សម្តេចតេជោ ហ៊ុន សែន បានប្រកាសពីការជាសះស្បើយពីជំងឺកូវីដ-១៩ និងការចាប់ផ្តើមការងារវិញជាធម្មតា
(ភ្នំពេញ)៖ នៅលើទំព័រហ្វេសប៊ុកផ្លូវការ នាថ្ងៃទី៣ កុម្ភៈ សម្តេចតេជោ ហ៊ុន សែន បានថ្លែងថា សម្តេចពុំមានជំងឺកូវីដ១៩ទៀតទេ ក្រោយពីការធ្វើតេស្តអវិជ្ជមាន២ដង កាលពីថ្ងៃទី២ និងនៅរសៀលថ្ងៃទី៣ កុម្ភៈ ។
សម្តេចតេជោ បានថ្លែងថា លាហើយកូវីដ១៩ ជាលើកទី២ និងខិតខំមិនឱ្យមានការលាជាលើកទី៣។
សម្តេចបានសរសេរថា៖ ម្សិលម៉ិញធ្វើតេស្តរហ័ស ពិនិត្យឃើញអវិជ្ជមានកូវីដ.១៩ហើយ តែខ្ញុំនៅតែមិនទាន់ហ៊ានប្រថុយ ដើម្បីចូលរួមដង្ហែព្រះមហាក្សត្រ និងហ្លួងម៉ែ ជាទីគោរពសក្ការៈ យាងទៅប៉េកាំងព្រឹកម៉ិ ញនេះ ព្រោះខ្ញុំនៅហៀរសំបោរនៅឡើយ។ ការបារម្ភខ្លាចឆ្លងទៅព្រះអង្គ និងថ្នាក់ដឹកនាំផ្សេងទៀត។
សម្ដេចតេជោ បន្តថា មុននេះ ២ម៉ោងបានធ្វើតេស្តម្តងទៀតលទ្ធផលអវិជ្ជមានដដែល។ ដូចនេះទាំងគ្រូពេទ្យ ទាំងខ្ញុំកំណត់ថា ខ្ញុំពុំមានជម្ងឺកូវីដ១៩ទៀតទេ។ ខ្ញុំចាប់ផ្តើមការងារធម្មតាដោយរាប់ទាំងទទួលភ្ញៀវជាតិ និងអន្តរជាតិផងដែរ។ លាហើយកូវីដ១៩ ជាលើកទី២ និងខិតខំមិនឲ្យមានការលាជាលើកទី៣ ៕
ដោយ ៖ វណ្ណលុក
