មន្រ្តីរដ្ឋបាលខេត្តកំពង់ស្ពឺបញ្ជាក់ថា ការអប់រំបណ្តុះបណ្តាលបច្ចេកទេសនិងវិជ្ជាជីវៈ នឹងបង្កើតឱកាសការងារ ដល់យុវជន
កំពង់ស្ពឺ៖វិទ្យាស្ថានពហុបច្ចេកទេសខេត្តកំពង់ស្ពឺ កាលពីថ្ងៃទី១៥ ខែមិថុនា បានរៀបចំប្រារព្ធទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈលើកទី៨ ។
លោក ស៊ឹម រតនៈ អភិបាលរងខេត្តកំពង់ស្ពឺដែលអញ្ជើញចូលរួមក្នុងកម្មវិធីនេះបានថ្លែងថា ទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈ គឺស្របតាមយុទ្ធសាស្ត្របញ្ចកោណ-ដំណាក់កាលទី១ ដែលបានកំណត់យកអាទិភាពគន្លឹះទី១ គឺមនុស្ស ដោយបានផ្តោតសំខាន់លើការកសាង និងអភិវឌ្ឍមូលធនមនុស្សប្រកបដោយគុណភាព សមត្ថភាព ជំនាញវិជ្ជាជីវៈច្បាស់លាស់ គំនិតច្នៃប្រឌិត និងភាពប្រកួតប្រជែងខ្ពស់ ដើម្បីសម្រេចឱ្យបាននូវគោលដៅ«ពលរដ្ឋម្នាក់មានជំនាញមួយយ៉ាងតិចប្រចាំជីវិត»។
លោកអភិបាលរងបន្តថា ការអប់រំបណ្តុះបណ្តាលបច្ចេកទេសនិងវិជ្ជាជីវៈនឹងបង្កើតឱកាសការងារ សាងក្តីសង្ឃឹមដល់យុវជននិងកសាងអភិវឌ្ឍមូលធនមនុស្សប្រកបដោយគុណភាព សមត្ថភាព ជំនាញវិជ្ជាជីវៈច្បាស់លាស់។ មានគំនិតច្នៃប្រឌិតនិងភាពប្រកួតប្រជែងខ្ពស់ ដើម្បីសម្រេចឱ្យបាននូវគោលដៅពលរដ្ឋម្នាក់មានជំនាញមួយយ៉ាងតិចប្រចាំជីវិត។
សូមរំលឹកថាវិទ្យាស្ថានពហុបច្ចេកទេសខេត្តកំពង់ស្ពឺបានប្រែក្លាយពីមជ្ឈមណ្ឌលបណ្តុះបណ្តាលវិជ្ជាជីវៈនៅឆ្នាំ២០២៣ ដែលមានគ្រូបច្ចេកទេសសរុបចំនួន ៧៧នាក់ (ស្រី ២០នាក់)។ ក្នុងឆ្នាំ២០២៥នេះមានសិស្ស និស្សិត ចំនួន២ ៩៦៤នាក់ (ស្រី ៩៧៩នាក់) ដែលមានកម្រិតសញ្ញាបត្របច្ចេកទេស និងវិជ្ជាជីវៈ១ ដល់បរិញ្ញាបត្របច្ចេកវិទ្យា ក្នុងនោះសិស្សកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស សម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ មានសិស្សចំនួន ២ ៤០៨នាក់ (ស្រី ៨៤៥នាក់)៕
ដោយ៖ ម៉ុន សំអាត
