ក្រុមការងារចម្រុះរដ្ឋបាលខេត្តបន្ទាយមានជ័យ សម្របសម្រួលនិងលើកទឹកចិត្តពលករខ្មែរដែលត្រឡប់មកពីប្រទេសថៃ
បន្ទាយមានជ័យ៖អភិបាលខេត្តបន្ទាយមានជ័យ ឯកឧត្តម អ៊ុំ រាត្រី រួមជាមួយក្រុមការងារចម្រុះនៃមន្ទីរ និងក្រសួងការងារ និងបណ្តុះបណ្តាលវិជ្ជាជីវៈ បានបន្តចុះសម្របសម្រួលជូនដល់បងប្អូនពលករខ្មែរដែលត្រឡប់មកពីប្រទេសថៃ នៅច្រកទ្វាព្រំដែនអន្តរជាតិប៉ោយប៉ែត។
បងប្អូនពលករខ្មែរត្រូវទទួលស្វាគមន៍យ៉ាងកក់ក្តៅ និងឱ្យស្នាក់នៅជាបណ្ដោះអាសន្ននៅមណ្ឌលសំចត ប៉ោយប៉ែត និងប្រឹក្សាយោបល់អំពីឱកាសការងារជូនដល់បងប្អូនពលករទាំងនោះ ដើម្បីមានឱកាសទទួលបានការងារប្រកបរបរចិញ្ចឹមជីវិតនៅស្រុកកំណើត ខណៈជម្លោះព្រំដែនរវាងកម្ពុជា-ថៃ កាន់តែមានភាពតានតឹង។
ក្នុងឱកាសនេះឯកឧត្ដមអភិបាលខេត្តបន្ទាយមានជ័យបានណែនាំបន្ថែមឱ្យបង្កើនការងារផ្តល់សេវានានាជូនដល់ពលករដែលឆ្លងដែនមកពីប្រទេសថៃឱ្យបានឆាប់រហ័ស និង លឿនបំផុតតាមអ្វីដែលអាចធ្វើបាន ចំពោះបែបបទ ឯកសារនានាក្នុងកំឡុងពេលស្នាក់នៅទីតាំងមណ្ឌលសំចតប៉ោយប៉ែតនេះ ។
លើសពីនេះអាជ្ញាធរខេត្តបន្ទាយមានជ័យ ក៏បានរៀបចំរថយន្តសម្រាប់ដឹកបងប្អូនពលករ វិលត្រលប់ទៅស្រុកកំណើត ព្រមទាំងបានផ្តល់អាហារជូនផងដែរ៕
ដោយ៖ឃិន គន្ធា
