអស់នៅផ្សារ K3 ចំពោះការស្រលាញ់រាប់អាន ៕

ដោយ ៖ វណ្ណ​លុក