ឯកឧត្តម លី កុសល ដឹកនាំកិច្ចប្រជុំត្រួតពិនិត្យវឌ្ឍនភាពការងារ ត្រៀមធ្វើម្ចាស់ផ្ទះកីឡាវាយសី ជើងឯកអាស៊ីអាគ្នេយ៍ នាដើមខែកក្កដា
(ភ្នំពេញ)៖ នាព្រឹកថ្ងៃទី២៥ ខែមីថុនា ឆ្នាំ២០២៥ ឯកឧត្តម លី កុសល រដ្ឋលេខាធិការ ក្រសួងការពារជាតិ និងជាប្រធានសហព័ន្ធកីឡាវាយសីកម្ពុជា បានដឹកនាំកិច្ចប្រជុំត្រួតពិនិត្យវឌ្ឍនភាពងារងាររបស់សហព័ន្ធកីឡាវាយសីដែលធ្វើបានកន្លងមកនិងជជែកពិភាក្សាអំពីបញ្ហាប្រឈមមួយចំនួនត្រូវដោះស្រាយ ពិសេស គឺត្រួតពិនិត្យជាចុងក្រោយការត្រៀមទទួលរៀបចំធ្វើម្ចាស់ផ្ទះ ការប្រកួតកីឡាវាយសី ជើងឯកអាស៊ីអាគ្នេយ៍ ក្រោមអាយុក្រោម១៥ឆ្នាំ ក្រោម១៧ឆ្នាំ និងក្រោម២៣ឆ្នាំ ថ្ងៃទី០៧-១២ ខែកក្កដា ឆ្នាំ២០២៥ នៅទីលានវាយសីនៃពហុកីឡដ្ឋានជាតិមរតកតេជោ រាជធានីភ្នំពេញ។
ឯកឧត្តម កែវ រស់ អគ្គលេខាធិការ សហព័ន្ធវាយសីកម្ពុជាបានគូសបញ្ជាក់ថា ការងារមួយចំនួនដូចជាកម្មវិធីហ្វឹកហាត់ ត្រៀមខ្លួនរបស់កីឡាករកីឡាការិនីជម្រើសជាតិក្នុងការត្រៀមចូលរួមការប្រកួតអន្តរជាតិនានាក្នុងឆ្នាំ២០២៥នេះ គឺកំពុងតែដំណើរការហ្វឹកហាត់យ៉ាងរលូន ក្រោមការតាមដានជាប្រចាំ ដើម្បីសម្រួចសមត្ថភាពឆ្ពោះទៅរកគុណភាពសក្កានុពលការប្រកួតលើឆាកអន្តរជាតិ។
ទន្ទឹមនេះ ក្រុមការងារទាំងអស់បាននិងកំពុងយកចិត្តទុកដាក់យ៉ាងខ្លាំងក្នុងការជំរុញរៀបចំឱ្យមានការប្រកួតនៅក្នុងស្រុកឱ្យមានកាន់តែច្រើន ដើម្បីចម្រាញ់រកធនធានល្អៗចេញពីតាមបណ្តាក្លឹប។ ជាមួយគ្នានេះដែរ ក្រុមការងាររៀបចំការប្រកួតគ្រប់ផ្នែកទាំងអស់បានត្រៀមខ្លួនគ្រប់ផ្នែក ដើម្បីជំរុញឱ្យដំណើរការរៀបចំធ្វើម្ចាស់ផ្ទះរបស់កម្ពុជាប្រព្រឹត្តិទៅដោយរលូន និងជោគជ័យ តាមការគ្រោងទុក។ ពីព្រោះថា ការរៀបចំការប្រកួតកីឡាវាយសីកម្រិតអាស៊ីអាគ្នេយ៍នៅកម្ពុជា ឆ្នាំ២០២៥នេះ គឺជាលើកទី២ហើយ។
ឯកឧត្តម កែវ រស់ បន្ថែមថា ក្រៅពីការត្រួតពិនិត្យមើលលើវឌ្ឍនភាពការងារនេះ យើងក៏បានត្រួតពិនិត្យមើលការរៀបចំក្រុមកីឡាករ កីឡាការិនីទាំង៣កម្រិត U15 U17 និងឈុត U23 របស់កម្ពុជាថាតើពួកគាត់ដែលត្រូវបានជ្រើសរើសចូលរួមក្នុងក្រុមជម្រើសជាតិនេះមានតម្លាភាពដែរឬទេ ដើម្បីឱ្យសមស្របនឹងគោលការណ៍យុត្តិធម៌ និងផ្តល់ឱកាសជូនដល់ពួកគាត់បានបញ្ចេញស្នាដៃ ក្នុងការប្រជែងមេដាយជូនជាតិ។
បន្ថែមពីលើនេះ ឯកឧត្តម លី កុសល ក៏បានណែនាំឱ្យក្រុមគ្រូបង្វឹកនៃកីឡាករ កីឡាការិនីកម្ពុជាទាំង៣ឈុតត្រូវយកចិត្តទុកដាក់ខ្ពស់ ក្នុងការសម្រួចគុណភាពពួកគេឱ្យមានសិទ្ធផលខ្ពស់ ដើម្បីដណ្តើមឱ្យបានមេដាយជូនជាតិ ក្នុងនាមជាម្ចាស់ផ្ទះជើងឯកអាស៊ីអាគ្នេយ៍ លើកទី២ ឆ្នាំ២០២៥នេះ។ ការទទួលរៀបចំធ្វើម្ចាស់ផ្ទះ ការប្រកួតកីឡាវាយសី ជើងឯកអាស៊ីអាគ្នេយ៍នេះទទួលបានអនុញ្ញាតពីរាជរដ្ឋាភិបាលកម្ពុជា។
ការទទួលធ្វើជាម្ចាស់ផ្ទះរបស់កម្ពុជាសម្រាប់ព្រឹត្តិការណ៍ ការប្រកួតកីឡាវាយសី ជើងឯកអាស៊ីអាគ្នេយ៍ ក្រោមអាយុ១៥ឆ្នាំ ក្រោម១៧ឆ្នាំ និងក្រោម២៣ឆ្នាំ មាន៥ប្រទេសចូលរួមគឺម្ចាស់ផ្ទះកម្ពុជា ប្រ៊ុយណេ ឡាវ មីយ៉ាន់ម៉ា និងទីម័រខាងកើតនេះ គឺជាលើកទី២ហើយ។ ដោយកាលពីលើកទី១ក្នុង ឆ្នាំ២០២៣ បន្ទាប់ពីបញ្ចប់ព្រឹត្តិការណ៍ស៊ីហ្គេម ឆ្នាំ២០២៣។
គួរបញ្ជាក់ថា សម្រាប់សមាសភាពកីឡាករ កីឡាការិនីវាយសីកម្ពុជា ផ្នែកក្រុម U23 មាន១២នាក់ ដែលនឹងចូលរួមប្រជែងជាមួយកីឡាករ កីឡាការិនីមកពីបណ្តាប្រទេសនានា ក្នុងតំបន់ ខណៈផ្នែកក្រុមក្រោម១៧ឆ្នាំ មានកីឡាករ កីឡាការិនី៩នាក់ និងក្រោម១៥ឆ្នាំមានកីឡាករ កីឡាការិនីកម្ពុជា ៦នាក់៕
រូបភាព ៖ ជីម ភារ៉ា
អត្ថបទ ៖ ជាវ ចន្ធូ
