កំពង់ធំ៖ឯកឧត្តម នួន ផារ័ត្ន អភិបាលខេត្តកំពង់ធំកាលពីព្រឹកថ្ងៃ៣១ ខែកក្កដា ឆ្នាំ២០២៤ បានអញ្ជើញចូលរួមក្នុងពិធី​លែង​កូន​ត្រីពូជ​ចម្រុះប្រាំម៉ឺនក្បាលចូលអាងស្ទឹងព្រៃប្រស់ ស្ថិតក្នុងភូមិព្រៃប្រស់  ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ក្នុងឱកាស​ទិវាមច្ឆជាតិ ឆ្នាំ២០២៤នេះ។ពិធីនេះក៏មានការចូលរួមពី អាជ្ញាធរស្រុក ឃុំ កងកម្លាំងប្រដាប់អាវុធ សហគមន៍ និងការឧបត្ថម្ភ ពីអង្គការ AFD , CI, ANKO, HURREDO, Fact, IIRR និងដៃគូពាក់ព័ន្ធមួយចំនួនទៀត។

 ក្នុងឱកាសនេះឯកឧត្តមអភិបាលខេត្តបានណែនាំដល់អាជ្ញាធរ,សមត្ថកិច្ចជំនាញ ត្រូវបន្តផ្សព្វផ្សាយច្បាប់ស្តីពីជលផល​ដើម្បីឱ្យ​ប្រជាពលរដ្ឋ​ជ្រួតជ្រាប។បន្តបង្ក្រាបបទល្មើសជលផលដែលកើតមានក្នុង​មូលដ្ឋាន​របស់​ខ្លួន ។ត្រូវខិតខំពង្រឹងសមត្ថភាពដល់​សហគមន៍​នេសាទដែល​បានបង្កើតឡើងរួចហើយឱ្យបានរឹងមាំ ។បង្កើតស្រះជម្រកត្រី​សហគមន៍ ជំរុញបន្ថែមដល់ប្រជាពលរដ្ឋ​នៅក្នុងសហគមន៍នេសាទ​ឱ្យងាកមកធ្វើកសិកម្មចម្រុះបន្ថែមទៀត។

ឯកឧត្តមបន្តថា ត្រូវថែរក្សាបង្គោលព្រំប្រទល់ ,ការពារគ្រប់គ្រង​កន្លែងអភិរក្សជលផល ប្រកបដោយប្រសិទ្ធភាព។អាជ្ញាធរស្រុក ឃុំ ដែលមានព្រៃលិចទឹកនៅក្នុងដែនសមត្ថកិច្ចរបស់ខ្លួន ត្រូវចាត់វិធាន​ការឱ្យបានម៉ឺងម៉ាត់បំផុតបន្ថែមទៀត ចំពោះជនល្មើសបំផ្លាញព្រៃ​លិចទឹក និងការពារព្រៃលិចទឹកឱ្យបានគង់វង្ស​។ត្រូវបន្តដាំកូនឈើ​នៅព្រៃលិចទឹកឱ្យបានច្រើនលើដីត្រូវបានដកហូត ព ការទន្ទ្រាន ដើម្បីស្ការព្រៃលិចទឹកឡើងវិញ។

លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត​កំពង់ធំ បានឱ្យដឹងថា កូនត្រីពូជដែលនៅថ្នាក់ខេត្ត​ពេលនេះ​មានចំនួន​៥០.០០០ក្បាល រួមមាន កូនត្រីឆ្ពិននិងកាហែចំនួន៤៥.០០០​ក្បាល,កូនត្រីព្រលូងចំនួន៥ .០០០ក្បាល និងត្រីមេពូជ​ចំនួន១០០គីឡូក្រាម៕
ដោយ៖​ប៊ុន​រដ្ឋា