វត្តមានមន្រ្តីនគរបាលកីឡាកម្ពុជា ក្នុងការប្រកួតកីឡានគរបាល និងកងពន្លត់អគ្គិភ័យពិភពលោក មិនត្រឹមតែចូលរួមប្រកួតកីឡានោះទេ ពោលគឺទៅដើម្បីផ្សព្វផ្សាយអំពីកម្ពុជា
(ភ្នំពេញ)៖ មន្រ្តីនគរបាលកីឡានៃក្រុមប្រឹក្សាកីឡាក្រសួងមហាផ្ទៃ លើ៩ប្រភេទកីឡា ដឹកនាំដោយ ឯកឧត្តម សរ សិទ្ធិ រដ្ឋលេខាធិការ ទទួលការងារអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ អមដំណើរដោយ ឯកឧត្តម ឧត្តមសេនីយ៍ឯក យិត ភីរៈ អគ្គលេខាធិការ នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ នាយប់ថ្ងៃទី២៥ ខែ មិថុនា ឆ្នាំ២០២៥ បានចេញដំណើរទៅចូលរួមការប្រកួតកីឡានគរបាល និងកងពន្លត់អគ្គិភ័យពិភពលោក លើកទី២១ ( the 21st World Police and Fire Games) នៅទីក្រុង Birmingham រដ្ឋ Alabama សហរដ្ឋអាមេរិក ដែលនឹងប្រព្រឹត្តទៅចាប់ពីថ្ងៃទី២៧ ខែមិថុនា ដល់ថ្ងៃទី០៦ ខែកក្កដា ឆ្នាំ២០២៥ ។
ថ្លែងប្រាប់អ្នកយកព័ត៌មានកីឡាមុនឡើងយន្តហោះ ឯកឧត្តម សរ សិទ្ធិ បានឱ្យដឹងថា ការចូលរួមរបស់មន្រ្តីនគរបាលកីឡាកម្ពុជា ក្នុងព្រឹត្តិការណ៍មួយនេះ គឺបាន ៣លើករួមមកហើយ ខណៈការចូលរួមក្នុងឆ្នាំ២០២៥លើកទី២១ នៅសហរដ្ឋអាមេរិកនេះ គឺជាលើកទី៤សម្រាប់កម្ពុជា។
ឯកឧត្តម រដ្ឋលេខាធិការ ក្រសួងមហាផ្ទៃ បានថ្លែងរំលេចទៀតថា ព្រឹត្តិការណ៍ការប្រកួតកីឡានគរបាល និងកងពន្លត់អគ្គិភ័យពិភពលោក ដែលរៀបចំឡើងរៀងរាល់២ឆ្នាំម្តងនេះ គឺការរៀបចំមានគោលបំណងបង្ហាញអំពីការរិតចំណងសាមគ្គីភាពរបស់មន្រ្តីនគរបាលទាំងអស់ដែលមកពីជុំវិញពិភពលោក បន្ទាប់ពីបំពេញតួនាទីភារកិច្ចជាកងកម្លាំងអនុវត្តច្បាប់ ។
ឯកឧត្តម រដ្ឋលេខាធិការ បានគូសបញ្ជាក់ទៀតថា សម្រាប់វត្តមានមន្រ្តីនគរបាលកីឡាកម្ពុជាចូលរួមក្នុងព្រឹត្តិការណ៍ខាងលើនេះ គឺមិនមែនចូលរួមគ្រាន់តែប្រកួតកីឡានោះទេ ពោលវត្តមានការចូលរួមរបស់កម្ពុជា គឺបានពាំនាំយកទៅនូវការផ្សព្វផ្សាយអំពីកេរ្តិ៍ឈ្មោះរបស់ព្រះរាជាណាចក្រកម្ពុជាទៅកាន់ពិភពលោកឱ្យគេបានស្គាល់បានដឹងអំពីវប្បធម៌ ប្រពៃណីដ៏ផូផង់របស់កម្ពុជា ពិសេស គឺសមិទ្ធផលរីកចម្រើនរបស់រាជរដ្ឋាភិបាលនៃព្រះរាជាណាចក្រកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី។
សម្រាប់ការចូលរួមរបស់មន្រ្តីនគរបាលកីឡាក្រុមប្រឹក្សាកីឡាក្រសួងមហាផ្ទៃលើជាលើកទី៤នេះ គឺលទ្ធផលដែលទទួលបានត្រឡប់មកជូនកម្ពុជា គឺមានការសង្ឈឹមខ្ពស់ ដ្បិតលទ្ធផលការចូលរួមកាលពីលើកទី២០ នៅប្រទេសកាណាដា កម្ពុជាដណ្តើមបានមេដាយសរុបចំនួន៧១គ្រឿងមានមេដាយមាស ប្រាក់ និងសំរឹទ្ធ ឈរក្នុងចំណាត់ទី១០ ក្នុងចំណោមប្រទេសចូលរួមចំនួន៧០មកពីជុំវិញពិភពលោក។
ការចូលរួមរបស់អត្តពលិកមន្រ្តីនគរបាលកីឡាកម្ពុជាក្នុងព្រឹត្តិការណ៍ការប្រកួតកីឡានគរបាល និងកងពន្លត់អគ្គិភ័យពិភពលោក លើកទី២១ ( the 21st World Police and Fire Games) នៅទីក្រុង Birmingham រដ្ឋ Alabama សហរដ្ឋអាមេរិកនេះ គាំទ្រឧបត្ថម្ភថវិកា ដោយរាជរដ្ឋាភិបាលកម្ពុជា តាមរយៈក្រសួងសេដ្ឋកិច្ចនិងហិរញ្ញវត្ថុ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ និងឯកឧត្តម ឧត្តមសេនីយ៍ ស ថេត អគ្គស្នងការរដ្ឋាននគរបាលជាតិ។ អត្តពលិកមានប្រតិភូ គ្រូបង្វឹក កីឡាករកីឡាការិនីសរុប៥២នាក់ លើ៩ប្រភេទកីឡា រួមមានកីឡាវាយសី ចំបាប់ ជឺជិតស៊ូ យូដូ ហែលទឹក វាយកូនឃ្លីលើតុ ការ៉ាតេ តេក្វាន់ដូ និងកីឡាបាល់ទះ៕
រូបភាព ៖ ជីម ភារ៉ា
អត្ថបទ ៖ ជាវ ចន្ធូ
